இந்திய ஹாக்கி அணிக்கு 2026 உலகக் கோப்பை தொடர் ஒரு சாதாரண சர்வதேச போட்டியாக இல்லை. பல ஆண்டுகளாக உலகக் கோப்பை அரங்கில் முழுமையான வெற்றியை எதிர்பார்த்து வரும் இந்திய அணி, இந்த முறை அந்த நீண்ட காத்திருப்புக்கு முற்றுப்புள்ளி வைக்க வேண்டும் என்ற இலக்குடன் களமிறங்குகிறது. பெல்ஜியம் மற்றும் நெதர்லாந்து இணைந்து நடத்தும் இந்த உலகக் கோப்பை ஆகஸ்ட் 15 முதல் 30ஆம் தேதி வரை நடைபெறுகிறது. இதில் இந்தியாவின் முதல் போட்டி வேல்ஸ் அணிக்கு எதிராக நேற்று நடைபெற்றது. ஆம்ஸ்டெல்வீனில் உள்ள வாக்னர் மைதானத்தில் நடைபெறும் இந்த ஆட்டம் இந்திய நேரப்படி மாலை 4.30 மணிக்கு தொடங்கியது.
ஹர்மன்ப்ரீத் சிங் தலைமையிலான இந்திய அணி, இந்த உலகக் கோப்பைக்காக அனுபவமும் இளமைத் திறமையும் கலந்த 20 வீரர்கள் கொண்ட அணியுடன் வந்துள்ளது. அணியின் கேப்டனாக மட்டுமின்றி பெனால்டி கார்னர் வாய்ப்புகளை கோல்களாக மாற்றுவதிலும் ஹர்மன்ப்ரீத்தின் பங்கு முக்கியமானதாக இருக்கும். மிட்ஃபீல்டில் ஹார்திக் சிங், அனுபவம் வாய்ந்த மன்ப்ரீத் சிங், விவேக் பிரசாத் போன்ற வீரர்கள் அணியின் வேகத்தையும் பந்துக் கட்டுப்பாட்டையும் தீர்மானிக்கக்கூடியவர்களாக உள்ளனர். முன்களத்தில் அபிஷேக், சுக்ஜீத் சிங், மந்தீப் சிங் உள்ளிட்ட வீரர்களின் ஒருங்கிணைப்பு இந்தியாவின் கோல் வாய்ப்புகளை அதிகரிக்கக்கூடும்.
இந்தப் போட்டிக்கு முன்பான இந்திய அணியின் சமீபத்திய செயல்பாடுகளும் நம்பிக்கை அளிக்கும் வகையில் அமைந்துள்ளன. குறிப்பாக எஃப்ஐஹெச் புரோ லீக்கின் ஐரோப்பிய சுற்றில் உலக சாம்பியனான ஜெர்மனி மற்றும் ஒலிம்பிக் சாம்பியனான நெதர்லாந்து அணிகளுக்கு எதிராக இந்தியா குறிப்பிடத்தக்க வெற்றிகளைப் பதிவு செய்துள்ளது. இங்கிலாந்துக்கு எதிரான ஆட்டங்களிலும் இந்திய அணி கடுமையான போட்டியை வழங்கியுள்ளது. இதனால் உலகக் கோப்பை தொடங்கும் நேரத்தில் அணியின் நம்பிக்கை அதிகரித்துள்ளதாக பார்க்கப்படுகிறது.
இந்தியாவுக்கு வேல்ஸ் எதிரணி என்றாலும், அந்த அணியை எளிதாகக் கருத முடியாது. வேல்ஸ் தனது முதல் உலகக் கோப்பை போட்டியை 2023ஆம் ஆண்டு இந்தியாவில் விளையாடியது. அந்தத் தொடரில் இந்தியாவுக்கு எதிரான ஆட்டத்தில் வேல்ஸ் கடுமையான சவாலை அளித்தது. இந்தியா 4-2 என்ற கணக்கில் வெற்றி பெற்றாலும், ஒரு கட்டத்தில் இரு அணிகளும் 2-2 என்ற நிலையில் இருந்தன. வேல்ஸ் அணியின் அனுபவம் வாய்ந்த வீரர் காரெத் ஃபர்லாங் அந்தப் போட்டியிலும் கோல் அடித்திருந்தார். 2026ஆம் ஆண்டிலும் அவர் அந்த அணியின் முக்கிய வீரர்களில் ஒருவராக இருப்பதால், இந்தியாவின் தடுப்பாட்டம் அவரை கட்டுப்படுத்துவதில் கூடுதல் கவனம் செலுத்த வேண்டியிருக்கும்.
