.png)
ஒரு பெண்ணைக் கொலை செய்ததாகக் கூறி ஒருவர் கைது செய்யப்பட்டு, இரண்டரை ஆண்டுகள் சிறையில் இருந்துள்ளார். ஆனால், கொலை செய்யப்பட்டதாக நம்பப்பட்ட அந்தப் பெண் திடீரென உயிருடன் திரும்பி வந்துள்ளார். இதனால் அந்த நபர் மீதான கொலைக் குற்றச்சாட்டும், அப்போது நடத்தப்பட்ட காவல்துறை விசாரணையும் தற்போது பெரும் கேள்விக்குள்ளாகியுள்ளன. ஒரு சாதாரண உதவிக்காகத் தனது செல்போனைக் கொடுத்த நபருக்கு இப்படியொரு நிலை ஏற்பட்ட சம்பவம் அதிர்ச்சியை ஏற்படுத்தியுள்ளது.
இந்தச் சம்பவம் கர்நாடக மாநிலத்தில் நடந்துள்ளது. கடந்த 2019-ம் ஆண்டு ஜூன் மாதம் மஞ்சு என்ற பெண் தனது வீட்டிலிருந்து வெளியேறியுள்ளார். குடும்பத்தினர் விருப்பமின்றி திருமணம் செய்து வைத்ததால், அந்த வாழ்க்கையில் விருப்பமில்லாமல் இருந்த அவர், தான் காதலித்த நபரைத் திருமணம் செய்துகொள்ள முடிவு செய்ததாகக் கூறப்படுகிறது. வீட்டை விட்டு வெளியேறிய அவர், பேருந்து நிலையத்தில் இருந்தபோது அவசரமாக வீட்டுக்குத் தொடர்புகொள்ள வேண்டியிருந்துள்ளது.
அப்போது அங்கு நின்றுகொண்டிருந்த ராஜேஷ் என்பவரிடம் செல்போனைக் கடனாகக் கேட்டு வாங்கி, அதன் மூலம் ஒரு அழைப்பை மேற்கொண்டுள்ளார். பின்னர் செல்போனைத் திருப்பிக் கொடுத்துவிட்டு அங்கிருந்து சென்றுவிட்டார். இதற்கிடையே மஞ்சு வீடு திரும்பாததால் அவரது தந்தை நாகராஜு காவல்துறையில் புகார் அளித்துள்ளார். விசாரணையில், மஞ்சு கடைசியாகப் பேசிய தொலைபேசி எண் ராஜேஷுடையது என்பது தெரியவந்தது. இதனால் அவருக்கும் மஞ்சுவின் மாயமானதற்கும் தொடர்பு இருக்கலாம் எனச் சந்தேகம் எழுந்தது.
ஆனால், ஆரம்பத்தில் இந்த வழக்கில் எந்தத் தெளிவான முடிவும் கிடைக்கவில்லை. இதையடுத்து 2021-ம் ஆண்டு ஆகஸ்ட் மாதம் மஞ்சுவின் தந்தை மீண்டும் காவல்துறையை அணுகியுள்ளார். அப்போது இரண்டு நபர்கள் தெரிவித்த தகவல்களின் அடிப்படையில், ராஜேஷ் தனது மகளைக் கடத்திக் கொலை செய்து காவிரி ஆற்றில் வீசியதாகப் புகார் அளித்துள்ளார். இதனைத் தொடர்ந்து காவல்துறையினர் கொலை வழக்குப் பதிவு செய்து ராஜேஷைக் கைது செய்தனர்.
இந்த வழக்கில் மிகவும் அதிர்ச்சியான விஷயம் என்னவென்றால், மஞ்சுவின் உடல் கண்டுபிடிக்கப்படவில்லை. இருப்பினும், சாட்சிகளின் வாக்குமூலங்கள் மற்றும் ராஜேஷ் ஒப்புக்கொண்டதாகக் கூறப்பட்ட வாக்குமூலத்தின் அடிப்படையில் காவல்துறையினர் குற்றப்பத்திரிகை தாக்கல் செய்தனர். இதனால் ராஜேஷ் சுமார் இரண்டரை ஆண்டுகள் நீதிமன்றக் காவலில் சிறையில் இருக்க வேண்டிய நிலை ஏற்பட்டது. பின்னர் 2024-ம் ஆண்டு ஜாமீனில் வெளியே வந்த அவர், தான் எந்தக் குற்றமும் செய்யவில்லை என்று தொடர்ந்து கூறி வந்துள்ளார்.
தனது பெயரில் சுமத்தப்பட்ட கொலைப் பழியை நீக்க வேண்டும் என்ற முயற்சியில் இறங்கிய ராஜேஷின் வழக்கறிஞர், தனிப்பட்ட முறையில் விசாரணை நடத்தி மஞ்சுவைத் தேடியுள்ளார். அப்போது அவர் வேறொரு நபரைத் திருமணம் செய்துகொண்டு குடும்பத்துடன் வசித்து வருவது தெரியவந்தது. இதையடுத்து காவல்துறைக்குத் தகவல் தெரிவிக்கப்பட்டது. கடந்த நவம்பர் 11-ம் தேதி மஞ்சு உயிருடன் இருப்பது உறுதி செய்யப்பட்டது.
காவல்துறையிடம் அளித்த முதற்கட்ட வாக்குமூலத்தில், ராஜேஷ் என்பவர் யார் என்றே தனக்குத் தெரியாது என்றும், அவர் மீது கொலை வழக்கு பதிவு செய்யப்பட்டிருப்பது பற்றியும் தனக்குத் தெரியாது என்றும் மஞ்சு கூறியுள்ளார். விருப்பமில்லாத திருமணத்திலிருந்து வெளியேறி, தான் காதலித்தவரைத் திருமணம் செய்துகொண்டு வாழ்ந்து வந்ததாகவும் தெரிவித்துள்ளார்.
இந்தச் சம்பவம் வெளிச்சத்துக்கு வந்ததைத் தொடர்ந்து, அப்போது வழக்கை விசாரித்த ஓய்வுபெற்ற காவல் ஆய்வாளர் பிரபாகர் மற்றும் விசாரணைக் குழுவின் செயல்பாடுகள் குறித்து கேள்விகள் எழுந்துள்ளன. வழக்கில் ஏற்பட்ட விசாரணை குறைபாடுகள் குறித்து விரிவான விசாரணை நடத்த மாவட்ட காவல்துறை கண்காணிப்பாளர் உத்தரவிட்டுள்ளார். இதற்கிடையே, தனது வாழ்க்கையின் முக்கியமான ஆண்டுகளைச் சிறையில் கழிக்க நேர்ந்ததற்கு காரணமானவர்கள் மீது நடவடிக்கை எடுக்க வேண்டும் என்று ராஜேஷின் குடும்பத்தினர் வலியுறுத்தி வருகின்றனர்.
ஒரு பெண் காணாமல் போன வழக்கில் உண்மையை முழுமையாகக் கண்டறியாமல் கொலை வழக்காக மாற்றிய விசாரணை தற்போது பெரும் சர்ச்சையை ஏற்படுத்தியுள்ளது. குற்றம் செய்யாத ஒருவர் சிறையில் இருந்த காலத்துக்கு யார் பொறுப்பேற்பது என்ற கேள்வியும் எழுந்துள்ளது. மஞ்சு உயிருடன் திரும்பி வந்தது ஒரு பக்கம் நிம்மதியை ஏற்படுத்தினாலும், ராஜேஷ் அனுபவித்த பாதிப்புகளுக்கு நீதி கிடைக்குமா என்பதே இப்போது அனைவரின் எதிர்பார்ப்பாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.