சிஎஸ்கே ரசிகர்களுக்கு ஷாக் நியூஸ்.. குஜராத் வெற்றியால் பிளே ஆஃப் ரேசில் நீடிக்கும் சிக்கல்!

ஐபிஎல் 2026 தொடரின் விறுவிறுப்பான கட்டத்தில், சன்ரைசர்ஸ் ஹைதராபாத் அணிக்கு எதிரான ஆட்டத்தில் குஜராத் டைட்டன்ஸ் அணி 82 ரன்கள் வித்தியாசத்தில் மிகப்பெரிய வெற்றியைப் பெற்றுள்ளது. சுப்மன் கில் தலைமையிலான குஜராத் அணி, இந்த வெற்றியின் மூலம் 12 போட்டிகளில் 16 புள்ளிகளுடன் பிளே ஆஃப் சுற்றுக்குச் செல்வதை கிட்டத்தட்ட உறுதி செய்துள்ளது. வழக்கமாக 16 புள்ளிகள் என்பது அடுத்த சுற்றுக்குச் செல்ல போதுமான ஒரு மேஜிக் எண்ணாகக் கருதப்படுவதால், குஜராத் அணியின் வாய்ப்பு தற்போது 94.9 சதவீதமாக உயர்ந்துள்ளது. அதே சமயம், இந்த வெற்றியால் மற்ற அணிகளின் பிளே ஆஃப் வாய்ப்புகள் கடும் சரிவையும், சிறு மாற்றங்களையும் சந்தித்துள்ளன.

முன்னதாக 80 சதவீத பிளே ஆஃப் வாய்ப்புடன் வலுவாக இருந்த ஹைதராபாத் அணி, இந்தத் தோல்விக்குப் பிறகு 65.7 சதவீதமாகச் சரிந்துள்ளது. பெங்களூரு ராயல் சேலஞ்சர்ஸ் (RCB) அணியின் வாய்ப்பு 80.1 சதவீதத்திலிருந்து 79.7 சதவீதமாகச் சற்று குறைந்துள்ளது. சென்னை சூப்பர் கிங்ஸ் (CSK) அணியைப் பொறுத்தவரை, பிளே ஆஃப் செல்வதற்கான வாய்ப்பு 42.7 சதவீதத்திலிருந்து மிகச் சிறிய அளவில் உயர்ந்து 42.8 சதவீதமாக உள்ளது. பஞ்சாப் கிங்ஸ் அணியின் வாய்ப்பு 62.7 சதவீதமாக உயர்ந்துள்ளது. இந்த ஒரு போட்டி புள்ளிப் பட்டியலில் மிகப்பெரிய தாக்கத்தை ஏற்படுத்தியுள்ளது.

நேற்று நடைபெற்ற போட்டியில், முதலில் பேட்டிங் செய்த குஜராத் டைட்டன்ஸ் அணிக்கு சாய் சுதர்சன் (61 ரன்கள்) மற்றும் வாஷிங்டன் சுந்தர் (50 ரன்கள்) ஆகியோரின் அரைசதங்கள் கை கொடுத்தன. கடினமான ஆடுகளத்தில் போராடி விளையாடிய குஜராத் அணி 7 விக்கெட் இழப்பிற்கு 168 ரன்களைச் சேர்த்தது. ஹைதராபாத் தரப்பில் பிரபுல் ஹிங்கே 2 விக்கெட்டுகளைக் கைப்பற்றினார். கேப்டன் பாட் கம்மின்ஸ் மிகவும் சிக்கனமாகப் பந்துவீசி ஒரு விக்கெட்டை வீழ்த்தினார். 169 ரன்கள் எடுத்தால் வெற்றி என்ற இலக்குடன் களம் இறங்கிய ஹைதராபாத் அணிக்கு ஆரம்பமே அதிர்ச்சியாக அமைந்தது.

குஜராத் அணியின் வேகப்பந்து வீச்சாளர் ககிசோ ரபாடா மற்றும் ஜேசன் ஹோல்டர் ஆகியோரின் அபாரமான பந்துவீச்சில் ஹைதராபாத் அணி நிலைகுலைந்தது. முகமது சிராஜ் தனது முதல் ஓவரிலேயே விக்கெட் மெய்டன் எடுத்து ஹைதராபாத் அணியை மிரட்டினார். அதன்பின் ரபாடா தனது அனல் பறக்கும் பந்துவீச்சால் டாப் ஆர்டர் பேட்ஸ்மேன்களை வரிசையாக வெளியேற்றினார். டிராவிஸ் ஹெட், அபிஷேக் சர்மா மற்றும் இஷான் கிஷன் என முன்னணி வீரர்கள் சொற்ப ரன்களில் ஆட்டமிழந்தனர். பவர்பிளே முடிவதற்குள்ளேயே 4 விக்கெட்டுகளை இழந்து ஹைதராபாத் தடுமாறியது.

நடுவரிசை வீரர்களும் குஜராத் அணியின் பந்துவீச்சை எதிர்கொள்ள முடியாமல் திணறினர். ஹென்ரிச் கிளாசன் மற்றும் நிதிஷ் குமார் ரெட்டி ஆகியோர் ஹோல்டர் பந்துவீச்சில் கேட்ச் கொடுத்து வெளியேறினர். இறுதியில் 14.5 ஓவர்களிலேயே சன்ரைசர்ஸ் ஹைதராபாத் அணி வெறும் 86 ரன்களுக்கு ஆல்-அவுட் ஆனது. அந்த அணியில் கேப்டன் கம்மின்ஸ் எடுத்த 19 ரன்களே அதிகபட்சமாகும். குஜராத் தரப்பில் ரபாடா மற்றும் ஹோல்டர் தலா 3 விக்கெட்டுகளைக் கைப்பற்றி வெற்றியை எளிதாக்கினர். பிரசித் கிருஷ்ணா 2 விக்கெட்டுகளை வீழ்த்தினார்.

தொடர்ச்சியாக ஐந்தாவது வெற்றியைப் பெற்றுள்ள குஜராத் டைட்டன்ஸ் அணி, தற்போது புள்ளிப் பட்டியலில் முதலிடத்திற்கு முன்னேறியுள்ளது. 2022-ஆம் ஆண்டின் சாம்பியனான குஜராத் அணி, மீண்டும் ஒருமுறை கோப்பையை வெல்லும் முனைப்பில் சிறப்பாகச் செயல்பட்டு வருகிறது. அதே சமயம், மீதமுள்ள போட்டிகளில் ஆர்சிபி மற்றும் சிஎஸ்கே போன்ற அணிகள் தங்களது வாய்ப்பைத் தக்கவைக்கப் போராட வேண்டிய கட்டாயத்தில் உள்ளன. ஐபிஎல் புள்ளிகள் பட்டியலில் நிலவும் இந்த அதிரடி மாற்றங்கள் ரசிகர்களிடையே பெரும் எதிர்பார்ப்பை ஏற்படுத்தியுள்ளன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.