“சத்தம் போட்டால் கொன்றுவிடுவேன்!” என கத்தி வைத்து மிரட்டிய கொள்ளையன்... சுற்றிவளைத்துப் பிடித்த பொதுமக்களால் பரபரப்பு!

பட்டப்பகலில் கடைக்குள் புகுந்து பெண்ணிடம் தங்கச் சங்கிலியைப் பறிக்க முயன்ற நபர், அவர் எதிர்ப்பு தெரிவித்ததால் கத்தியை வைத்து கொலை மிரட்டல் விடுத்த சம்பவம் பெரும் அதிர்ச்சியை ஏற்படுத்தியுள்ளது. ஒரு கட்டத்தில் அந்தப் பெண்ணை பிணைக்கைதியாகப் பிடித்து சாலைக்கு இழுத்துச் சென்ற கொள்ளையன், பொதுமக்கள் சுற்றி வளைத்தபோதும் அவரை விடாமல் மிரட்டியுள்ளார். இருப்பினும், அங்கிருந்த பொதுமக்களும் போக்குவரத்துக் காவலர்களும் துணிச்சலுடன் செயல்பட்டு அந்தப் பெண்ணை மீட்டதுடன், கொள்ளையனையும் பிடித்து போலீசாரிடம் ஒப்படைத்துள்ளனர். இந்தச் சம்பவம் தொடர்பான வீடியோ தற்போது சமூக வலைதளங்களில் கவனம் பெற்று வருகிறது.

இந்தச் சம்பவம் அக்டோபர் 31ஆம் தேதி காலை கர்நாடக மாநிலம் பெங்களூருவின் இந்திரா நகர் பகுதியில் உள்ள 100 அடி சாலையில் நடைபெற்றுள்ளது. அங்குள்ள பிரபலமான ஷூ மற்றும் பேக் பழுதுபார்க்கும் கடையில் 23 வயதான ஜெயஸ்ரீ என்ற பெண் பணியாற்றி வந்துள்ளார். சம்பவத்தன்று காலை வழக்கம்போல் கடையைத் திறந்து தனது பணிகளை மேற்கொண்டு வந்த அவர், சுமார் 11.45 மணியளவில் தனியாக இருந்துள்ளார். அப்போது ஹெல்மெட் மற்றும் கையுறைகள் அணிந்தபடி ஒரு நபர் திடீரென கடைக்குள் நுழைந்துள்ளார்.

கடைக்குள் வந்த அந்த நபர், யாரோ தன்னைத் துரத்திக் கொலை செய்ய வருவதாகவும், தன்னைப் பாதுகாத்துக்கொள்ள இடம் கொடுக்குமாறும் கூறியுள்ளார். இதனால் முதலில் அவருக்கு ஏதோ ஆபத்து ஏற்பட்டிருக்கலாம் என்று ஜெயஸ்ரீ நினைத்துள்ளார். ஆனால், அடுத்த சில நொடிகளிலேயே அந்த நபரின் நடவடிக்கை மாறியுள்ளது. திடீரென கடையின் வரவேற்பு மேசையைத் தாண்டி உள்ளே குதித்த அவர், ஜெயஸ்ரீயை மிரட்டி தங்கச் சங்கிலியைக் கொடுக்குமாறு கேட்டுள்ளார். இதனால் அதிர்ச்சியடைந்த பெண், கடையின் உரிமையாளரைத் தொடர்புகொள்ள முயன்றுள்ளார்.

அப்போது அந்த நபர் அவரைத் தடுத்து, வாயைப் பொத்தி அமர வைத்துள்ளார். பின்னர் கத்தியை எடுத்து கழுத்துப் பகுதியில் வைத்து, சத்தம் போட்டால் கொலை செய்துவிடுவதாக மிரட்டியுள்ளார். பெண் எதிர்ப்பு தெரிவித்து தப்பிக்க முயன்றதால், அவரது இரு கைகளையும் ஒன்றாக ஒட்ட வைக்கும் வகையில் பெவிக்விக் பசையைப் பயன்படுத்தியதாகப் புகாரில் தெரிவிக்கப்பட்டுள்ளது. மேலும், மேசையில் இருந்த துணியையும் எடுத்து அவரது வாயில் திணித்துள்ளார். இதனால் ஜெயஸ்ரீயால் உடனடியாக உதவி கேட்க முடியாத நிலை ஏற்பட்டது.

அவர் அணிந்திருந்த சுமார் 35 கிராம் எடையுள்ள தங்கச் சங்கிலியை அந்த நபர் பறித்துள்ளார். அதன் மதிப்பு சுமார் ரூ.4.5 லட்சம் எனக் கூறப்படுகிறது. இருப்பினும், அந்தப் பெண் எப்படியோ தனது கைகளை விடுவித்துக்கொண்டு சத்தம் போட்டுள்ளார். அவரது அலறல் சத்தத்தைக் கேட்ட அருகிலுள்ள கடைக்காரர்களும் பொதுமக்களும் உடனடியாக அங்கு திரண்டனர். இதனால் பயந்துபோன கொள்ளையன், தப்பிச் செல்லும் நோக்கத்தில் மீண்டும் அந்தப் பெண்ணைப் பிடித்துள்ளார்.

