இந்திய கிரிக்கெட் ரசிகர்கள் ஆவலுடன் எதிர்பார்த்துக் கொண்டிருக்கும் ACC ரைசிங் ஸ்டார்ஸ் ஆசியக் கோப்பை தொடருக்கு முன்னதாக இந்தியா A அணியில் முக்கியமான மாற்றங்கள் செய்யப்பட்டுள்ளன. காயம் காரணமாக ராஜத் படிதார் அணியிலிருந்து விலகியுள்ள நிலையில், அவருக்குப் பதிலாக இளம் வீரர் ஆயுஷ் பதோனி அணியில் சேர்க்கப்பட்டுள்ளார். மேலும், அணியின் துணைக் கேப்டனாக இருந்த ராஜத் படிதார் விலகியதால், அந்தப் பொறுப்பு அதிரடி பேட்ஸ்மேன் ரிங்கு சிங்கிடம் ஒப்படைக்கப்பட்டுள்ளது. இந்த அறிவிப்பை இந்திய கிரிக்கெட் கட்டுப்பாட்டு வாரியம் (பிசிசிஐ) வெளியிட்டுள்ளது.
கத்தார் நாட்டின் தோஹாவில் நவம்பர் 19ஆம் தேதி முதல் 29ஆம் தேதி வரை ரைசிங் ஸ்டார்ஸ் ஆசியக் கோப்பை கிரிக்கெட் தொடர் நடைபெற உள்ளது. மொத்தம் எட்டு அணிகள் பங்கேற்கும் இந்தப் போட்டியில் இளம் வீரர்களுக்கு தங்களது திறமையை வெளிப்படுத்துவதற்கான முக்கியமான வாய்ப்பு கிடைத்துள்ளது. இந்தியா A அணிக்கு திலக் வர்மா கேப்டனாக நியமிக்கப்பட்டிருந்தார். ராஜத் படிதார் துணைக் கேப்டனாக அறிவிக்கப்பட்டிருந்த நிலையில், தற்போது ஏற்பட்டுள்ள காயம் காரணமாக அவர் தொடரிலிருந்து விலகியுள்ளார்.
ராஜத் படிதார் தனது உடல்நிலை மற்றும் காயம் தொடர்பான பிரச்சினைகளைச் சரிசெய்து கொள்ள வேண்டியிருப்பதால், 50 ஓவர் போட்டிகளுக்கான தேர்வில் தன்னைப் பரிசீலிக்க வேண்டாம் என்று பிசிசிஐயிடம் தெரிவித்துள்ளார். இதுகுறித்து பிசிசிஐ வெளியிட்ட அறிக்கையில், ராஜத் படிதார் தனது தற்போதைய காயங்களைக் கவனித்துக்கொள்ள வேண்டியிருப்பதால், 50 ஓவர் போட்டிகளுக்கான தேர்வில் தன்னைச் சேர்க்க வேண்டாம் என்று கேட்டுக்கொண்டதாகத் தெரிவிக்கப்பட்டுள்ளது. இதையடுத்து அவர் ரைசிங் ஸ்டார்ஸ் ஆசியக் கோப்பை அணியிலிருந்து நீக்கப்பட்டுள்ளார்.
அவருக்குப் பதிலாக டெல்லி அணியைச் சேர்ந்த இளம் பேட்ஸ்மேன் ஆயுஷ் பதோனி தேர்வு செய்யப்பட்டுள்ளார். ஐபிஎல் தொடரில் லக்னோ சூப்பர் ஜெயன்ட்ஸ் அணிக்காக விளையாடி வரும் பதோனி, தனது அதிரடி பேட்டிங் மற்றும் ஆட்டத்தின் சூழலுக்கு ஏற்ப விளையாடும் திறன் மூலம் கவனம் பெற்றவர். நடுவரிசையில் களமிறங்கி அணிக்குத் தேவையான ரன்களைச் சேர்க்கும் திறன் கொண்ட அவர், இந்தத் தொடரில் இந்தியா A அணிக்கு கூடுதல் பலமாக இருப்பார் என்று எதிர்பார்க்கப்படுகிறது.
குறிப்பாக, உள்ளூர் கிரிக்கெட் போட்டிகளில் பதோனி சிறப்பான ஆட்டத்தை வெளிப்படுத்தி வருகிறார். ரஞ்சி கோப்பை தொடரில் டெல்லி அணிக்காக விளையாடிய அவர், நான்கு போட்டிகளில் 559 ரன்கள் குவித்துள்ளார். இதில் இரண்டு இரட்டைச் சதங்களும் அடங்கும். இந்தச் சிறப்பான ஆட்டம் அவருக்கு இந்தியா A அணியில் இடம்பிடிக்க உதவியுள்ளது. தற்போது கிடைத்துள்ள வாய்ப்பை அவர் எவ்வாறு பயன்படுத்திக் கொள்கிறார் என்பதைப் பார்க்க ரசிகர்கள் ஆர்வமாக உள்ளனர்.
