"என் உயிருக்கு ஆபத்து இருக்கு".. ஈரானின் கொலை மிரட்டல்... அச்சத்தில் அமெரிக்க அமைச்சர் எடுத்த முடிவு!

ஈரானிடமிருந்து உயிருக்கு அச்சுறுத்தல் வந்துள்ளதாகக் கூறப்படும் நிலையில், அமெரிக்க நிதியமைச்சர் ஸ்காட் பெசென்ட் தனது வீட்டை விட்டு வெளியேறி ராணுவத் தளத்தில் குடியேறியுள்ளார். ஆனால், இந்த மிரட்டல்களுக்குத் தான் ஒருபோதும் பயப்படப் போவதில்லை என்று அவர் திட்டவட்டமாகத் தெரிவித்துள்ளார். அமெரிக்காவின் பொருளாதாரத் தடைகள் மூலம் ஈரானுக்கு நெருக்கடி கொடுக்கும் நடவடிக்கையை முன்னின்று நடத்தி வரும் அவருக்கு எதிராக மிரட்டல்கள் வந்திருப்பது அமெரிக்க அரசியல் வட்டாரத்தில் பரபரப்பை ஏற்படுத்தியுள்ளது.

அமெரிக்க அதிபர் டொனால்ட் டிரம்ப் தலைமையிலான நிர்வாகத்தில் நிதியமைச்சராக இருப்பவர் ஸ்காட் பெசென்ட். ஈரானின் பொருளாதாரத்தை முடக்கும் நோக்கில் அமெரிக்கா மேற்கொண்டு வரும் நடவடிக்கைகளில் இவர் முக்கியப் பங்கு வகித்து வருகிறார். குறிப்பாக, ஈரானுடன் தொடர்புடைய நிதி நிறுவனங்கள், பணப் பரிவர்த்தனை அமைப்புகள் மற்றும் வர்த்தக நிறுவனங்கள் மீது பொருளாதாரத் தடைகளை விதிக்கும் பணிகளை இவர் தலைமையேற்று நடத்தி வருகிறார்.

இதற்காக 'ஆபரேஷன் எகனாமிக் அவுட்காஸ்ட்' (Operation Economic Outcast) என்ற பெயரில் அமெரிக்கா பொருளாதார அழுத்த நடவடிக்கையை மேற்கொண்டு வருகிறது. ஈரானின் வர்த்தக நடவடிக்கைகளைப் பாதிப்பதுடன், அதன் நிதி ஆதாரங்களையும் கட்டுப்படுத்துவதே இந்த நடவடிக்கையின் நோக்கமாகும். குறிப்பாக, மத்திய கிழக்கு நாடுகளில் ஈரானுடன் நிதிப் பரிவர்த்தனைகளுக்கு உதவும் வங்கிகள் மற்றும் சேவை நிறுவனங்கள் இந்தத் தடைகளின் இலக்காக உள்ளன.

இந்த நடவடிக்கைகளால் ஈரானுக்கு பொருளாதார நெருக்கடி அதிகரித்து வருவதாக அமெரிக்க நிர்வாகம் கூறுகிறது. இதற்கிடையே, அமெரிக்காவின் பொருளாதார நடவடிக்கைகளுக்குப் பதிலடியாக ஈரான் தரப்பிலிருந்து மிரட்டல்கள் வருவதாக அமெரிக்க அதிகாரிகள் தெரிவித்துள்ளனர். இந்தப் பின்னணியில்தான் ஸ்காட் பெசென்ட்டின் பாதுகாப்பு தொடர்பான கவலைகள் அதிகரித்துள்ளன. அமெரிக்காவின் CNBC தொலைக்காட்சிக்கு அளித்த பேட்டியில் பேசிய பெசென்ட், ஈரானின் மிரட்டல்களுக்குத் தான் அஞ்சப்போவதில்லை என்று கூறினார். ஈரானின் இஸ்லாமிய புரட்சிகர காவல் படையை (IRGC) அவர் கடுமையாக விமர்சித்தார். பொருளாதார நெருக்கடியில் சிக்கியுள்ளதால் அந்த அமைப்பு ஆபத்தான நிலைக்குத் தள்ளப்பட்ட விலங்கைப் போலச் செயல்படுவதாக அவர் ஒப்பிட்டுப் பேசினார்.

