.png)
வாழ்க்கையில் சில கனவுகள் நமக்காக உருவாகின்றன. இன்னும் சில கனவுகள் நம்மை நேசித்தவர்களின் ஆசைகளை நிறைவேற்றுவதற்காக உருவாகின்றன. அப்படிப்பட்ட ஒரு கனவை நிறைவேற்றுவதற்காக தனது வாழ்க்கையின் பெரும்பகுதியை அர்ப்பணித்து, 59 வயதிலும் கடுமையாக உழைத்து வருகிறார் மேற்கு வங்கத்தைச் சேர்ந்த டோலி ராணா. மறைந்த தனது தந்தையின் ஆசையை நிறைவேற்றுவதற்காகப் பேருந்து வாங்கிய அவர், இன்று அதே பேருந்தைக் காப்பாற்றுவதற்காகத் தானே நடத்துநராகப் பணியாற்றி வருகிறார். வயது, குடும்பச் சூழல், பொருளாதார நெருக்கடி எனப் பல தடைகள் வந்தாலும் மனம் தளராமல் போராடும் அவரது வாழ்க்கை தற்போது பலரது கவனத்தையும் பாராட்டையும் பெற்றுள்ளது.
மேற்கு வங்க மாநிலம் ஹவுரா பகுதியின் பெல்காசியா பகுதியில் வசித்து வருபவர் டோலி ராணா. அவரது தந்தை சுரேஷ் கோஷுக்கு சொந்தமாக ஒரு பேருந்து வாங்கி நடத்த வேண்டும் என்பது நீண்டகால ஆசையாக இருந்துள்ளது. அதற்காகத் தனது வாழ்நாள் முழுவதும் சிறுகச் சிறுகப் பணத்தைச் சேமித்துள்ளார். ஆனால், பல்வேறு குடும்பச் சூழ்நிலைகள் மற்றும் பொருளாதாரப் பிரச்சினைகளால் அவரது கனவு நிறைவேறாமல் போனது. இந்த ஆசை நிறைவேறாததால் அவர் மிகுந்த மனவேதனை அடைந்ததாகவும் குடும்பத்தினர் தெரிவித்துள்ளனர். தந்தையின் அந்தக் கனவை எப்படியாவது நிறைவேற்ற வேண்டும் என்று டோலி ராணா முடிவு செய்தார். இதற்காக தனது சகோதரர் மற்றும் சகோதரியுடன் இணைந்து குடும்பத்தில் இருந்த நகைகளை விற்றும், கடன் பெற்றும் 2017ஆம் ஆண்டு ஒரு பழைய பேருந்தை வாங்கினார்.
தந்தையின் கனவு நனவான மகிழ்ச்சி குடும்பத்தினருக்கு இருந்தாலும், அடுத்தடுத்த ஆண்டுகளில் பல சவால்கள் காத்திருந்தன. பேருந்து வாங்கிய பிறகு அதன் பராமரிப்புச் செலவு, டீசல் செலவு, ஓட்டுநர் மற்றும் நடத்துநருக்கான சம்பளம் எனத் தொடர்ந்து பணம் தேவைப்பட்டது. இதனுடன் வாங்கிய கடனுக்கான மாதத் தவணையையும் செலுத்த வேண்டியிருந்தது. ஆரம்பத்தில் பேருந்தை இயக்குவதற்காக ஓட்டுநர் மற்றும் நடத்துநர்களை நியமித்தார் டோலி. ஆனால், சில நடத்துநர்கள் வசூலிக்கும் பணத்தில் முறைகேடு செய்ததாகவும், இதனால் அவருக்கு நஷ்டம் ஏற்பட்டதாகவும் தகவல்கள் தெரிவிக்கின்றன. பேருந்து வாங்கிய மகிழ்ச்சி மெல்ல மெல்லப் பொருளாதாரச் சுமையாக மாறியது.