இந்தியா மற்றும் வேல்ஸ் அணிகளுக்கு இடையேயான முந்தைய போட்டிகளின் புள்ளிவிவரங்களும் இந்தியாவுக்கு சாதகமாக உள்ளன. இரு அணிகளும் இதுவரை நான்கு முறை மோதிய நிலையில், அந்த அனைத்து போட்டிகளிலும் இந்தியாவே வெற்றி பெற்றுள்ளது. காமன்வெல்த் போட்டிகளில் நடைபெற்ற மோதல்களையும் சேர்த்து பார்க்கும்போது இந்தியாவின் ஆதிக்கம் தெளிவாகத் தெரிகிறது. உலகக் கோப்பை அரங்கில் இரு அணிகளும் இதற்கு முன்பு ஒருமுறை மட்டுமே சந்தித்துள்ளன. அந்த 2023 போட்டியிலும் இந்தியா 4-2 என்ற கணக்கில் வெற்றி பெற்றது. இருப்பினும், பழைய சாதனைகள் மட்டும் புதிய போட்டியில் வெற்றியை உறுதி செய்யாது என்பதால் இந்திய அணி முழு கவனத்துடன் விளையாட வேண்டியிருக்கிறது.
இந்த உலகக் கோப்பையில் இந்தியா இடம்பெற்றுள்ள டி பிரிவில் வேல்ஸ் மட்டுமல்லாமல் இங்கிலாந்து மற்றும் பாகிஸ்தானும் உள்ளன. எனவே முதல் போட்டியிலேயே மூன்று புள்ளிகளைப் பெறுவது அடுத்த கட்டத்திற்கான இந்தியாவின் பயணத்தில் முக்கியத்துவம் பெறுகிறது. ஆகஸ்ட் 17ஆம் தேதி இங்கிலாந்தையும், ஆகஸ்ட் 19ஆம் தேதி பாகிஸ்தானையும் இந்தியா எதிர்கொள்ள உள்ளது. குறிப்பாக இந்த இரண்டு போட்டிகளும் அதிக அழுத்தம் கொண்டதாக இருக்கும் என்பதால், வேல்ஸுக்கு எதிரான தொடக்க ஆட்டத்தில் நல்ல தொடக்கம் பெறுவது அணிக்கு சாதகமாக அமையும்.
2026 உலகக் கோப்பையின் போட்டி அமைப்பிலும் மாற்றம் செய்யப்பட்டுள்ளது. வழக்கமான காலிறுதி சுற்றுக்கு பதிலாக, முதல் கட்டத்தில் ஒவ்வொரு பிரிவிலும் முன்னிலை பெறும் அணிகள் அடுத்த சுற்றுக்குச் செல்லும் வகையில் புதிய நடைமுறை அறிமுகப்படுத்தப்பட்டுள்ளது. அடுத்த கட்டத்திலும் போட்டிகள் நடைபெற்று, அதில் முன்னிலை வகிக்கும் அணிகள் அரையிறுதிக்கு தகுதி பெறும். இதனால் ஆரம்ப சுற்றில் பெறப்படும் ஒவ்வொரு புள்ளிக்கும் கூடுதல் முக்கியத்துவம் கிடைக்கிறது. ஒரு போட்டியில் ஏற்படும் தவறு அடுத்த கட்டத்திலும் தாக்கத்தை ஏற்படுத்தக்கூடிய சூழல் இருப்பதால், இந்தியா தொடக்கத்திலிருந்தே நிலையான ஆட்டத்தை வெளிப்படுத்த வேண்டிய கட்டாயத்தில் உள்ளது.
இந்தியாவின் உலகக் கோப்பை வரலாற்றைப் பார்க்கும்போது, 1975ஆம் ஆண்டு மலேசியாவின் கோலாலம்பூரில் பாகிஸ்தானை வீழ்த்தி சாம்பியன் பட்டம் வென்றதே அந்த அணியின் ஒரே உலகக் கோப்பை வெற்றியாக உள்ளது. அதன்பிறகு பல தலைமுறைகள் இந்திய ஹாக்கியில் உருவாகியிருந்தாலும், உலகக் கோப்பை பட்டம் மீண்டும் கைக்கு வரவில்லை. ஒலிம்பிக் போட்டிகளில் இந்தியா சமீப ஆண்டுகளில் பெற்ற முன்னேற்றம் புதிய நம்பிக்கையை உருவாக்கியுள்ளது. இப்போது அந்த முன்னேற்றத்தை உலகக் கோப்பை மேடையிலும் நிரூபிக்க வேண்டிய நேரம் வந்துள்ளது.
அதனால், வேல்ஸுக்கு எதிரான இன்றைய போட்டி இந்தியாவுக்கு தொடக்க ஆட்டம் என்ற வரையறையைத் தாண்டி முக்கியத்துவம் பெறுகிறது. வெற்றியுடன் போட்டியைத் தொடங்கி, அணியின் தன்னம்பிக்கையை உயர்த்தி, அடுத்தடுத்த கடினமான ஆட்டங்களுக்கு வலுவான அடித்தளம் அமைப்பதே ஹர்மன்ப்ரீத் சிங் தலைமையிலான அணியின் உடனடி நோக்கமாக இருக்கும். 51 ஆண்டுகளாக நீடிக்கும் உலகக் கோப்பை காத்திருப்பை முடிவுக்குக் கொண்டு வர வேண்டும் என்ற பெரிய இலக்கின் முதல் படி இன்று ஆம்ஸ்டெல்வீனில் தொடங்குகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்