குலதெய்வ வழிபாடு என்பது நமது தமிழ் சமூகத்தின் ஒவ்வொரு குடும்பங்களின் ஆன்மீக அஸ்திவாரம். ஒவ்வொரு குடும்பத்திற்கும் ஒரு 'குலதெய்வம்' உண்டு. வெறும் ஒரு சாமியாக இல்லாமல், அந்தக் குடும்பத்தின் ஆணிவேர், பாதுகாப்பு அரண் மற்றும் வழிகாட்டி போன்றதாகும். குலம் என்றால் வம்சம் அல்லது பரம்பரை என்று பொருள். அந்தப் பரம்பரையை வழிநடத்தும் தெய்வமே குலதெய்வம் ஆகும். மற்ற தெய்வங்களை வழிபடாமல் இருந்தாலும் கூட, குலதெய்வத்தை மட்டும் தவறாமல் வழிபட வேண்டும் என்று நம் முன்னோர்கள் வலியுறுத்தினார்கள். ஏன் குலதெய்வ வழிபாடு இவ்வளவு முக்கியத்துவம் பெறுகிறது? ஆனால், இதில் குறிப்பிடத்தக்க விஷயம் என்னவெனில், பல குடும்பங்களுக்கு தங்கள் குலதெய்வம் எது என்பதே தெரியாது.
குலதெய்வம்தான் ஒரு மனிதனின் பூர்வீகப் புண்ணியத்தைச் சுமந்து நிற்பதாக நம்பப்படுகிறது. நாம் எத்தனை ஆலயங்களுக்குச் சென்று வந்தாலும், பலவிதமான சடங்குகளைச் செய்தாலும், அந்தக் குலதெய்வத்தின் அருள் கிடைக்காமல் முழுமையான பலன் கிடைப்பதில்லை என்பது ஆன்றோர்களின் வாக்கு. ஒருவன் குலதெய்வத்தை மறக்கும்போது, அவனுடைய குலத்தின் பாரம்பரியச் சங்கிலி அறுபடுகிறது. அதனால், குடும்பத்தில் சிக்கல்கள், அமைதியின்மை மற்றும் தடைகள் ஏற்படுவதாக ஐதீகம்.
குலதெய்வ வழிபாட்டின் மூலம் குடும்பத்தில் எண்ணற்ற நன்மைகள் ஏற்படுகின்றன. முக்கியமாக, திருமணத் தடை, குழந்தைப் பேறு இல்லாமை போன்ற பெரிய குறைபாடுகளை நீக்கும் சக்தி குலதெய்வத்திற்குக் கூடுதல் இருப்பதாக நம்பப்படுகிறது. ஒரு குடும்பம் ஒன்று சேர்ந்து குலதெய்வக் கோயிலுக்குச் சென்று, பொங்கல் வைத்து, கிடாவெட்டிப் படையலிடுவது என்பது வெறும் சடங்காக இல்லாமல், அந்தக் குடும்பத்தின் பிணைப்பை, உறவை வலுப்படுத்தும் ஒரு நிகழ்வு ஆகும். அந்த வழிபாட்டில் பங்கெடுக்கும்போது, அனைத்து உறவுகளும் ஒரே இடத்தில் கூடி, ஒருமித்த மனதோடு தெய்வத்தை வணங்குவதால், அங்கே ஒரு கூட்டுச் சக்தி உருவாகிறது. அந்தச் சக்தி குடும்பத்தில் உள்ளவர்களுக்கு மன தைரியத்தையும், நேர்மறை எண்ணங்களையும் வழங்குகிறது.
மேலும், வாழ்க்கையில் எதிர்பாராத தோல்விகள், திடீர் கஷ்டங்கள் ஏற்படும்போது, குலதெய்வத்தை மனமுருகி வேண்டி வழிபட்டால், அந்தச் சோதனைகளைத் தாங்கும் மன வலிமை கிடைக்கிறது. குலதெய்வம் என்பது பொதுவாகச் சிறு தெய்வங்களாக இருக்கலாம். ஆனால், அதன் மகிமை பெரியது. காரணம், அந்தக் குடும்பம், அந்தத் தெய்வம் இருக்கும் நிலப்பரப்புடன், மண்வாசத்துடன் நெருங்கிய தொடர்பைக் கொண்டிருக்கும். அந்தத் தெய்வம் வாழும் இடத்தின் அதிர்வு, அந்த வம்சத்தின் உறுப்பினர்களுக்கும் கிடைக்கும்.
எனவே, வருடத்திற்கு ஒருமுறையாவது குடும்பத்துடன் குலதெய்வக் கோயிலுக்குச் சென்று, உகந்த முறையில் படையலிட்டு, வழிபாடுகள் செய்வது மிக மிக அவசியம். இது குடும்பத்தைக் காக்கும் ஒரு அசைக்க முடியாத சக்தி கவசமாகும். குலதெய்வத்தை வழிபடுவதன் மூலம், நம்முடைய சந்ததிகளுக்கு நம் பாரம்பரியத்தின் முக்கியத்துவத்தைக் கடத்த முடியும். ஸோ, குலதெய்வ வழிபாட்டை எப்போதும் புறக்கணிக்காதீங்க.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.