இதற்கிடையில் கொரோனா பெருந்தொற்று உலகையே முடக்கியது. பொதுப் போக்குவரத்துத் துறை கடுமையாகப் பாதிக்கப்பட்டதால் தனியார் பேருந்து உரிமையாளர்களின் வருமானமும் சரிந்தது. பேருந்துகளை இயக்க முடியாத சூழல் ஏற்பட்டதால் பலரும் கடன் சுமையில் சிக்கினர். டோலி ராணாவின் குடும்பத்திற்கும் இந்தப் பாதிப்பு ஏற்பட்டது. வருமானம் குறைந்தாலும் கடன் தவணை, பராமரிப்புச் செலவு போன்றவை தொடர்ந்து சுமையாக இருந்தன. இதனால் பேருந்தை விற்றுவிடலாம் என்று அவருக்கு நெருக்கமானவர்கள் பலரும் அறிவுறுத்தினர். ஆனால், தந்தையின் கனவை நினைவுபடுத்தும் அந்தப் பேருந்தை விற்பனை செய்ய அவர் விரும்பவில்லை. எப்படியாவது அதைக் காப்பாற்ற வேண்டும் என்பதில் உறுதியாக இருந்தார்.
அதன்பிறகு 2021ஆம் ஆண்டு டோலி ராணா தனது வாழ்க்கையில் யாரும் எதிர்பார்க்காத ஒரு முடிவை எடுத்தார். பேருந்துக்கு நடத்துநர் கிடைக்காத சூழலும், வருமான இழப்பும் தொடர்ந்ததால் தானே நடத்துநராகப் பணியாற்றத் தொடங்கினார். இதுவரை பேருந்தின் உரிமையாளராக நிர்வாகப் பொறுப்புகளை மட்டுமே கவனித்து வந்த அவர், இப்போது பயணிகளிடம் கட்டணம் வசூலிப்பது, பயணச்சீட்டு வழங்குவது, பயணிகள் ஏறி இறங்க உதவுவது என அனைத்துப் பணிகளையும் மேற்கொள்ள வேண்டிய நிலை ஏற்பட்டது. ஆரம்பத்தில் நடத்துநருக்குத் தேவையான பை கூட அவரிடம் இல்லை. பயணிகளிடம் வசூலிக்கும் பணத்தைத் தனது சேலையின் முந்தானையில் வைத்துக்கொண்டு பணியாற்றியதாக அவர் நினைவுகூர்ந்துள்ளார். பின்னர் இந்தத் தொழிலின் நுணுக்கங்களையும் அனுபவத்தின் மூலம் கற்றுக்கொண்டார்.
ஆண்கள் அதிகமாகப் பணியாற்றும் பேருந்துப் போக்குவரத்துத் துறையில் ஒரு பெண்ணாகத் தொடர்ந்து வேலை செய்வது அவருக்கு எளிதாக இருக்கவில்லை. பயணிகளிடம் கட்டணம் கேட்பது, கூட்ட நெரிசலைச் சமாளிப்பது, பயணிகளுக்கு இடையே ஏற்படும் தகராறுகளைத் தீர்ப்பது எனப் பல பொறுப்புகளை அவர் ஏற்க வேண்டியிருந்தது. சிலர் பெண் என்பதற்காக அவரது திறமையைச் சந்தேகித்துள்ளனர். இன்னும் சிலர் அவரது பணியைப் பார்த்து ஆச்சரியப்பட்டுள்ளனர். இருப்பினும், இதுபோன்ற விமர்சனங்கள் எதுவும் அவரைத் தடுத்து நிறுத்தவில்லை. தனது வேலையை விரும்பிச் செய்வதாகவும், அதை உறுதியுடன் தொடர்வதாகவும் அவர் தெரிவித்துள்ளார்.
டோலி ராணாவின் அன்றாட வாழ்க்கையும் மிகவும் கடினமானது. அதிகாலையிலேயே எழுந்து வேலைக்குத் தயாராகும் அவர், ஹவுராவிலிருந்து கோனா முதல் எஸ்பிளனேட் வரையிலான 57ஆம் எண் பேருந்து வழித்தடத்தில் பணியாற்றுகிறார். பேருந்தில் ஏறும் பயணிகளுக்கு உதவுவது, பயணச்சீட்டுகளை வழங்குவது, நிறுத்தங்களை அறிவிப்பது என நாள் முழுவதும் ஓய்வின்றி வேலை செய்கிறார். காலையில் தொடங்கும் அவரது பணி பல மணி நேரங்கள் நீடிக்கிறது. மாலை நேரம் வரை பல முறை பேருந்தில் பயணம் செய்து பணியாற்ற வேண்டியுள்ளது. வயது 59 ஆனாலும் அவரது உழைப்பில் எந்தத் தொய்வும் இல்லை.
