ஐபிஎல் 2026 கிரிக்கெட் தொடரில் கொல்கத்தா நைட் ரைடர்ஸ் அணிக்கு எதிரான போட்டியில் சென்னை சூப்பர் கிங்ஸ் அணி அபார வெற்றி பெற்றது. இந்த வெற்றியில் ஆப்கானிஸ்தான் சுழற்பந்து வீச்சாளர் நூர் அகமதுவின் பங்கு மிக முக்கியமானது. கடந்த சில போட்டிகளாகச் சரியான ஃபார்ம் இல்லாமல் தவித்து வந்த நூர் அகமது, இந்தப் போட்டியில் வெறும் 21 ரன்கள் மட்டுமே கொடுத்து 3 முக்கிய விக்கெட்டுகளை வீழ்த்தி அசத்தினார். நூர் அகமதுவின் இந்தத் திடீர் மாற்றத்திற்கும் மற்றும் துல்லியமான பந்துவீச்சுக்கும் பின்னால் சிஎஸ்கே அணியின் ஜித்தன் எம்.எஸ்.தோனியின் ரகசிய அறிவுரைகள் இருந்தது இப்போது வெளிச்சத்திற்கு வந்துள்ளது. இது குறித்து சிஎஸ்கே அணியின் பந்துவீச்சு பயிற்சியாளர் ஸ்ரீதரன் ஸ்ரீராம் சில சுவாரஸ்யமான தகவல்களைப் பகிர்ந்துள்ளார்.
நூர் அகமது திறமையான பந்துவீச்சாளர் என்றாலும், இந்த சீசனில் அவர் எதிர்பார்த்த அளவுக்கு விக்கெட்டுகளை எடுக்க முடியாமல் தடுமாறினார். அந்தச் சமயத்தில் தான் தோனி அவரிடம் ஒரு நீண்ட உரையாடலை மேற்கொண்டார். ஒரு பயிற்சி அமர்வின் போது, நூர் அகமதுவிடம் தோனி தனியாகப் பேசி, அவரது பந்துவீச்சில் செய்ய வேண்டிய மாற்றங்கள் மற்றும் குறிப்பாக 'லெக்-பிரேக்' பந்துகளை எப்படி வீச வேண்டும் என்பது குறித்து விரிவான ஆலோசனைகளை வழங்கினார். தோனியின் அந்தப் பேச்சும், அவர் கொடுத்த ஊக்கமும் தான் நூர் அகமதுவை மீண்டும் ஃபார்முக்கு கொண்டு வந்துள்ளது. தோனியின் ஆலோசனையை அப்படியே களத்தில் செயல்படுத்திய நூர் அகமதுவிற்கு, கொல்கத்தா அணிக்கு எதிரான போட்டியில் கைமேல் பலன் கிடைத்தது.
பயிற்சியாளர் ஸ்ரீராம் கூறுகையில், "நூர் அகமது இந்தப் போட்டியில் பந்துகளைச் சுழல வைப்பதில் அதிக கவனம் செலுத்தினார். மைதானமும் அவருக்கு ஓரளவுக்கு ஒத்துழைத்தது. குறிப்பாக, காற்றில் பந்தின் வேகத்தைக் குறைத்து வீசியது பேட்டர்களுக்குச் சிக்கலை ஏற்படுத்தியது. இதற்காகத்தான் தோனி அவருடன் நீண்ட நேரம் பேசிப் பயிற்சி அளித்தார். குறிப்பாக லெக்-பிரேக் பந்துகளைத் துல்லியமாக வீசுவது குறித்து தோனி கொடுத்த டிப்ஸ் நூர் அகமதுவிற்குப் பெரிய அளவில் உதவியது. அதன் பலனை இன்று நாம் மைதானத்தில் பார்த்தோம்" என்று தெரிவித்தார். இந்த சீசனில் நூர் அகமது எடுத்த 4 விக்கெட்டுகளில் 3 விக்கெட்டுகள் கொல்கத்தா அணிக்கு எதிராகவே கிடைத்துள்ளது என்பது குறிப்பிடத்தக்கது.
மேலும் பேசிய ஸ்ரீராம், இந்த சீசனில் ஆடுகளங்கள் பேட்டிங்கிற்குச் சாதகமாக இருந்ததால் நூர் அகமதுவால் ஆரம்பத்தில் விக்கெட்டுகளை எடுக்க முடியவில்லை என்று விளக்கமளித்தார். பந்தை ஆடுகளத்தில் பிட்ச் செய்து அதன் மூலம் பேட்டர்களைக் குழப்ப வேண்டும் என்பதுதான் நூர் அகமதுவின் திட்டம். முதல் ஓவரில் கொஞ்சம் தடுமாறினாலும், பின்னர் சரியான லெந்த்தில் பந்துவீசி கொல்கத்தா வீரர்களைத் திணறடித்தார். ஸ்ட்ராடஜிக் டைம்-அவுட் நேரத்தின் போது சக வீரர் அகீல் உசேன் கொடுத்த ஆலோசனையும் அவருக்குப் பயனுள்ளதாக இருந்தது. பந்தின் வேகத்தை மாற்றி வீசியதன் மூலம் பேட்டர்களைத் தவறு செய்யத் தூண்டியதே நூர் அகமதுவின் வெற்றிக்குக் காரணமாக அமைந்தது.
நூர் அகமது கிரிக்கெட் விளையாட்டை மிகவும் நுணுக்கமாகக் கவனிக்கும் ஒரு மாணவர் என்று ஸ்ரீராம் பாராட்டியுள்ளார். பேட்டர்களின் பலவீனம் என்ன, ஃபீல்டர்களை எங்கே நிறுத்த வேண்டும், எந்த வேகத்தில் பந்துவீச வேண்டும் என்பதை நூர் அகமது மிகச் சரியாகத் திட்டமிடுகிறார். பந்து கையை விட்டு வெளியே வந்த பிறகு கடைசியில் ஏற்படும் திருப்பம் (Late movement) தான் அவரது மிகப்பெரிய பலம். தோனியின் அனுபவமும் நூர் அகமதுவின் இந்தத் திறமையும் சேரும்போது, வரும் போட்டிகளிலும் அவர் சிஎஸ்கே அணிக்காகப் பல விக்கெட்டுகளை அள்ளுவார் என்று எதிர்பார்க்கப்படுகிறது. தோனியின் ஒரு சின்னப் பேச்சு ஒரு வீரரின் ஆட்டத்தையே மாற்றியமைத்தது ரசிகர்களிடையே நெகிழ்ச்சியை ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.