ஐபிஎல் 2026 தொடரில் இருந்து ஐந்து முறை சாம்பியனான மும்பை இந்தியன்ஸ் அணி வெளியேறியுள்ள நிலையில், அந்த அணியின் கேப்டன் ஹர்திக் பாண்டியாவின் சமூக வலைதள நடவடிக்கை ஒன்று தற்போது மிகப்பெரிய சர்ச்சையை ஏற்படுத்தியுள்ளது. கடந்த ஞாயிற்றுக்கிழமை ராயல் சேலஞ்சர்ஸ் பெங்களூரு அணிக்கு எதிரான தோல்விக்குப் பிறகு, ஹர்திக் பாண்டியா மும்பை இந்தியன்ஸ் அணியின் அதிகாரப்பூர்வ இன்ஸ்டாகிராம் பக்கத்தை 'அன்ஃபாலோ' செய்ததாகத் தகவல்கள் பரவி வருகின்றன. பின்னர் அவர் மீண்டும் அந்தப் பக்கத்தைப் பின்தொடரத் தொடங்கினாலும், இந்தச் செயல் ரசிகர்கள் மற்றும் கிரிக்கெட் விமர்சகர்கள் இடையே கடும் கொந்தளிப்பை ஏற்படுத்தியுள்ளது.
இது தொடர்பாக அதிகாரப்பூர்வமான ஆதாரங்கள் எதுவும் இல்லை என்றாலும், கடந்த சில நாட்களாக சமூக வலைதளங்களில் ஹர்திக் பாண்டியாவிற்கு எதிராக ரசிகர்கள் கண்டனக் குரல்களை எழுப்பி வருகின்றனர். காயம் காரணமாக கடந்த இரண்டு போட்டிகளில் விளையாடாத ஹர்திக், அணியின் தோல்வியால் ஏற்பட்ட அதிருப்தியை இப்படி வெளிப்படுத்தியது முறையற்றது என்று ரசிகர்கள் விமர்சிக்கின்றனர். குறிப்பாக, அணி இக்கட்டான சூழலில் இருக்கும்போது ஒரு கேப்டன் இப்படிச் செய்வது அந்த அணிக்குச் செய்யும் மிகப்பெரிய அவமரியாதை என்று பலரும் கருத்து தெரிவித்து வருகின்றனர்.
இந்த விவகாரம் குறித்து இங்கிலாந்து அணியின் முன்னாள் கேப்டன்கள் மைக்கேல் வாகன் மற்றும் அலஸ்டைர் குக் ஆகியோர் தங்களது 'ஸ்டிக் டு கிரிக்கெட்' பாட்காஸ்டில் காரசாரமாக விவாதித்துள்ளனர். ஹர்திக் பாண்டியாவின் இந்தச் செயல் ஒரு தரக்குறைவான வேலை (Low Blow) என்று அவர்கள் சாடியுள்ளனர். நவீன காலத்தில் ஒரு அணியை சமூக வலைதளத்தில் அன்ஃபாலோ செய்வது என்பது அந்த அணிக்குத் தரும் மிகப்பெரிய அடியாகக் கருதப்படுகிறது என்று குக் குறிப்பிட்டுள்ளார். மேலும், ஆர்சிபி அணிக்கு எதிராக கடைசி பந்தில் மும்பை தோற்ற பிறகு ஹர்திக் இப்படி நடந்துகொண்டது அந்த ஃபிரான்சைஸிக்கே செய்த மிகப்பெரிய துரோகம் என்று மைக்கேல் வாகன் விமர்சித்துள்ளார்.
ஹர்திக் பாண்டியாவின் காயம் உண்மையானதுதானா என்ற சந்தேகம் ஒருபுறம் இருக்க, மும்பை இந்தியன்ஸ் அணியின் இந்த வருட செயல்பாடு ஐபிஎல் வரலாற்றிலேயே மிக மோசமான ஒன்று என்று வாகன் விளாசியுள்ளார். குஜராத் டைட்டன்ஸ் அணிக்குச் சென்று கோப்பையை வென்று கொடுத்த ஹர்திக்கை, மிகப்பெரிய தொகை கொடுத்து மும்பை மீண்டும் வாங்கியது. ஆனால் ரோஹித் சர்மா, சூர்யகுமார் யாதவ், ஜஸ்பிரித் பும்ரா போன்ற உலகத்தரம் வாய்ந்த வீரர்கள் இருந்தும் மும்பை அணி இப்படிச் சொதப்பியது ஜீரணிக்க முடியாத ஒன்று என்று அவர் கூறியுள்ளார்.
திறமையான வீரர்கள் இருந்தும் ஒரு அணி இவ்வளவு மோசமாக விளையாடுவதை தான் பார்த்ததே இல்லை என்றும், இதுதான் ஐபிஎல் வரலாற்றின் மிக மோசமான பெர்ஃபார்மன்ஸ் என்றும் வாகன் கடுமையாகப் பேசியுள்ளார். இங்கிலாந்து முன்னாள் வீரர்களான டேவிட் லாயிட் மற்றும் பில் டப்னெல் ஆகியோரும் ஹர்திக் பாண்டியா மற்றும் மும்பை இந்தியன்ஸ் அணியின் இந்தச் சீசன் செயல்பாடுகளைக் கிண்டல் செய்துள்ளனர். கேப்டனுக்கும் அணி நிர்வாகத்திற்கும் இடையே ஏதோ சரியில்லை என்பதையே இந்த இன்ஸ்டாகிராம் சர்ச்சை காட்டுவதாக கிரிக்கெட் வட்டாரங்கள் கிசுகிசுக்கின்றன.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.