.png)
நடிகர் ராம் சரண் நடிப்பில் வெளியான 'பெத்தி' திரைப்படம் பாக்ஸ் ஆபீஸில் மிகச்சிறந்த வெற்றியைப் பதிவு செய்து வருகிறது. முன்னதாக வெளியான 'கேம் சேஞ்சர்' படம் எதிர்பார்த்த வெற்றியைத் தராத நிலையில், 'ஆர்ஆர்ஆர்' படத்திற்குப் பிறகு ராம் சரணின் அடுத்த கட்டத்தை நோக்கி ரசிகர்கள் மிகுந்த எதிர்பார்ப்புடன் இருந்தனர். ரசிகர்களின் அந்த எதிர்பார்ப்பை ராம் சரண் இந்தப் படத்தின் மூலம் பூர்த்தி செய்துள்ளதாகவே சினிமா விமர்சகர்கள் கருத்து தெரிவிக்கின்றனர். படம் வெளியான இரண்டாவது நாளிலேயே வசூலில் ராம் சரண் மாஸ் காட்டியுள்ளார்.
சாக்னில்க் (Sacnilk) அறிக்கையின்படி, இந்தப் படம் முதல் நாளில் 112.49 கோடி ரூபாயை வசூலித்து அதிரடி காட்டியது. இரண்டாவது நாளில் இந்தியா முழுவதும் 10,113 காட்சிகளில் திரையிடப்பட்டு, 26.90 கோடி ரூபாய் நிகர வசூலைப் பெற்றுள்ளது. இதன் மூலம் இந்தியாவில் மட்டும் இந்தப் படத்தின் மொத்த வசூல் 114.49 கோடி ரூபாயாக உயர்ந்துள்ளது. படம் வெளியான முதல் நாளில் கிடைத்த அதே உற்சாகம் இரண்டாவது நாளிலும் தொடர்வது படக்குழுவினருக்குப் பெரும் மகிழ்ச்சியைத் தந்துள்ளதாகத் தெரிகிறது.
சர்வதேச சந்தைகளிலும் 'பெத்தி' திரைப்படம் தனது ஆதிக்கத்தைத் தொடர்கிறது. இரண்டாவது நாளில் மட்டும் வெளிநாட்டுச் சந்தைகளில் 8 கோடி ரூபாயை வசூலித்துள்ள இந்தப் படம், ஒட்டுமொத்தமாக வெளிநாடுகளில் 36 கோடி ரூபாய் வசூலைத் தாண்டியுள்ளது. உள்நாடு மற்றும் வெளிநாட்டு வசூலைச் சேர்த்தால், படம் வெளியான இரண்டே நாட்களில் உலகம் முழுவதும் 150.49 கோடி ரூபாயை வசூலித்து அசத்தியுள்ளது. எஸ்.எஸ். ராஜமவுலியின் 'ஆர்ஆர்ஆர்' படத்திற்குப் பிறகு, ராம் சரணின் திரை வாழ்க்கையில் இரண்டாவது மிகப்பெரிய ஓப்பனிங் கொண்ட படமாக 'பெட்டி' இடம்பிடித்துள்ளது.
புச்சி பாபு சனா இயக்கத்தில் உருவாகியுள்ள இந்தப் படத்தில் ராம் சரணுடன் முதல்முறையாக ஜான்வி கபூர் ஜோடி சேர்ந்துள்ளார். ஏற்கனவே ஜூனியர் என்டிஆருடன் 'தேவரா: பார்ட் 1' படத்தில் நடித்த ஜான்விக்கு, ராம் சரணுடனான இந்த கூட்டணி பெரிய திருப்புமுனையாக அமைந்துள்ளது. படத்தில் விஜய் சேதுபதி, போமன் இரானி, திவ்யேந்து மற்றும் ஜகபதி பாபு ஆகியோர் முக்கிய கதாபாத்திரங்களில் நடித்துள்ளனர். கிராமத்துப் பின்னணியிலான இந்த ஆக்ஷன் கலந்த கதையில், ராம் சரணின் நடிப்பு, நடனம் மற்றும் எமோஷனல் காட்சிகள் ரசிகர்களை வெகுவாகக் கவர்ந்துள்ளதாக விமர்சனங்கள் எழுந்துள்ளன. கடந்த ஜூன் 5, 2026 அன்று திரையரங்குகளில் வெளியான இந்தப் படம், வரும் நாட்களில் இன்னும் பல சாதனைகளை முறியடிக்கும் என எதிர்பார்க்கப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
