"இறுதிப் போட்டியைத் தள்ளி வைத்திருக்க வேண்டுமா?" சுனில் கவாஸ்கரின் கருத்துக்கு குஜராத் டைட்டன்ஸ் பதில்!

ஐபிஎல் 2026 இறுதிப் போட்டியில் குஜராத் டைட்டன்ஸ் அணி, ராயல் சேலஞ்சர்ஸ் பெங்களூருவிடம் தோல்வியைத் தழுவியது. வெறும் ஆறு நாட்களில் மூன்று முக்கியமான போட்டிகளில் விளையாட வேண்டிய கட்டாயம் அந்த அணிக்கு இருந்தது. இதில் அகமதாபாத்தில் நடைபெற்ற இறுதிப் போட்டிக்கு முந்தைய நாள் இரவுதான் குஜராத் அணி வீரர்கள் அகமதாபாத் வந்து சேர்ந்தனர். மோசமான வானிலை காரணமாகப் பயணத்தில் ஏற்பட்ட தாமதத்தால், இறுதிப் போட்டிக்குத் தயாராக அவர்களுக்கு 24 மணி நேரத்திற்கும் குறைவான கால அவகாசமே கிடைத்தது. இது குறித்துக் கருத்து தெரிவித்த கிரிக்கெட் ஜாம்பவான் சுனில் கவாஸ்கர், வானிலை பாதிப்பால் வீரர்கள் போதிய ஓய்வு பெறாததால், இந்த இறுதிப் போட்டியைத் தள்ளி வைத்திருக்க வேண்டும் என்று கூறியிருந்தார்.

இது தொடர்பாக நடந்த செய்தியாளர் சந்திப்பில், பயணக் களைப்பு அணியின் தோல்விக்குக் காரணமாக இருந்ததா? என்று குஜராத் அணியின் கிரிக்கெட் இயக்குனர் விக்ரம் சோலங்கியிடம் கேள்வி எழுப்பப்பட்டது. அதற்குப் பதிலளித்த அவர், "வானிலையை எங்களால் கட்டுப்படுத்த முடியாது" என்றும், "தாமதமாக வந்து சேர்ந்ததை எங்களால் மாற்ற முடியாது" என்றும் தெரிவித்தார். குறுகிய நாட்களில் அதிக போட்டிகளில் விளையாடுவது உடல் ரீதியாக சவாலானது என்பதை ஒப்புக்கொண்டாலும், தோல்விக்கு இதைப் போலச் சாக்குப்போக்கு சொல்ல அவர் விரும்பவில்லை என்று திட்டவட்டமாகக் கூறினார்.

ஆர்சிபி அணி மிகச்சிறப்பாக விளையாடியதால் வெற்றி அவர்களுக்குச் சென்றது என்றும், அதில் எவ்வித சந்தேகமும் இல்லை என்றும் அவர் தெரிவித்தார். இறுதிப் போட்டியில் பெங்களூரு அணி தங்களைவிடச் சிறந்த ஆட்டத்தை வெளிப்படுத்தியது என்பதை ஏற்றுக்கொள்வதே கண்ணியம் என்றும் அவர் கூறினார். கடந்த சில நாட்களில் விளையாடிய போட்டிகளின் எண்ணிக்கை மற்றும் பயணங்களால் ஏற்பட்ட களைப்பு குறித்துப் பேசுவது தற்போது அர்த்தமற்றது என்றும், ஆர்சிபி அணியின் வெற்றியை அங்கீகரிக்க வேண்டும் என்றும் சோலங்கி தெரிவித்தார்.

தோல்வி கசப்பானதுதான் என்றாலும், இந்தத் தொடர் முழுவதும் தங்களது அணி காட்டிய சிறப்பான ஆட்டத்தை நினைத்துத் தாங்கள் பெருமை கொள்வதாகவும் அவர் குறிப்பிட்டார். சுனில் கவாஸ்கரின் கருத்து அவருக்கு இருக்கும் கிரிக்கெட் அக்கறையை வெளிப்படுத்துகிறது என்றாலும், அந்த நொடியில் பெங்களூரு அணி விளையாடிய ஆட்டம் மிக உயர்தரமாக இருந்தது என்று அவர் பாராட்டினார்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.