நீட் முதுகலைப் படிப்புகளுக்கான கலந்தாய்வு அட்டவணை வெளியீடு!

மருத்துவக் கலந்தாய்வுக் குழு (MCC) இன்று, தேசியத் தகுதி மற்றும் நுழைவுத் தேர்வு முதுகலைப் படிப்புகளுக்கான (NEET PG 2025) கலந்தாய்வு அட்டவணையை வெளியிட்டுள்ளது. இந்தக் கலந்தாய்வு அட்டவணையை, mcc.nic.in என்ற அதிகாரப்பூர்வ வலைதளத்தில் மாணவர்கள் பார்க்கலாம்.

முக்கியத் தேதிகள்:

மருத்துவ அறிவியல் தேர்வுக்கான தேசிய வாரியம் (NBEMS) வெளியிட்டுள்ள அட்டவணையின்படி, இடங்களின் விவரம் சரிபார்க்கும் பணி அக்டோபர் 23 அன்று முடிந்தது.

விருப்பமான கல்லூரிகளைத் தேர்ந்தெடுத்து உறுதியளிக்கும் செயல்முறை (Choice Filing and Locking) இன்று அக்டோபர் 28ஆம் தேதி தொடங்கி நவம்பர் 5ஆம் தேதி வரை நடக்கும்.

இடங்களை ஒதுக்கும் பணி நவம்பர் 6ஆம் தேதி தொடங்கி நவம்பர் 7ஆம் தேதி முடிவடையும்.

முதல் சுற்றின் முடிவுகள் நவம்பர் 8ஆம் தேதி அறிவிக்கப்படும்.

இடம் ஒதுக்கப்பட்ட மாணவர்கள் நவம்பர் 9ஆம் தேதி முதல் நவம்பர் 15ஆம் தேதிக்குள் கல்லூரிகளில் தகவல் கொடுத்துச் சேர வேண்டும்.

முதல் சுற்றிற்கான பதிவு ஏற்கனவே தொடங்கிவிட்டது.

கலந்தாய்வு எப்படி நடக்கும்?

அகில இந்திய ஒதுக்கீட்டு இடங்களுக்கான கலந்தாய்வு நான்கு சுற்றுகளாக நடைபெறும். அவை: முதல் சுற்று, இரண்டாம் சுற்று, மூன்றாம் சுற்று மற்றும் காலியிட நிரப்புதல் சுற்று (Stray Vacancy Round).

நீட் முதுகலைப் படிப்பில் தகுதி பெற்று, அகில இந்திய ஒதுக்கீட்டு இடங்களைப் பெறத் தகுதியான அனைத்து மாணவர்களும் இந்தக் கலந்தாய்வில் பங்கேற்கலாம்.

நாடு முழுவதும் உள்ள முதுகலை மருத்துவ மற்றும் பல் மருத்துவ இடங்களின் ஐம்பது விழுக்காடு (50%) அகில இந்திய ஒதுக்கீட்டு இடங்களுக்கு மத்திய சுகாதார மற்றும் குடும்ப நல அமைச்சகத்தின் கீழ் உள்ள சுகாதாரப் பணிகளுக்கான தலைமை இயக்குநரகம் ஆன்லைன் (Online) மூலம் கலந்தாய்வை நடத்துகிறது.

கலந்தாய்வை நடத்தும் கல்வி நிறுவனங்கள்:

மருத்துவக் கலந்தாய்வுக் குழுவானது (MCC) பின்வரும் கல்வி நிறுவனங்கள்/பல்கலைக்கழகங்களுக்கான கலந்தாய்வை நடத்தும்:

அனைத்து மாநிலங்களில் உள்ள 50% அகில இந்திய ஒதுக்கீட்டு இடங்கள். (ஜம்மு-காஷ்மீர் யூனியன் பிரதேசத்தில் உள்ள இடங்கள் அவர்கள் வழங்கும் இடங்களைப் பொறுத்து அமையும்.)

மத்தியப் பல்கலைக்கழகங்களில் உள்ள 100% இடங்கள் (அகில இந்திய ஒதுக்கீடு மற்றும் கல்வி நிறுவனங்களின் ஒதுக்கீடு இரண்டையும் சேர்த்து).

நிகர்நிலைப் பல்கலைக்கழகங்களில் உள்ள 100% இடங்கள்.

ஊழியர் அரசு காப்பீட்டுக் கழகத்தின் (ESIC) கீழ் வரும் கல்லூரிகளில் உள்ள 50% அகில இந்திய ஒதுக்கீட்டு இடங்கள்.

ராணுவ மருத்துவ சேவைகள் நிறுவனங்களில் (Armed Forces Medical Services Institutions) உள்ள அனைத்து முதுகலை இடங்கள் (பதிவு செய்தல் மட்டும்).

மத்திய கல்வி நிறுவனங்களான வி.எம்.எம்.சி மற்றும் சஃப்தர்ஜங் மருத்துவமனை, ஏ.பி.வி.ஐ.எம்.எஸ் மற்றும் ஆர்.எம்.எல் மருத்துவமனை, இ.எஸ்.ஐ.சி நிறுவனம், பி.ஜி.ஐ.எம்.எஸ்.ஆர் போன்ற கல்வி நிறுவனங்களில் உள்ள 50% அகில இந்திய ஒதுக்கீட்டு இடங்கள் மற்றும் ஐ.பி. பல்கலைக்கழகத்தின் 50% இடங்கள்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.