இந்திய உள்ளூர் கிரிக்கெட்டில் முக்கியமான அடையாளமாக பார்க்கப்படும் துலீப் டிராபியின் 2026 இறுதிப்போட்டி சென்னை சேப்பாக்கத்தில் இன்று தொடங்கியுள்ளது. கிழக்கு மண்டலம் மற்றும் தெற்கு மண்டலம் அணிகள் கோப்பைக்காக நேருக்கு நேர் மோதும் இந்தப் போட்டி, அனுபவம் வாய்ந்த வீரர்களுக்கும் இந்திய கிரிக்கெட்டின் அடுத்த தலைமுறையினருக்கும் தங்களது திறமையை வெளிப்படுத்தும் முக்கியமான மேடையாக அமைந்துள்ளது. குறிப்பாக இஷான் கிஷன், திலக் வர்மா, வைபவ் சூர்யவன்ஷி, முகமது ஷமி, முகமது சிராஜ் போன்ற வீரர்கள் இடம்பெற்றுள்ளதால் இந்த இறுதிப்போட்டிக்கு கூடுதல் கவனம் கிடைத்துள்ளது.
டாஸ் வென்ற கிழக்கு மண்டலம் முதலில் பேட்டிங் செய்ய முடிவு செய்தது. தொடக்க வீரர்களாக அபிமன்யு ஈஸ்வரன் மற்றும் வைபவ் சூர்யவன்ஷி களமிறங்கினர். சர்வதேச கிரிக்கெட்டில் ஏற்கனவே கவனம் பெற்றுவிட்ட சூர்யவன்ஷிக்கு இது மிகவும் வித்தியாசமான சவால். டி20 போட்டிகளில் வேகமாக ரன்கள் சேர்ப்பதற்கு பழகியுள்ள அவர், ஐந்து நாள் கொண்ட முதல் தர கிரிக்கெட்டின் நீண்ட நேர அழுத்தத்தையும் பொறுமையையும் எவ்வாறு சமாளிக்கிறார் என்பது இந்தப் போட்டியின் முக்கிய அம்சங்களில் ஒன்றாக பார்க்கப்படுகிறது. கிழக்கு மண்டலத்தின் தொடக்க ஜோடி முதல் கட்டத்திலேயே நம்பிக்கையளிக்கும் ஆட்டத்தை வெளிப்படுத்தியது. சூர்யவன்ஷி தனது இயல்பான அதிரடி அணுகுமுறையுடன் விளையாட, ஈஸ்வரன் மறுபுறம் அனுபவத்தை பயன்படுத்தி இன்னிங்ஸை கட்டமைத்தார். ஆட்டத்தின் தொடக்க கட்டத்திலேயே இருவரும் தெற்கு மண்டல பந்துவீச்சாளர்களுக்கு அழுத்தம் கொடுத்தனர். ஒரு கட்டத்தில் கிழக்கு மண்டலம் விக்கெட் இழப்பின்றி 70 ரன்களை கடந்தது. அப்போது சூர்யவன்ஷி வேகமாக ரன்கள் சேர்த்து, குறுகிய நேரத்திலேயே குறிப்பிடத்தக்க ஸ்கோரை எட்டியிருந்தார்.
இந்தப் போட்டியில் தெற்கு மண்டல அணியும் சாதாரண அணியாக இல்லை. நடப்பு சாம்பியனான அந்த அணி, கடந்த தொடரில் பெற்ற வெற்றியை மீண்டும் தொடர வேண்டும் என்ற நோக்கத்துடன் களமிறங்கியுள்ளது. கேப்டன் திலக் வர்மா அரையிறுதியில் பேட்டிங் மற்றும் தலைமைப் பொறுப்பில் சிறப்பான பங்களிப்பை வழங்கி அணியை இறுதிப்போட்டிக்கு அழைத்து வந்துள்ளார். வடக்கு மண்டலத்துக்கு எதிரான அரையிறுதியில் அவர் முதல் இன்னிங்ஸில் சதம் அடித்ததுடன், இரண்டாவது இன்னிங்ஸிலும் அரைசதம் விளாசி வெற்றியை உறுதி செய்தார். தெற்கு மண்டலத்தின் பந்துவீச்சிலும் அனுபவம் அதிகமாக உள்ளது. இந்திய அணிக்காக விளையாடிய முகமது சிராஜ் இந்தப் போட்டியில் இடம்பெற்றிருப்பது அந்த அணியின் வேகப்பந்துவீச்சுக்கு கூடுதல் வலிமையை அளிக்கிறது. சமீபத்திய டெஸ்ட் தொடரில் சிறப்பாக செயல்பட்ட தேவ்தத் படிக்கலும் தெற்கு மண்டல அணியில் இணைந்துள்ளார். அதேபோல், ரிக்கி புய், நாராயண் ஜெகதீசன் உள்ளிட்ட முதல் தர கிரிக்கெட்டில் அனுபவம் பெற்ற வீரர்களும் அணியின் பேட்டிங் வரிசையில் உள்ளனர்.
