நிச்சயமற்ற முறையில் வடிவமைக்கப்பட்டுள்ள 2026 டி20 உலகக் கோப்பைத் தொடரின் சூப்பர் 8 சுற்று அட்டவணை தற்போது சர்வதேச கிரிக்கெட் கவுன்சிலை பெரும் சர்ச்சையில் தள்ளியுள்ளது. இந்தத் தொடரில் அடுத்த சுற்றுக்கு முன்னேறிய எட்டு அணிகளின் விவரங்கள் இறுதி செய்யப்பட்ட நிலையில், ஐசிசி உருவாக்கியுள்ள 'முன்-தரவரிசை' (Pre-seeding) முறை சமூக வலைதளங்களில் கடும் விமர்சனங்களைச் சந்தித்து வருகிறது. இதன் விளைவாக, லீக் சுற்றில் அபாரமாக விளையாடி தங்கள் பிரிவுகளில் முதலிடம் பிடித்த நான்கு அணிகளும் ஒரே சூப்பர் 8 பிரிவில் சேர்க்கப்பட்டுள்ளன. அதேவேளையில், இரண்டாம் இடம் பிடித்த மற்ற நான்கு அணிகளும் மற்றொரு பிரிவில் இடம்பெற்றுள்ளது கிரிக்கெட் ரசிகர்களிடையே அதிர்ச்சியை ஏற்படுத்தியுள்ளது.
இந்த முன்-தரவரிசை முறையினால் சூப்பர் 8 பிரிவுகளுக்கிடையே மிகப்பெரிய சமமற்ற நிலை உருவாகியுள்ளது. தொடர் தொடங்குவதற்கு முன்பாகவே ஏ1, பி1 என முக்கிய அணிகளுக்கு நிலையான இடங்களை ஐசிசி ஒதுக்கியதுதான் இந்த குழப்பத்திற்கு அடிப்படை காரணமாக அமைந்தது. இதன் காரணமாக, தங்களது பிரிவுகளில் முதலிடம் பிடித்த பலமான அணிகளான இந்தியா, ஜிம்பாப்வே, மேற்கிந்தியத் தீவுகள் மற்றும் தென்னாப்பிரிக்கா ஆகிய நான்கு அணிகளும் குழு 1-இல் இணைந்துள்ளன. மறுபுறம், இரண்டாம் இடத்தைப் பிடித்த பாகிஸ்தான், இலங்கை, இங்கிலாந்து மற்றும் நியூசிலாந்து ஆகிய அணிகள் குழு 2-இல் இடம்பெற்றுள்ளன.
விளையாட்டுப் போட்டிகளின் பொதுவான விதிமுறைப்படி, லீக் சுற்றில் முதலிடம் பிடிக்கும் அணிகளுக்கு அடுத்த சுற்றில் எளிய வாய்ப்புகள் வழங்கப்பட வேண்டும். ஆனால், இந்த விசித்திரமான முறையினால் லீக் சுற்றில் சிறப்பாகச் செயல்பட்ட இரண்டு முன்னணி அணிகள் அரையிறுதிக்கு முன்பாகவே தொடரை விட்டு வெளியேறும் கட்டாயம் ஏற்பட்டுள்ளது. அதேசமயம், இரண்டாம் இடம் பிடித்த அணிகளுக்கு அரையிறுதிக்குச் செல்லும் பாதை மிகவும் எளிதாக்கப்பட்டுள்ளது. இதனால் லீக் சுற்றில் முதலிடம் பிடிப்பதற்கான முக்கியத்துவமே குறைந்துவிட்டதாக விமர்சகர்கள் சுட்டிக்காட்டுகின்றனர்.
உதாரணமாக, தென்னாப்பிரிக்க அணி தனது பிரிவில் முதலிடம் பிடித்த போதிலும், இரண்டாம் இடம் பிடித்த நியூசிலாந்து அணிக்கு முன்கூட்டியே உயர் தரவரிசை வழங்கப்பட்டதால் தென்னாப்பிரிக்கா பின்தள்ளப்பட்டுள்ளது. இத்தகைய தரவரிசை ஒதுக்கீட்டினால், சூப்பர் 8 சுற்றுக்குத் தகுதி பெற்ற அணிகள் உறுதியான பிறகு நடைபெறும் கடைசி லீக் போட்டிகள் எவ்வித சுவாரசியமும் இன்றி வெறும் சடங்காக மாறிவிடுகின்றன. இது ரசிகர்களிடம் இருக்க வேண்டிய விறுவிறுப்பை முற்றிலுமாக சிதைத்துவிடுகிறது.
மேலும், இந்தத் தொடரை இணைந்து நடத்தும் இலங்கைக்கு இந்த அட்டவணை பெரும் பின்னடைவாகக் கருதப்படுகிறது. சொந்த மண்ணில் சிறப்பாக விளையாடி வரும் இலங்கை அணி, ஒருவேளை அரையிறுதிக்குத் தகுதி பெற்றால் கூட, முன்கூட்டியே தீர்மானிக்கப்பட்ட விதிகளின்படி இந்தியாவிற்குப் பயணம் செய்ய வேண்டியுள்ளது. இதனால் கொழும்பில் உள்ள தனது சொந்த ரசிகர்களுக்கு முன்னால் விளையாடும் பொன்னான வாய்ப்பை அந்த அணி இழக்க நேரிடும். இந்த முடிவுகள் போட்டியை நடத்தும் நாட்டுக்கே பாரபட்சமாக இருப்பதாகக் குற்றச்சாட்டுகள் எழுந்துள்ளன.
இந்தக் கடுமையான விமர்சனங்களுக்குப் பதிலளித்துள்ள ஐசிசி, நிர்வாக ரீதியிலான சவால்களே இத்தகைய முடிவுக்குக் காரணம் என்று விளக்கம் அளித்துள்ளது. இந்தியா மற்றும் இலங்கை என இரு நாடுகளில் போட்டிகள் நடப்பதால், பயணத் திட்டங்கள் மற்றும் மைதான ஏற்பாடுகளை முன்கூட்டியே திட்டமிட இந்த முன்-தரவரிசை முறை அவசியமானதாக இருந்ததாகத் தெரிவித்துள்ளது. என்னதான் காரணம் சொன்னாலும், முறையான போட்டித் தகுதியை விட நிர்வாக வசதிக்கே ஐசிசி முன்னுரிமை அளித்துள்ளது கிரிக்கெட் ஆர்வலர்களிடையே பெரும் அதிருப்தியை ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.