ஜெயஸ்ரீயின் தலைமுடியைப் பிடித்து அவரை மீண்டும் கடைக்குள் இழுத்துச் சென்றதுடன், கழுத்தில் கத்தியை வைத்து பொதுமக்களை நெருங்க வேண்டாம் என்று எச்சரித்துள்ளார். யாராவது அருகில் வந்தால் பெண்ணைக் கொலை செய்துவிடுவதாகவும் மிரட்டியுள்ளார். இதனால் அங்கிருந்தவர்கள் உடனடியாகச் செயல்பட முடியாமல் சில நிமிடங்கள் பதற்றத்துடன் நின்றுள்ளனர். கடையின் உரிமையாளரும் பொதுமக்களும் அவரைச் சமாதானப்படுத்தி பெண்ணை விடுவிக்குமாறு கேட்டுக்கொண்டனர். ஆனால், அந்த நபர் கத்தியைக் காட்டி தொடர்ந்து மிரட்டியதாகத் தெரிகிறது.

ஒருகட்டத்தில் கொள்ளையன் அங்கிருந்து தப்பிக்க முயன்றபோது, பொதுமக்களும் போக்குவரத்துக் காவலர்களும் இணைந்து அவரைப் பிடிக்க முயன்றனர். அவர்களைத் தாக்கவும் அந்த நபர் முயன்றதாகக் கூறப்படுகிறது. இருப்பினும், அனைவரும் ஒன்றிணைந்து அவரைச் சுற்றி வளைத்து மடக்கிப் பிடித்தனர். பின்னர் அவரை இந்திரா நகர் போலீசாரிடம் ஒப்படைத்தனர். இந்தச் சம்பவத்தில் பெண் பெரிய அளவிலான காயங்கள் இன்றி பாதுகாப்பாக மீட்கப்பட்டதாக போலீசார் தெரிவித்துள்ளனர்.

போலீசார் நடத்திய விசாரணையில், கொள்ளை முயற்சியில் ஈடுபட்ட நபர் பிரபுராஜ் (40) என்பது தெரியவந்தது. அவரைக் கைது செய்த போலீசார் நீதிமன்றத்தில் ஆஜர்படுத்தினர். பின்னர் அவர் நீதிமன்றக் காவலில் வைக்கப்பட்டுள்ளார். இந்தச் சம்பவம் தொடர்பாக கொள்ளையடிக்க முயன்றபோது காயம் ஏற்படுத்திய குற்றச்சாட்டின் கீழ் வழக்குப் பதிவு செய்யப்பட்டுள்ளதாகத் தெரிவிக்கப்பட்டுள்ளது.

இதுகுறித்து பெங்களூரு கிழக்கு மண்டல காவல் துணை ஆணையர் விக்ரம் அமதே கூறுகையில், பொதுமக்களின் உதவியுடன் குற்றம்சாட்டப்பட்ட நபரை போலீசார் பிடித்ததாகவும், விசாரணைக்குப் பிறகு அவர் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டுள்ளதாகவும் தெரிவித்துள்ளார். மேலும், அந்த நபரின் பின்னணி குறித்து போலீசார் விசாரித்து வருகின்றனர். முதற்கட்டத் தகவல்களின்படி, அவர் மனநலம் தொடர்பான சில சிரமங்களை எதிர்கொண்டிருக்கலாம் என்றும் சந்தேகிக்கப்படுகிறது. இருப்பினும், இதுகுறித்த மருத்துவ அல்லது அதிகாரப்பூர்வ உறுதிப்படுத்தல் வெளியாகவில்லை.

எப்போதும் மக்கள் நடமாட்டம் அதிகமாக இருக்கும் வர்த்தகப் பகுதியில் பட்டப்பகலில் நடந்த இந்தச் சம்பவம், பெண்களின் பாதுகாப்பு குறித்த கேள்விகளை மீண்டும் எழுப்பியுள்ளது. குறிப்பாக, கடைகளில் தனியாகப் பணிபுரியும் பெண்களின் பாதுகாப்பை உறுதி செய்ய உரிய நடவடிக்கைகள் எடுக்கப்பட வேண்டும் என்ற கோரிக்கையும் எழுந்துள்ளது. அதேநேரத்தில், ஆபத்தான சூழ்நிலையில் சிக்கிய பெண்ணை மீட்க முன்வந்த பொதுமக்கள் மற்றும் போக்குவரத்துக் காவலர்களின் விரைவான செயல்பாடு பாராட்டுகளைப் பெற்று வருகிறது. ஒரு சில நிமிடங்களில் உயிருக்கு ஆபத்தான நிலையாக மாறியிருக்கக்கூடிய சம்பவம், பொதுமக்களின் ஒற்றுமையால் முடிவுக்கு வந்துள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.