7 ஆண்டு காதல் Breakup-ல் ஆத்திரம்! முன்னாள் காதலியின் வீட்டுக்கே தீ வைத்த இளைஞர்...

சுமார் ஏழு ஆண்டுகளாகத் தொடர்ந்த காதல் உறவை முடித்துக்கொள்ள பெண் ஒருவர் முடிவு செய்ததால் ஆத்திரமடைந்த இளைஞர், அவரது வீட்டின் நுழைவுக் கதவுக்குப் பெட்ரோல் ஊற்றி தீ வைத்துள்ளார்.
Maharashtra ex-boyfriend arrested
Maharashtra ex-boyfriend arrested
Published on: 
Updated on: 
2 min read

காதல் உறவில் ஏற்படும் பிரிவை ஏற்றுக்கொள்ள முடியாமல் சிலர் எடுக்கும் தவறான முடிவுகள், மற்றவர்களின் வாழ்க்கையையே ஆபத்தில் தள்ளிவிடுகின்றன. அப்படியொரு அதிர்ச்சிகரமான சம்பவம் மகாராஷ்டிராவில் நடந்துள்ளது. சுமார் ஏழு ஆண்டுகளாகத் தொடர்ந்த காதல் உறவை முடித்துக்கொள்ள பெண் ஒருவர் முடிவு செய்ததால் ஆத்திரமடைந்த இளைஞர், அவரது வீட்டின் நுழைவுக் கதவுக்குப் பெட்ரோல் ஊற்றி தீ வைத்துள்ளார். வீட்டில் பெண்ணுடன் அவரது பெற்றோரும் இருந்த நிலையில், சரியான நேரத்தில் அவர்கள் செயல்பட்டதால் பெரும் உயிரிழப்பு தவிர்க்கப்பட்டுள்ளது.

மகாராஷ்டிராவின் டோம்பிவ்லி பகுதியில் உள்ள ஒரு குடியிருப்பில் இந்தச் சம்பவம் நடைபெற்றுள்ளது. அங்கு தனது பெற்றோருடன் வசித்து வந்த இளம்பெண் ஒருவருக்கும், தீபேஷ் ரஸ்தோகி என்ற இளைஞருக்கும் இடையே கடந்த ஏழு முதல் எட்டு ஆண்டுகளாகக் காதல் உறவு இருந்ததாகக் கூறப்படுகிறது. நீண்ட காலமாகத் தொடர்ந்த இந்த உறவில், சமீபகாலமாக இருவருக்கும் இடையே கருத்து வேறுபாடுகள் ஏற்பட்டுள்ளன. இதனால் அந்தப் பெண் இந்த உறவைத் தொடர விரும்பாமல் பிரிந்து செல்ல முடிவு செய்துள்ளார்.

தனது முடிவை அந்த இளைஞரிடம் அவர் ஏற்கெனவே தெரிவித்திருந்ததாகக் கூறப்படுகிறது. ஆனால், நீண்ட காலமாகத் தொடர்ந்த காதல் உறவு முடிவுக்கு வந்ததை இளைஞரால் ஏற்றுக்கொள்ள முடியவில்லை எனக் காவல்துறையினர் சந்தேகிக்கின்றனர். இதன் காரணமாகவே அவர் இந்த விபரீதச் செயலில் ஈடுபட்டிருக்கலாம் என முதற்கட்ட விசாரணையில் தெரியவந்துள்ளது.

கடந்த வியாழக்கிழமை அந்தப் பெண் வசித்து வந்த வீட்டிற்குச் சென்ற இளைஞர், வீட்டின் நுழைவுக் கதவின் மீது பெட்ரோலை ஊற்றித் தீ வைத்ததாகக் கூறப்படுகிறது. திடீரென கதவில் தீப்பற்றியதால் வீட்டிற்குள் இருந்த பெண்ணும் அவரது பெற்றோரும் அதிர்ச்சியடைந்தனர். எதிர்பாராத விதமாக ஏற்பட்ட தீ, வீட்டின் மற்ற பகுதிகளுக்கும் பரவினால் பெரிய விபத்து ஏற்படும் அபாயம் இருந்தது. குறிப்பாக, வீட்டின் நுழைவுப் பகுதியிலேயே தீப்பற்றியதால் குடும்பத்தினர் அச்சமடைந்தனர்.