இதற்கிடையில், ராஜத் படிதார் விலகியதால் காலியான துணைக் கேப்டன் பொறுப்பு ரிங்கு சிங்கிடம் வழங்கப்பட்டுள்ளது. இந்திய அணியின் அதிரடி பேட்ஸ்மேன்களில் ஒருவரான ரிங்கு சிங், அழுத்தமான சூழல்களிலும் நிதானமாக விளையாடி அணியை வெற்றிப் பாதைக்கு அழைத்துச் செல்லும் திறன் கொண்டவர். சர்வதேச டி20 போட்டிகளிலும் ஐபிஎல் தொடரிலும் தனது ஆட்டத்தின் மூலம் ரசிகர்களிடம் தனி இடத்தைப் பிடித்துள்ளார். தற்போது இந்தியா A அணியின் துணைக் கேப்டனாக நியமிக்கப்பட்டிருப்பது அவருக்கு மற்றொரு முக்கியமான பொறுப்பாக அமைந்துள்ளது.
இந்தத் தொடரில் இந்தியா A அணி குரூப் பி பிரிவில் இடம்பெற்றுள்ளது. இந்தியாவுடன் பாகிஸ்தான் A, ஐக்கிய அரபு அமீரகம் A மற்றும் நேபாளம் A அணிகளும் இந்தப் பிரிவில் உள்ளன. குரூப் A பிரிவில் வங்கதேசம் A, இலங்கை A, ஆப்கானிஸ்தான் A மற்றும் ஹாங்காங் அணிகள் இடம்பெற்றுள்ளன. ஒவ்வொரு பிரிவிலும் முதல் இரண்டு இடங்களைப் பிடிக்கும் அணிகள் அரையிறுதிக்குத் தகுதி பெறும்.
இந்திய அணியின் முதல் போட்டி நவம்பர் 20ஆம் தேதி நேபாளம் A அணிக்கு எதிராக நடைபெற உள்ளது. இதைத்தொடர்ந்து நவம்பர் 22ஆம் தேதி கிரிக்கெட் ரசிகர்கள் ஆவலுடன் எதிர்பார்க்கும் இந்தியா A - பாகிஸ்தான் A அணிகள் மோதும் போட்டி நடைபெறுகிறது. நவம்பர் 24ஆம் தேதி ஐக்கிய அரபு அமீரக அணியை இந்தியா எதிர்கொள்ள உள்ளது. அரையிறுதிப் போட்டிகள் நவம்பர் 26 மற்றும் 27ஆம் தேதிகளிலும், இறுதிப்போட்டி நவம்பர் 29ஆம் தேதியும் நடைபெற உள்ளது.
திலக் வர்மா தலைமையிலான இந்தியா A அணியில் அபிஷேக் சர்மா, இளம் வீரர் வைபவ் சூர்யவன்ஷி, பிரப்சிம்ரன் சிங், ரிங்கு சிங் உள்ளிட்ட பல திறமையான வீரர்கள் இடம்பெற்றுள்ளனர். மேலும், குமார் குஷாக்ரா, சூர்யான்ஷ் ஷெட்கே, ஷாபாஸ் அகமது, விப்ராஜ் நிகம், ஹர்ஷ் துபே, தனுஷ் கோட்டியன், ஹர்ஷித் ராணா, பிரின்ஸ் யாதவ், அர்ஷத் கான் ஆகியோரும் அணியில் உள்ளனர். தற்போது ஆயுஷ் பதோனியும் இணைந்துள்ளதால் அணியின் பேட்டிங் வரிசைக்கு கூடுதல் வலிமை கிடைத்துள்ளது.
ராஜத் படிதார் காயத்தால் விலகியிருப்பது அணிக்கு பின்னடைவாக இருந்தாலும், அவருக்குப் பதிலாகக் கிடைத்த வாய்ப்பை ஆயுஷ் பதோனி பயன்படுத்திக் கொள்வார் என்ற எதிர்பார்ப்பு உள்ளது. அதேபோல் துணைக் கேப்டன் பொறுப்பைப் பெற்றுள்ள ரிங்கு சிங் தனது அனுபவத்தின் மூலம் அணிக்கு வழிகாட்டுவார் என ரசிகர்கள் நம்புகின்றனர். இந்திய இளம் வீரர்களின் திறமையை வெளிப்படுத்தும் முக்கியமான தொடராக இந்த ரைசிங் ஸ்டார்ஸ் ஆசியக் கோப்பை அமையும் என்பதில் சந்தேகமில்லை.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.