இறுதிப் போட்டியில் இந்தியாவுடன் மோதுகிறதா பாகிஸ்தான்? முடிவு இன்று தெரிந்துவிடும்!

ஆசியக் கோப்பை 2025 சூப்பர் 4 சுற்றில், வங்காளதேசத்திற்கு எதிராக இந்தியா பெற்ற வெற்றியானது, இறுதிப் போட்டிக்கான பாதையை தெளிவுப்படுத்திவிட்டது எனலாம். இந்த வெற்றியின் மூலம், இந்தியா முதல் அணியாக இறுதிப் போட்டிக்குத் தகுதி பெற்றது அத்துடன், இந்தப் போட்டித் தொடரில் இருந்து இலங்கை அணி அதிகாரப்பூர்வமாக வெளியேற்றப்பட்டுள்ளது. இதன் விளைவாக, எஞ்சியுள்ள ஒரே ஒரு இறுதிப் போட்டிக்கான இடத்தை, பாகிஸ்தான் மற்றும் வங்காளதேசம் ஆகிய இரு அணிகளும் தீர்மானிக்கும் நிலை உருவாகியுள்ளது.

துபாய் சர்வதேச கிரிக்கெட் மைதானத்தில் நடந்த சூப்பர் 4 சுற்றின் முக்கியமான ஆட்டத்தில், அபிஷேக் சர்மாவின் அதிரடி பேட்டிங் (37 பந்துகளில் 75 ரன்கள்) மற்றும் இந்திய பந்துவீச்சாளர்களின் துல்லியமான தாக்குதல் ஆகியவற்றால் இந்தியா, வங்காளதேசத்தை 41 ரன்கள் வித்தியாசத்தில் வீழ்த்தியது. இந்த வெற்றியின் மூலம் இந்தியா, சூப்பர் 4 சுற்றில் இரண்டு வெற்றிகளுடன் 4 புள்ளிகளைப் பெற்று, வலுவான +1.357 என்ற நிகர ரன் விகிதத்துடன் (NRR) புள்ளிப் பட்டியலில் முதலிடத்தை உறுதி செய்துள்ளது. இந்தியா தனது கடைசி சூப்பர் 4 போட்டியில் இலங்கை அணியுடன் விளையாட உள்ளது. அந்தப் போட்டியின் முடிவு எதுவாக இருந்தாலும், அது இறுதிப் போட்டியில் இந்தியாவின் இடத்தைப் பாதிக்காது.

இந்தியா தகுதி பெற்றதால், புள்ளிப் பட்டியலில் கடைசி இடத்தில் இருந்த இலங்கை அணி வெளியேறியது. இதனால், இரண்டாவது இறுதிப் போட்டி வாய்ப்புக்காக பாகிஸ்தான் மற்றும் வங்காளதேசம் ஆகிய இரு அணிகளும் நேரடிப் போட்டியில் மோதும் நிலை ஏற்பட்டுள்ளது.

பாகிஸ்தானுக்கான வாய்ப்புகள்

சூப்பர் 4 சுற்றில் தலா ஒரு வெற்றியுடன், பாகிஸ்தான் மற்றும் வங்காளதேசம் ஆகிய இரு அணிகளும் 2 புள்ளிகளுடன் சமநிலையில் உள்ளன. பாகிஸ்தான் அணிக்கு வங்காளதேசத்தை விடச் சற்றுச் சிறந்த நிகர ரன் விகிதம் (+0.226) உள்ளது.

எனவே, பாகிஸ்தான் மற்றும் வங்காளதேசத்தின் அடுத்தப் போட்டி, தற்போது நடைமுறை அரையிறுதியாக (Virtual Semi-final) மாறிவிட்டது. இன்று நடைபெறவுள்ள இந்த நேரடி மோதலில் வெற்றி பெறும் அணி மட்டுமே, இந்தியாவை இறுதிப் போட்டியில் எதிர்கொள்ளும் இரண்டாவது அணியாகத் தகுதி பெறும். இந்த நிலையில், புள்ளிச் சமநிலைக்கான வாய்ப்பு இல்லாததால், எந்த அணியின் நிகர ரன் விகிதமும் இறுதிப் போட்டித் தகுதியைப் பாதிக்காது. வெற்றிப் பெறும் அணிக்கே இறுதிப் போட்டிக்கான வாய்ப்பு.

இதன் மூலம், ஆசியக் கோப்பை 2025 இறுதிப் போட்டி, இந்தியா மற்றும் பாகிஸ்தான் இடையேயான ஒரு பரபரப்பான கிளாசிக் மோதலாக இருக்க அதிக வாய்ப்புள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.