குடும்பத்தினர் உடனடியாகச் செயல்பட்டு தீயை அணைத்தனர். தீ வீட்டிற்குள் பரவுவதற்கு முன்பே அதைக் கட்டுப்படுத்தியதால் மிகப்பெரிய அசம்பாவிதம் தவிர்க்கப்பட்டது. இந்தச் சம்பவத்தில் அந்தப் பெண்ணுக்கும் அவரது பெற்றோருக்கும் எந்தக் காயமும் ஏற்படவில்லை. ஒரு சில நிமிடங்கள் தாமதமாகியிருந்தாலும் நிலைமை மோசமடைந்திருக்கலாம் என்பதால், குடும்பத்தினர் உயிர் தப்பியது நிம்மதியை ஏற்படுத்தியுள்ளது. சம்பவம் குறித்து தகவல் கிடைத்ததும் மண்பாடா காவல்துறையினர் விசாரணையைத் தொடங்கினர். வீட்டின் கதவுக்குத் தீ வைத்ததாகச் சந்தேகிக்கப்படும் தீபேஷ் ரஸ்தோகியை போலீசார் கைது செய்தனர். இதனை மண்பாடா காவல் நிலையத்தின் மூத்த காவல் ஆய்வாளர் சந்தீபன் ஷிண்டே உறுதிப்படுத்தியுள்ளார். கைது செய்யப்பட்ட இளைஞர் நவம்பர் 24ஆம் தேதி வரை காவல்துறை காவலில் வைக்கப்பட்டுள்ளார். அவரிடம் தொடர்ந்து விசாரணை நடைபெற்று வருகிறது.

இந்தச் சம்பவத்தில் இளைஞரின் உண்மையான நோக்கம் என்ன என்பது குறித்து போலீசார் பல்வேறு கோணங்களில் விசாரித்து வருகின்றனர். முன்னாள் காதலியின் வீட்டில் அவரது பெற்றோரும் வசித்து வந்த நிலையில், வீட்டின் நுழைவுக் கதைக்குத் தீ வைக்கப்பட்டிருப்பது குடும்பத்தினரின் பாதுகாப்பு குறித்த கேள்விகளையும் எழுப்பியுள்ளது. அந்தப் பெண்ணை மட்டும் குறிவைத்து இந்தச் செயல் நடந்ததா அல்லது குடும்பத்தினர் அனைவரையும் பாதிக்கும் நோக்கம் இருந்ததா என்பதும் விசாரணையில் தெரியவர வேண்டியுள்ளது. இதுகுறித்து இறுதியான முடிவுகள் எதுவும் இதுவரை வெளியாகவில்லை.

ஒரு உறவு முடிவுக்கு வருவது வாழ்க்கையில் ஏற்படக்கூடிய இயல்பான விஷயம். இருவரில் ஒருவர் அந்த உறவைத் தொடர விரும்பவில்லை என்றால், அவருடைய முடிவை மதிப்பதும் ஏற்றுக்கொள்வதும் அவசியம். ஆனால், பிரிவை பழிவாங்க வேண்டிய விஷயமாகப் பார்ப்பது ஆபத்தான விளைவுகளை ஏற்படுத்தும். இந்தச் சம்பவத்தில் ஒரு குடும்பமே தீ விபத்தில் சிக்கக்கூடிய நிலை உருவானது. அதிர்ஷ்டவசமாக யாருக்கும் காயம் ஏற்படவில்லை என்றாலும், தனிப்பட்ட உறவில் ஏற்பட்ட பிரச்சினை எந்த அளவுக்குப் பெரிய ஆபத்தாக மாறக்கூடும் என்பதை இந்தச் சம்பவம் மீண்டும் உணர்த்தியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.