சென்னை சூப்பர் கிங்ஸ் ரசிகர்கள் கவனத்திற்கு.. தோனியின் அடுத்த கட்ட முடிவு இதுதான்!

ஐபிஎல் 2026 தொடரில் சென்னை சூப்பர் கிங்ஸ் அணி இருந்து வெளியேறியுள்ள நிலையில், அடுத்த சீசனில் தோனி மீண்டும் விளையாடுவாரா என்ற கேள்வி ரசிகர்களிடையே பெரும் எதிர்பார்ப்பை ஏற்படுத்தியுள்ளது. இந்த சீசனுக்கு முன்பாகவே ‘அன்கேப்டு’ வீரராக தக்கவைக்கப்பட்ட தோனி, இளம் வீரர்களை வழிநடத்துவார் என்று எதிர்பார்க்கப்பட்டது. ஆனால், எதிர்பாராத காயங்கள் காரணமாக இந்த சீசன் முழுவதும் அவரால் களமிறங்க முடியாமல் போனது. லீக் சுற்றில் இன்னும் ஒரே ஒரு போட்டி மட்டுமே எஞ்சியுள்ள நிலையில், பேட்டிங் மற்றும் விக்கெட் கீப்பிங் என எதிலுமே தோனி பங்கேற்கவில்லை. இது குறித்து சிஎஸ்கே பயிற்சியாளர் ஸ்டீபன் பிளெமிங்கிடம் கேட்டபோது, இது குறித்து நிர்வாகம் தான் முடிவெடுக்க வேண்டும் என்று மழுப்பலாக பதில் அளித்துள்ளார்.

சென்னை அணியின் வெற்றிப் பயணத்தில் தோனியும், பிளெமிங்கும் பிரிக்க முடியாத சக்திகளாக இருந்து வருகின்றனர். 2008-ஆம் ஆண்டு முதல் பிளெமிங் அணியின் முக்கிய அங்கமாகச் செயல்பட்டு வருகிறார். இந்த சீசனில் தோனி மைதானத்தில் விளையாடவில்லை என்றாலும், திரைமறைவில் இருந்து இளம் வீரர்களுக்கு அவர் வழிகாட்டியாக இருந்த விதம் மிகப்பெரிய மாற்றத்தை ஏற்படுத்தியுள்ளது என்று பிளெமிங் குறிப்பிடுகிறார். தோனியின் இருப்பு இளம் வீரர்களுக்குப் பெரிய உத்வேகமாக அமைந்தது என்பது மறுக்க முடியாத உண்மை.

இது குறித்து பேசிய ஸ்டீபன் பிளெமிங், அணி நிர்வாகம் தான் இது தொடர்பான முடிவை எடுக்க வேண்டும் என்றும், தோனி இந்த ஆண்டு முழுவதும் அணியுடன் இருந்ததே மிகப்பெரிய பலம் என்றும் தெரிவித்தார். அவர் விளையாடவில்லை என்றாலும், இளம் வீரர்களுக்குத் தேவையான ஆலோசனைகளை வழங்கி அணியின் ஒருங்கிணைப்புக்கு மிகப்பெரிய பங்காற்றியுள்ளார் என்று அவர் பெருமிதத்துடன் கூறினார். தோனியின் செயல்பாடுகள் அணியின் வளர்ச்சிக்கு உதவியாக இருந்ததை பிளெமிங் சுட்டிக்காட்டினார்.

தொடர்ந்து பேசிய அவர், இந்த சீசனில் அணி பல புதிய வீரர்களைக் கண்டறிந்துள்ளது என்றும், அவர்கள் வருங்காலத்தில் சென்னை சூப்பர் கிங்ஸ் அணியின் நட்சத்திரங்களாக உருவெடுப்பார்கள் என்றும் நம்பிக்கை தெரிவித்தார். ஐபிஎல் போன்ற தொடர்களில் முடிவுகள் மட்டுமே கணக்கில் கொள்ளப்படும் என்பது தனக்குத் தெரியும் என்றும், ஆனால் நிர்வாகம் எடுக்கும் முடிவே இறுதியானது என்றும் பிளெமிங் தெரிவித்தார். களத்தில் தோனி இல்லாவிட்டாலும், அணியின் வெற்றிக்குத் தேவையான அடித்தளத்தை அமைத்துக் கொடுப்பதில் அவர் உறுதியாக உள்ளார்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.