மறுபுறம், இஷான் கிஷன் தலைமையிலான கிழக்கு மண்டலம் இந்த முறை கோப்பையை வெல்லும் முனைப்பில் உள்ளது. மத்திய மண்டலத்துக்கு எதிரான அரையிறுதியில் 159 ரன்கள் இலக்கை துரத்தியபோது, அணியின் கேப்டன் இஷான் கிஷன் ஆட்டத்தை சிறப்பாக முடித்தார். அவர் ஆட்டமிழக்காமல் 39 ரன்கள் எடுத்தது கிழக்கு மண்டலத்தின் வெற்றியில் முக்கிய பங்காற்றியது. முகமது ஷமி மற்றும் முகேஷ் குமார் ஆகியோரின் பந்துவீச்சும் அந்த வெற்றிக்கு வலுவான அடித்தளத்தை அமைத்தது. குறிப்பாக முகமது ஷமியின் மீதான எதிர்பார்ப்பும் இந்த இறுதிப்போட்டியில் அதிகமாக உள்ளது. 36 வயதிலும் அவரது உடற்தகுதி, அர்ப்பணிப்பு மற்றும் இந்திய அணிக்கு மீண்டும் திரும்ப வேண்டும் என்ற ஆர்வம் குறையவில்லை என்று இஷான் கிஷன் சமீபத்தில் பாராட்டியிருந்தார். முதல் தர கிரிக்கெட்டில் தனது 100வது போட்டியை நெருங்கியுள்ள ஷமி, கிழக்கு மண்டலத்தின் பந்துவீச்சில் முக்கிய ஆயுதமாக உள்ளார்.
இதனால் இந்த இறுதிப்போட்டி வெறும் ஒரு உள்ளூர் கோப்பைக்கான போட்டியாக மட்டும் பார்க்கப்படவில்லை. இந்திய அணியின் அடுத்த கட்டத் தேர்வுகளுக்கான கவனத்தையும் இந்த ஆட்டம் ஈர்த்துள்ளது. குறிப்பாக சூர்யவன்ஷி நீண்ட வடிவ கிரிக்கெட்டில் எவ்வாறு செயல்படுகிறார், திலக் வர்மா தனது தலைமை மற்றும் பேட்டிங் திறனை எவ்வாறு தொடர்கிறார், இஷான் கிஷன் மீண்டும் தனது சிறந்த நிலையை எவ்வாறு வெளிப்படுத்துகிறார் என்பதெல்லாம் ரசிகர்களின் கவனத்தில் உள்ளது. இந்திய அணியின் தேர்வுக்குழுத் தலைவர் அஜித் அகர்கரும் இந்தப் போட்டியை நேரில் பார்வையிட உள்ளதாக தகவல் வெளியாகியுள்ளது. சென்னை சேப்பாக்கத்தில் தொடங்கியுள்ள இந்தப் போட்டி, அனுபவமும் இளமையும் கலந்த ஒரு சுவாரஸ்யமான கிரிக்கெட் மோதலாக உருவெடுத்துள்ளது. ஒரு பக்கம் கோப்பையை மீண்டும் கைப்பற்ற விரும்பும் தெற்கு மண்டலம்; மறுபக்கம் நீண்ட இடைவெளிக்குப் பிறகு துலீப் டிராபியை வெல்ல முயலும் கிழக்கு மண்டலம். இதனால் அடுத்தடுத்த நாட்களில் ஆட்டம் எந்த திசையில் நகரும் என்பதுதான் இப்போது ரசிகர்களின் எதிர்பார்ப்பாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்