ஜோதிட சாஸ்திரத்தில் நிழல் கிரகங்கள் என்று அழைக்கப்படும் ராகு மற்றும் கேது ஆகிய இரண்டும் ஒருவருடைய வாழ்க்கையில் திடீர் திருப்பங்களை ஏற்படுத்துவதில் வல்லமை படைத்தவை. மற்ற கிரகங்கள் நேர்க்கதியில் செல்லும்போது, ராகுவும் கேதுவும் எப்போதும் பின்னோக்கியே (வக்கிர கதி) நகரும் தன்மை கொண்டவை. சுமார் 18 மாதங்களுக்கு ஒருமுறை நிகழும் இந்தப் பெயர்ச்சி, ஒருவருடைய ஜாதகத்தில் ராகு அமரும் இடத்தைப் பொறுத்து அவருக்குப் பெரும் புகழையும், கேது அமரும் இடத்தைப் பொறுத்து அவருக்கு ஞானத்தையும் வழங்கும். ராகுவை 'போக காரகன்' என்றும், கேதுவை 'மோட்ச காரகன்' என்றும் அழைப்பார்கள். ராகு பகவான் யோகம் தரும் இடத்தில் அமர்ந்தால், ஒருவரைப் பிச்சைக்காரனிலிருந்து கோடீஸ்வரனாக மாற்றும் ஆற்றல் கொண்டவர். அதேபோல் கேது பகவான் ஆன்மீக ஈடுபாட்டையும், தேவையற்ற பந்தங்களிலிருந்து விடுதலையையும் கொடுப்பார்.
ராகு-கேது பெயர்ச்சியின் போது மேஷம் முதல் மீனம் வரையிலான பன்னிரண்டு ராசிகளுக்கும் வெவ்வேறு விதமான பலன்கள் கிட்டும். பொதுவாக 3, 6, 11 ஆகிய இடங்களில் ராகு சஞ்சரிக்கும் போது அந்த ராசிக்காரர்களுக்கு அபாரமான பணவரவும், எதிரிகளை வெல்லும் துணிச்சலும் கிடைக்கும். கேது பகவான் 12-ம் இடத்தில் அமரும்போது அது 'மோட்ச யோகம்' என்று அழைக்கப்படுகிறது. இந்தப் பெயர்ச்சிக் காலத்தில் சிலருக்குத் தேவையற்ற குழப்பங்கள், தூக்கமின்மை அல்லது மறைமுக எதிர்ப்புகள் வரலாம். ராகுவின் பிடியிலிருந்து விடுபடத் துர்க்கை அம்மனுக்கு ராகு காலத்தில் எலுமிச்சை விளக்கு ஏற்றி வழிபாடு செய்வது மிகச்சிறந்த பலனைத் தரும். அதேபோல் கேதுவின் பாதிப்புகள் குறைய விநாயகப் பெருமானுக்கு அருகம்புல் மாலை சாற்றி வழிபடுவது விசேஷமானது.
ராகு-கேதுக்கள் என்பவை நம்முடைய முன்ஜென்ம வினைகளின் பிரதிபலிப்பாகவே பார்க்கப்படுகின்றன. இந்தப் பெயர்ச்சிக் காலத்தில் தான தருமங்கள் செய்வது கிரகங்களின் எதிர்மறைத் தாக்கத்தைக் குறைக்க உதவும். குறிப்பாகக் கருப்பு உளுந்து மற்றும் கொள்ளு தானம் செய்வது ராகு-கேதுக்களைச் குளிர்விக்கும். ஜோதிட ரீதியாக இந்தப் பெயர்ச்சி என்பது ஒரு மாற்றத்திற்கான அறிகுறியாகும். பழையன கழிந்து புதிய வாய்ப்புகள் தேடி வரும் காலமிது. மன உறுதியுடனும், இறை நம்பிக்கையுடனும் இருப்பவர்களுக்கு ராகு-கேதுக்கள் எப்போதுமே தீமை செய்வதில்லை, மாறாக வாழ்க்கைப் பாடங்களைக் கற்றுக்கொடுத்து உயர்த்துவார்கள்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.