ஐபிஎல் 2026 இறுதிப் போட்டியில் ராயல் சேலஞ்சர்ஸ் பெங்களூருவிடம் தோல்வியைத் தழுவிய குஜராத் டைட்டன்ஸ் அணிக்கு, அந்த இரவு மேலும் ஒரு பேரதிர்ச்சியாக முடிந்தது. நரேந்திர மோடி ஸ்டேடியத்திலிருந்து ஹோட்டலுக்குத் திரும்பிக் கொண்டிருந்தபோது, வீரர்களின் பஸ்ஸில் திடீரென மின்சாரக் கோளாறு (Short Circuit) ஏற்பட்டு புகை கிளம்பியது. இதனால் பரபரப்படைந்த வீரர்கள் மற்றும் ஊழியர்கள் உடனடியாகப் பஸ்ஸிலிருந்து வெளியேற்றப்பட்டனர். அதிர்ஷ்டவசமாக யாருக்கும் எந்தக் காயமும் ஏற்படவில்லை, அனைவரும் பாதுகாப்பாக மீட்கப்பட்டனர். இருப்பினும், இந்தச் சம்பவத்தால் வீரர்கள் சாலையோரம் சுமார் ஒரு மணி நேரம் காத்திருக்க வேண்டிய சூழல் ஏற்பட்டது.
ஏற்கெனவே இறுதிப் போட்டியில் 5 விக்கெட் வித்தியாசத்தில் தோல்வியடைந்து, இரண்டாவது முறையாக ஐபிஎல் கோப்பையை வெல்லும் வாய்ப்பை இழந்திருந்த அந்த அணிக்கு, இந்த விபத்து கூடுதல் மன உளைச்சலைத் தந்தது. கடந்த சில நாட்களாகவே குஜராத் அணிக்குத் தொடர் பயணச் சிக்கல்கள் நீடித்து வருகின்றன. தர்மசாலாவிலிருந்து முல்லன்பூர் சென்றது, பின்னர் மோசமான வானிலையால் அகமதாபாத் பயணத்தில் ஏற்பட்ட தாமதம் எனப் பல இன்னல்களைச் சந்தித்த பிறகே அவர்கள் இறுதிப் போட்டிக்கு வந்தனர்.
இந்தத் தொடர் பயணங்கள் மற்றும் பயணக் களைப்புதான் இறுதிப் போட்டியில் அணியின் சொதப்பலான ஆட்டத்திற்குக் காரணமா என்ற கேள்விக்கு, குஜராத் அணியின் கிரிக்கெட் இயக்குனர் விக்ரம் சோலங்கி பதில் அளித்துள்ளார். பெங்களூரு அணி நன்றாக விளையாடியதை ஒப்புக்கொள்ள வேண்டும் என்றும், வீரர்களின் களைப்பை மட்டும் தோல்விக்குக் காரணமாகச் சொல்ல விரும்பவில்லை என்றும் அவர் கூறினார்.
அணியின் ரன் குவிப்பு குறைவாக இருந்ததை ஏற்றுக்கொண்ட அவர், அணியினர் தற்காப்பு ஆட்டத்தில் சிறப்பாகப் போராடினார்கள் என்றும் தெரிவித்தார். விபத்து நடந்தபோது வீரர்கள் சாலையோரம் நின்றுகொண்டிருந்த புகைப்படங்கள் மற்றும் வீடியோக்கள் சமூக வலைதளங்களில் வைரலாகி வருகின்றன. வீரர்களுக்கு மாற்று ஏற்பாடுகள் செய்யப்பட்டு ஹோட்டலுக்கு அழைத்துச் செல்லப்பட்டனர். கிரிக்கெட் களத்தில் சந்தித்த தோல்வியும், அதைத் தொடர்ந்து நடந்த எதிர்பாராத விபத்தும் குஜராத் டைட்டன்ஸ் அணிக்கு இந்த சீசன் மறக்க முடியாத கசப்பான அனுபவமாக மாறியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.