நடிகர் ரன்வீர் - க்கு ஆதரவளிக்கும் திரை பிரபலங்கள் பட்டியலில் இணைந்த தி காஷ்மீர் ஃபைல்ஸ் இயக்குனர்...!

நடிகர் ரன்வீர் சிங் - இன் போட்டோஷூட் பற்றி புகார் அளிக்கப்பட்டு எஃப்.ஐ.ஆர் பதிவு செய்யப்பட்டுள்ள நிலையில், பல திரை பிரபலங்கள் ரன்வீருக்கு ஆதரவு தெரிவித்து வருகின்றனர்.
நடிகர் ரன்வீர் - க்கு ஆதரவளிக்கும் திரை பிரபலங்கள் பட்டியலில் இணைந்த தி காஷ்மீர் ஃபைல்ஸ் இயக்குனர்...!

நடிகர் ரன்வீர் சிங் :   

பிரபல பாலிவுட் நடிகர் ரன்வீர் சிங், தான் பங்கேற்கும் அனைத்து நிகழ்ச்சிகளிலும் ரசிகர்களின் கவனத்தை தன் பக்கம் ஈர்த்து விடுவார். அதனால், பல சர்ச்சைகளிலும் சிக்குவதை வழக்கமாக வைத்திருக்கிறார். நடிகை தீபிகா படுகோனே- வை காதல் திருமணம் செய்த ரன்வீர், தனது ஃபேஷன் திறனை மிகவும் வித்தியாசமான மற்றும் விமர்சனத்திற்குறிய வகையில் அவ்வப்போது வெளிப்படுத்தி வருகிறார். 

சர்ச்சையில் சிக்கிய ரன்வீர் :

ஆனால், சமீப நாட்களாக எந்த சர்ச்சைகளிலும் சிக்காமல் இருந்த நடிகர் ரன்வீர், ஒரு போட்டோஷூட்டை நடத்தி, அந்த புகைப்படத்தை தனது சமூக வலைதளத்தில் பதிவிட்டு, ஒட்டு மொத்த இணைய வாசிகளின் கவனத்தையும் பெற்றுவிட்டார். பிரபல சர்வதேச பதிப்பான தி பேப்பர் மேகசீனின் கவர் புகைப்படத்துக்காக போட்டோஷூட் செய்த ரன்வீர், நிர்வாணமாக போஸ் கொடுத்திருந்தார்.

போட்டோஷூட்டால் சந்தித்த விமர்சனம் : 

அந்த புகைப்படங்கள் இணையத்தில் வைரலாக, பல தரப்பினரிடமிருந்தும் விமர்சனங்கள் வந்துகொண்டுள்ளன. அமெரிக்காவில், தனது தனிப்பட்ட வீடியோக்களும், போட்டோக்களும் பதிவிட்டு இன்று முன்னணி பிரபலங்களில் ஒருவராக இருக்கும் கார்டேஷியன்களைப் போல, ரன்வீரும் ஆக முயற்சி செய்கிறார் என்றெல்லாம் விமர்சித்து வரும் நிலையில், அவரது மனைவி தீபிகாவையும்  நெட்டிசன்கள் மோசமாக கேலி செய்து வருகின்றனர். ஆனால், ஒரு சிலர், தைரியமாக இப்படி ஒரு போட்டோஷூட் நடத்தியதாக ரன்வீருக்கு தங்களது பாராட்டுகளையும் தெரிவித்து வருகின்றனர். 

ரன்வீர் மீது புகார் :

இந்த புகைப்படங்கள் இணையத்தில் வைரலாகி வர, இது போன்ற நிர்வாண புகைப்படங்களை வெளியிட்டதற்காக நடிகர் ரன்வீர் சிங் மீது மும்பை செம்பூர் காவல் நிலையத்தில் புகார் அளிக்கப்பட்டது. இந்நிலையில் நேற்று அவருக்கு எதிராக பதிவு செய்யப்பட்ட புகாரை கவனத்தில் கொண்டு, நடிகர் ரன்வீர் சிங் தனது இன்ஸ்டாகிராம் கணக்கில் நிர்வாண படங்களை வெளியிட்டதற்காக அவர் மீது இபிகோ 292,293,509-ன் படி எஃப்.ஐ.ஆர் பதிவு செய்யப்பட்டுள்ளது. 

ஆதரவளிக்கும் திரை பிரபலங்கள் :

இதனைத் தொடர்ந்து, ரன்வீருக்கு ஆதரவளிக்கும் வகையில், பிரபல பாலிவுட் நடிகை ஆலியா பட், அர்ஜுன் கபூர், ராம் கோபால் வர்மா என பலரும் ஆதரவளித்து வந்த நிலையில், தற்போது தி காஷ்மீர் ஃபைல்ஸ் திரைப்படத்தின் இயக்குனர் விவேக் அக்னிஹோத்ரி ஆதரவு தெரிவித்து பேசியுள்ளார்.    

ஆலியா பட் :

இது குறித்து ஆலியா பட் பேசும் போது, தனக்குப் பிடித்த ரன்வீர் குறித்த எந்த ஒரு தவறான கருத்துகளையும் தான் ஆதரிக்க மாட்டேன் எனவும், தனக்கு அவரை மிகவும் பிடிக்கும் எனவும் பேசினார். மேலும் பேசிய அவர், ரன்வீர் அனைவருக்கும் பிடித்தமான மனிதர் என பேசி இருந்தார். 

இயக்குனர் ராம் கோபால் வர்மா :

இதுகுறித்து பேசிய இயக்குனர் ராம் கோபால் வர்மா, பாலின சமத்துவத்திற்கான நீதியைக் கோருவது அவரது வழி என நினைத்துக் கொள்ளுங்கள் என்றும் பெண்கள் தங்கள் கவர்ச்சியான உடலை காட்டிக்கொள்ளும் போது, ஏன் ஆண்களால் காட்ட முடியாது, ஆண்களை வேறு தரத்தில் மதிப்பிடுவது பாசாங்குத்தனம். என்றும் பெண்களைப் போலவே ஆண்களுக்கும் பல சம உரிமைகள் இருக்க வேண்டும் என பேசி இருந்தார். 

இயக்குனர் விவேக் அக்னிஹோத்ரி :

இதுகுறித்து பேசிய தி காஷ்மீர் ஃபைல்ஸ் திரைப்படத்தின் இயக்குனர் விவேக் அக்னிஹோத்ரி, “இது மிகவும் முட்டாள்தனமான எஃப்ஐஆர். எந்த காரணமும் இல்லாமல் கவனத்தை ஈர்க்கும் ஒரு வேடிக்கையான வழக்கு இது. பெண்களின் உணர்வு புண்படுத்தப்படுவதாக எஃப்ஐஆரில் குறிப்பிடப்பட்டுள்ளது. பெண்களின் நிர்வாணப் படங்கள் அதிகமாக இருக்கும்போது, ​​அது ஆண்களின் மனதைப் புண்படுத்துமா? இது மிகவும் முட்டாள்தனமான வாதம்.

நமது கலாச்சாரத்தில் மனித உடல் எப்போதும் மதிக்கப்படுகிறது. மனித உடல் இறைவனின் மிக அழகான படைப்பு என்று நான் கூறுவேன். அதில் என்ன தவறு? எனக்கு அப்படிப்பட்ட விஷயங்கள் பிடிக்காது. நான் ஆதரிக்காத பழமைவாத சிந்தனையை இது காட்டுகிறது." என பேசியுள்ளார். 

logo
Malaimurasu Seithigal TV
www.malaimurasu.com