சத்தமே இல்லாமல்.. பாகிஸ்தானில் செய்த தரமான சம்பவம்.. இப்படியொரு வெற்றியை அந்த டீமே எதிர்பார்க்கல! அரண்டு போன இங்கிலாந்து!

நேற்றைய தினம் இந்தியா - நியூசிலாந்து டி20 போட்டி நடைபெற்ற அதே நேரத்தில், பாகிஸ்தான் மண்ணில் இங்கிலாந்து பௌலர்களைத் துவம்சம் செய்திருக்கிறது இலங்கை அணி.

கிரிக்கெட் வரலாற்றில் இங்கிலாந்து அணிக்கு எதிரான மிகப் பெரிய சேஸ் இதுவாகும். ஒட்டுமொத்த ODI வரலாற்றில் இரண்டாவது பெரிய சேஸ்.

ராவல்பிண்டி மைதானத்தில் நடந்த இந்தத் த்ரில்லிங் போட்டியில், கடைசி நேரத்தில் மேஜிக்கலாக வெற்றியைத் தட்டியுள்ளனர் இலங்கை பேட்ஸ்மேன்கள். 430 ரன்கள் என்ற இமாலய இலக்கை ஒரு பந்து மட்டுமே மீதமிருக்க எட்டியுள்ளனர்.

தொடக்க ஆட்டக்காரர்களான கமிந்து மெண்டிஸும், குசல் மெண்டிஸும் அடுத்தடுத்து விக்கெட்டுகளை இழக்க, 24 ரன்களுக்கு 2 விக்கெட்டுகளை இழந்திருந்தது இலங்கை அணி.

பேட்டிங்கில் 429 ரன்கள் அடித்த இங்கிலாந்து, ஆட்டத்தைக் கைப்பற்றிவிட்டதாகவே பலரும் நினைத்திருக்கலாம். ஆனால், இறுதிவரை போராடுவது என்ற முடிவோடு அடுத்தடுத்த பேட்ஸ்மேன்கள் களமிறங்கினர்.

சிறப்பாக விளையாடி வந்த மற்றொரு தொடக்க ஆட்டக்காரரான பெர்னாண்டோ, 97 ரன்களில் சதத்தைத் தவறவிட்டு விக்கெட்டை இழந்தார். அடுத்த 135 பந்துகளில் 240 ரன்கள் தேவை என்ற நிலை இருந்தது. இங்கிலாந்து பந்துவீச்சாளர்கள் விக்கெட்டுகளை வீழ்த்தும் முயற்சியில் தீவிரம் காட்டத் தொடங்கினர்.

இலங்கை அணி, ஆரம்பத்தில் இருந்த தடுமாற்றத்தில் இருந்து மீண்டிருந்தது. ஆனாலும், இன்னும் செல்ல வேண்டிய தூரம் அதிகம் இருந்தது.

ரத்நாயகே மற்றும் ஷனாகாவின் பார்ட்னர்ஷிப், அணியை வெற்றியை நோக்கித் தள்ளியது. இலங்கை பேட்டர்களில் அதிகபட்சமாக ரத்நாயகே 106 பந்துகளில் 130 ரன்கள் எடுத்தார். சாம் கரண் பந்தில் அவர் விக்கெட்டை இழக்க, விரைவிலேயே ஷனாகாவும் வெளியேறினார்.

ஷனாகா சதம் அடிக்கவில்லை என்றாலும், 50 பந்துகளில் 97 ரன்கள் எடுத்து வெற்றிக்கு அடித்தளமிட்டார். அவர் 8 சிக்ஸர்களும் 6 பவுண்டரிகளும் அடித்திருந்தது குறிப்பிடத்தக்கது. அடுத்து வந்த ஜனித் லியானேஜ் அதிரடி காட்ட, போட்டி கடைசி ஓவரில் த்ரில்லாக மாறியது.

6 பந்துகளில் 8 ரன்கள் மட்டுமே தேவைப்பட்டன. கடைசியாகக் களத்தில் இருந்த பேட்டிங் ஆல்-ரவுண்டர் லியானேஜ், முதல் பந்தில் சிங்கிள் மட்டுமே எடுக்க முடிந்தது. அடுத்த இரண்டு பந்துகளில் இரண்டு விக்கெட்டுகளை வீழ்த்தினார் ஜோஷ் டங். அடுத்த பந்தில் ஆசிதா பெர்னாண்டோ சிங்கிள் எடுக்க, மீண்டும் ஸ்ட்ரைக்குக்கு வந்தார் லியானேஜ். 2 பந்துகளில் 6 ரன்கள் எடுக்க வேண்டியிருந்தது. முதல் பந்தை லாங் ஆஃப் திசையில் சிக்ஸருக்கு விரட்டி, போட்டியை முடித்துக்கொடுத்தார்.

இங்கிலாந்து கேப்டன் ஹாரி புரூக்கின் சாதனை இரட்டைச் சதம் வீணானது. முதல் இன்னிங்ஸில் அவர் 116 பந்துகளில் 202 ரன்கள் விளாசியிருந்தார். இதன் மூலம், இந்த மைல்கல்லை எட்டிய முதல் இங்கிலாந்து பேட்ஸ்மேன் என்ற பெருமையைப் பெற்றார். மேலும், இது ஒருநாள் போட்டி வரலாற்றில் அதிவேக இரட்டைச் சதமாகவும் அமைந்தது.

இங்கிலாந்து அணியின் சாதனை வெற்றி பரபரப்பாக பேசப்படுகிறது.

இங்கிலாந்து - இலங்கை இடையே 3 போட்டிகளை கொண்ட ஒருநாள் தொடரில் முதலாவது போட்டி இது. அடுத்த போட்டி வருகின்ற 29ம் தேதி நடைபெற உள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.