.png)
தமிழக அரசியல் களத்தில் தற்போதைய ஹாட் டாப்பிக் நடிகர் விஜய்யின் 'ஜனநாயகன்' திரைப்படத்திற்கு ஏற்பட்டுள்ள முட்டுக்கட்டைகள் தான். தமிழக வெற்றிக் கழகம் என்ற கட்சியைத் தொடங்கி முழுநேர அரசியலில் குதித்துள்ள விஜய்க்கு, திரையுலகில் இருந்து விடைபெறும் கடைசிப் படமான இது மிகப்பெரிய எதிர்பார்ப்பை ஏற்படுத்தியிருந்தது. ஆனால், திட்டமிட்டபடி ஜனவரி 9-ஆம் தேதி இந்தப் படம் திரைக்கு வருமா என்பதில் இப்போது மிகப்பெரிய கேள்விக்குறி எழுந்துள்ளது. தணிக்கை வாரியம் முதல் நீதிமன்றம் வரை இந்தப் படத்தைச் சுற்றி நடக்கும் நகர்வுகள் வெறும் சினிமா பிரச்சனையாக மட்டும் பார்க்கப்படாமல், விஜய்க்கு எதிராக விரிக்கப்படும் அரசியல் வலையாகவே தவெக தொண்டர்களால் பார்க்கப்படுகிறது.
சமீபத்தில் சென்னை உயர்நீதிமன்றத்தில் இந்த வழக்கு விசாரணைக்கு வந்தபோது, நீதிபதி பி.டி. ஆஷா எழுப்பிய கேள்விகள் ஒட்டுமொத்தத் திரையுலகையும் அதிரவைத்துள்ளன. ஒரு படம் வெளியாக இன்னும் சில நாட்களே உள்ள நிலையில், திடீரென தனிநபர் புகார் என்ற பெயரில் தணிக்கைச் சான்றிதழ் நிறுத்தி வைக்கப்படுவது ஏன் 'அப்நார்மலாக' இருக்கிறது என்று நீதிபதி கேட்டது தான் இங்கே ஹைலைட். பொதுவாக ஒரு படத்திற்குத் தணிக்கை குழு ஒப்புதல் அளித்த பிறகு, அதில் மாற்றங்கள் செய்து மீண்டும் விண்ணப்பித்தால் உடனே சான்றிதழ் வழங்கப்பட வேண்டும். ஆனால் ஜனநாயகன் விஷயத்தில், தணிக்கை வாரியம் இந்த விவகாரத்தை மறுசீராய்வு குழுவிற்கு மாற்றியது தான் சந்தேகத்தின் ஆரம்பப்புள்ளி.
திரையுலக வட்டாரங்களில் கசியும் தகவல்களின்படி, அடுத்த 20 நாட்களுக்கு இந்தப் படம் வெளியாக வாய்ப்பில்லை என்றே சொல்லப்படுகிறது. ஏனெனில் மறுசீராய்வு குழு படத்தை ஆய்வு செய்து அதன் பிறகு அறிக்கை தாக்கல் செய்யக் கூடுதல் காலம் எடுக்கும். இதற்குப் பின்னால் ஒரு மிகப்பெரிய அரசியல் கணக்கு இருப்பதாகக் கூறப்படுகிறது. குறிப்பாகப் பொங்கல் பண்டிகையை முன்னிட்டு பெரிய பட்ஜெட் படங்கள் ரிலீஸாக உள்ள நிலையில், விஜய்யின் படத்தை ஓரம் கட்டுவதன் மூலம் திரையரங்கு ஒதுக்கீட்டில் மற்ற படங்களுக்குச் சாதகமான சூழலை உருவாக்க ஒரு தரப்பு முயல்வதாகப் பேச்சு அடிபடுகிறது. இது விஜய்யின் அரசியல் செல்வாக்கைச் சோதிக்கும் ஒரு தந்திரமாகவும் பார்க்கப்படுகிறது.
மற்றொரு பக்கம், அரசியல் ரீதியாகவும் விஜய்க்கு அழுத்தங்கள் அதிகரித்துள்ளன. தமிழகத்தில் சமீபகாலமாக நடக்கும் சில விசாரணைகள் மற்றும் ரெய்டுகள் விஜய்யின் அரசியல் பயணத்திற்கு முட்டுக்கட்டை போடும் விதமாக அமைந்துள்ளதாகத் தவெக தரப்பில் புலம்புகிறார்கள். 'ரியல்' அரசியலின் கசப்பான பக்கங்களை விஜய் இப்போது தான் நேரடியாக அனுபவிக்கத் தொடங்கியுள்ளார். சினிமாவில் வில்லன்களை எளிதாக வீழ்த்துவது போல் அரசியலில் காய்களை நகர்த்த முடியாது என்பதை டெல்லி மற்றும் மாநில அரசியல் சக்திகள் அவருக்கு உணர்த்தி வருகின்றன. சிபிஐ மற்றும் தணிக்கை வாரியம் போன்ற அமைப்புகளின் செயல்பாடுகள் விஜய்யைத் திணறடிக்கும் ஒரு உத்தியாகவே விமர்சகர்களால் பார்க்கப்படுகிறது.
விஜய்யின் ஜனநாயகன் திரைப்படம் வெறும் பொழுதுபோக்கு படம் மட்டுமல்லாமல், அதில் தற்போதைய அரசியல் சூழலுக்கு எதிரான பல வசனங்களும் காட்சிகளும் இருப்பதாக ஒரு பேச்சு நிலவுகிறது. இதுவே தணிக்கை வாரியத்தின் கெடுபிடிகளுக்கு முக்கியக் காரணமாகச் சொல்லப்படுகிறது. நீதிபதி கேட்டது போல, ஏன் எல்லாமே 'அப்நார்மலாக' நடக்கிறது என்பதற்குப் பின்னால் இருக்கும் மர்மம் விலக வேண்டுமானால், தணிக்கை வாரியம் நீதிமன்றத்தில் சமர்ப்பிக்கப் போகும் அந்தப் புகாரின் பின்னணி தெரிய வேண்டும். எது எப்படியோ, நடிகர் விஜய்யின் கடைசித் திரைப்படம் ஒரு மாபெரும் போராட்டத்திற்குப் பிறகே திரைக்கு வரும் போலத் தெரிகிறது. இது தவெக தொண்டர்களுக்கு ஒருவித ஆவேசத்தையும், ரசிகர்களுக்குப் பெரும் ஏமாற்றத்தையும் கொடுத்துள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