வளைகுடா பகுதியில் பணியாற்றும் அமெரிக்க ராணுவ வீரர்களுக்கும், அதிபர் டிரம்புக்கும் தொடர்ந்து உயிருக்கு மிரட்டல்கள் வருவதாகக் குறிப்பிட்ட அவர், அவர்களே அச்சமின்றிச் செயல்படும்போது தானும் ஏன் பயப்பட வேண்டும் என்று கேள்வி எழுப்பினார். அமெரிக்காவின் பொருளாதார நடவடிக்கைகள் பலனளித்து வருவதால்தான் இத்தகைய எதிர்வினைகள் ஏற்படுவதாகவும் அவர் தனது கருத்தைத் தெரிவித்தார்.

தனது பாதுகாப்பு தொடர்பான முடிவை எடுத்தது குறித்து விளக்கிய பெசென்ட், அமெரிக்க ரகசியப் பாதுகாப்புப் பிரிவான Secret Service வழங்கிய அறிவுறுத்தலின்படியே தனது வீட்டிலிருந்து ராணுவத் தளத்துக்கு மாறியதாகக் கூறினார். 2025 ஜனவரியில் வால் ஸ்ட்ரீட் ஜர்னல் நாளிதழ் வெளியிட்ட தனது வாஷிங்டன் வீட்டின் வான்வழிப் புகைப்படம், அந்த வீட்டின் இருப்பிடத்தை எளிதில் கண்டறிய உதவும் வகையில் இருந்ததாகவும் அவர் குற்றம்சாட்டினார். அந்தப் புகைப்படத்தை வெளியிட வேண்டாம் என்று தனது தரப்பில் நாளிதழ் ஆசிரியரிடம் கேட்டுக்கொண்டதாகவும் தெரிவித்தார். இருப்பினும், அந்தப் படம் வெளியிடப்பட்டதை அவர் பொறுப்பற்ற மற்றும் ஆபத்தான நடவடிக்கை என்று விமர்சித்தார்.

அமெரிக்க உளவுத்துறை அதிகாரிகளும் ஈரானின் அச்சுறுத்தல்கள் குறித்து எச்சரிக்கை விடுத்துள்ளனர். அமெரிக்கப் பணியாளர்கள் மற்றும் பொதுமக்களைக் குறிவைக்கும் ஈரானின் திட்டங்கள் முன்னேறிய கட்டத்தை எட்டியுள்ளதாகக் கடந்த மாதம் வெளியான உளவுத்துறை குறிப்பில் தெரிவிக்கப்பட்டதாகச் செய்திகள் கூறுகின்றன. இதனால் மத்திய கிழக்கு நாடுகளில் உள்ள அமெரிக்கத் தூதரகங்கள் மற்றும் அதிகாரிகளின் பாதுகாப்பும் அதிகரிக்கப்பட்டுள்ளது. அமெரிக்க அதிகாரிகள் மீது தாக்குதல் நடத்தத் திட்டமிட்டதாகக் கூறப்படும் குற்றச்சாட்டுகளை ஈரான் மறுத்துள்ளது. அமெரிக்காவுக்குள் அல்லது அந்நாட்டின் அதிகாரிகளைக் குறிவைத்து தாக்குதல் நடத்தும் சதித்திட்டங்களில் ஈடுபடவில்லை என்பதே ஈரானின் நிலைப்பாடாக உள்ளது.

ஈரானின் துறைமுகங்கள் மீதான அமெரிக்கக் கடற்படை முற்றுகையும், பொருளாதாரத் தடைகளும் தொடர்ந்து வரும் நிலையில், இரு நாடுகளுக்கும் இடையிலான பதற்றம் நீடிக்கிறது. குறிப்பாக, உலகின் முக்கிய எண்ணெய் போக்குவரத்துப் பாதையான ஹார்முஸ் ஜலசந்தி மீண்டும் திறக்கப்பட வேண்டும் என்றும், கப்பல்கள் மீதான தாக்குதல்கள் நிறுத்தப்பட வேண்டும் என்றும் அமெரிக்கா வலியுறுத்தி வருகிறது. இத்தகைய சூழலில், அமெரிக்க நிதியமைச்சரே பாதுகாப்புக் காரணங்களுக்காக ராணுவத் தளத்தில் குடியேறியிருப்பது இரு நாடுகளுக்கும் இடையிலான மோதலின் தீவிரத்தை வெளிப்படுத்துகிறது. பொருளாதாரத் தடைகள் ஒருபுறம் தொடரும் நிலையில், அதிகாரிகளின் பாதுகாப்பு தொடர்பான கவலைகளும் அதிகரித்து வருகின்றன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.