இதற்கிடையில், அவரது பேருந்தின் வருமானத்திற்குப் புதிய சிக்கல்களும் உருவாகின. குறிப்பாக, அந்த வழித்தடத்தில் மின்சார ரிக்ஷாக்களின் எண்ணிக்கை அதிகரித்ததால் குறுகிய தூரப் பயணிகளின் எண்ணிக்கை குறையத் தொடங்கியது. இதனால் பேருந்தின் வருமானம் பாதிக்கப்பட்டது. பழைய பேருந்தைச் சீரமைப்பதற்கான செலவுகளும் அதிகரித்தன. இந்தப் பிரச்சினைகளுக்கு ஒரு தீர்வு கிடைக்க வேண்டும் என்பதற்காகப் புதிய வழித்தட அனுமதி பெறுவதற்கான முயற்சியிலும் அவர் ஈடுபட்டார்.
இந்தச் சூழலில் டோலி ராணாவின் வாழ்க்கைப் போராட்டம் குறித்த காணொளி சமூக வலைதளங்களில் பரவலாகப் பகிரப்பட்டது. அவரது கஷ்டங்களையும் தந்தையின் கனவை நிறைவேற்றுவதற்காக அவர் மேற்கொண்ட முயற்சிகளையும் பார்த்த பலரும் ஆதரவு தெரிவித்தனர். இந்தக் காணொளி சம்பந்தப்பட்ட அதிகாரிகளின் கவனத்திற்கும் சென்றது. அவரது கோரிக்கையைத் தொடர்ந்து மேற்கு வங்க போக்குவரத்துத் துறை அதிகாரி ஒருவர் அவரைத் தொலைபேசியில் தொடர்புகொண்டு புதிய வழித்தட அனுமதி வழங்கப்பட்ட தகவலைத் தெரிவித்ததாக 'தி பெட்டர் இந்தியா' வெளியிட்ட செய்தியில் குறிப்பிடப்பட்டுள்ளது. இந்த அனுமதி அவரது பேருந்து வருமானத்தை மீண்டும் அதிகரிக்க உதவும் ஒரு முக்கியமான வாய்ப்பாக அமைந்தது.
இன்று டோலி ராணா ஒரு பேருந்து நடத்துநராக மட்டுமல்லாமல், தனது சொந்தப் பேருந்தின் உரிமையாளராகவும் அடையாளம் காணப்படுகிறார். ஆண்கள் மட்டுமே அதிகமாகப் பணியாற்றும் ஒரு துறையில் தனது உழைப்பால் தனக்கென ஓர் இடத்தை உருவாக்கியுள்ளார். சமீபத்தில் கொல்கத்தாவில் நடைபெற்ற 'பஸ் யாத்ரா 4.0' நிகழ்ச்சியிலும் பெண் போக்குவரத்துப் பணியாளர்களின் பங்களிப்பை அங்கீகரிக்கும் வகையில் அவர் கௌரவிக்கப்பட்டார். அவரது பயணம் பல பெண்களுக்கு ஊக்கமளிக்கும் கதையாக மாறியுள்ளது.
ஒரு தந்தையின் நிறைவேறாத ஆசையைத் தனது வாழ்க்கையின் இலக்காக மாற்றிக்கொண்ட டோலி ராணா, பல சவால்களையும் தாண்டி தொடர்ந்து பயணித்து வருகிறார். வயது என்பது சாதிப்பதற்குத் தடையல்ல என்பதையும், மனதில் உறுதியும் உழைப்பும் இருந்தால் எந்த நிலையிலும் புதிய பாதையை உருவாக்க முடியும் என்பதையும் அவரது வாழ்க்கை எடுத்துக்காட்டுகிறது. தனது தந்தையின் கனவுக்காகத் தொடங்கிய இந்தப் பயணத்தை, எந்தச் சூழலிலும் கைவிடப்போவதில்லை என்பதே அவரது வாழ்க்கை சொல்லும் மிகப்பெரிய செய்தியாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்