Bike Taxi-யில் கொடுக்கும் ஹெல்மெட்டை பயன்படுத்தலாமா? பயணிகள் கவனிக்க வேண்டிய விஷயங்கள்!

அடிக்கடி சுத்தம் செய்யப்படாத ஹெல்மெட்டுகளில் கிருமிகளின் எண்ணிக்கையும் அதிகமாக இருந்ததாக ஆய்வு சுட்டிக்காட்டியது...
Bike Taxi-யில் கொடுக்கும் ஹெல்மெட்டை பயன்படுத்தலாமா? பயணிகள் கவனிக்க வேண்டிய விஷயங்கள்!
Published on: 
Updated on: 
2 min read

நகரங்களில் போக்குவரத்து நெரிசல் நாளுக்கு நாள் அதிகரித்து வரும் நிலையில், குறுகிய தூரப் பயணங்களுக்கு பைக் டாக்ஸி சேவையை பலரும் பயன்படுத்தி வருகின்றனர். மொபைல் செயலியில் சில நிமிடங்களில் பைக் டாக்ஸியை முன்பதிவு செய்து, விரைவாகச் செல்ல வேண்டிய இடத்தை அடைந்துவிட முடிகிறது. ஆனால், இந்தப் பயணத்தின்போது பலரும் கவனிக்கத் தவறும் ஒரு முக்கியமான விஷயம், ஓட்டுநர் வழங்கும் ஹெல்மெட். ஒரே ஹெல்மெட்டை ஒரு நாளில் பலர் பயன்படுத்தும் சூழலில், அதன் சுத்தம் மற்றும் சுகாதாரம் குறித்த கேள்விகள் எழுந்துள்ளன.

ஒருவருக்குச் சொந்தமான ஹெல்மெட்டை அவரே தொடர்ந்து பயன்படுத்துவதால், அதை எப்போது சுத்தம் செய்ய வேண்டும், எப்படி பராமரிக்க வேண்டும் என்பதை அவரால் கவனிக்க முடியும். ஆனால், பைக் டாக்ஸி சேவையில் வழங்கப்படும் ஹெல்மெட்டை பல்வேறு நபர்கள் அடுத்தடுத்து பயன்படுத்துகின்றனர். ஒவ்வொருவரின் தலையிலும் இருக்கும் வியர்வை, எண்ணெய்ப் பசை, தூசி போன்றவை ஹெல்மெட்டின் உட்புறப் பகுதியில் படிய வாய்ப்புள்ளது. இதனை முறையாகச் சுத்தம் செய்யாமல் தொடர்ந்து பயன்படுத்தினால், பாக்டீரியா மற்றும் பூஞ்சை போன்ற நுண்ணுயிரிகள் வளர்வதற்கான சூழல் ஏற்படலாம்.

இதுகுறித்து 2021-ம் ஆண்டு 'Microorganisms' என்ற அறிவியல் இதழில் வெளியான ஆய்வு ஒன்றில், நேபாளத்தில் மோட்டார் சைக்கிள் ஓட்டுநர்கள் பயன்படுத்திய 130 ஹெல்மெட்டுகள் ஆய்வு செய்யப்பட்டன. அதில் மொத்தம் 392 வகையான பாக்டீரியாக்களும், 346 வகையான பூஞ்சைகளும் கண்டறியப்பட்டதாகத் தெரிவிக்கப்பட்டது. மேலும், தனிப்பட்ட முறையில் பயன்படுத்தப்படும் ஹெல்மெட்டுகளைவிட பலர் பகிர்ந்து பயன்படுத்தும் ஹெல்மெட்டுகளில் நுண்ணுயிரிகளின் செயல்பாடு அதிகமாக இருந்தது தெரியவந்தது. அடிக்கடி சுத்தம் செய்யப்படாத ஹெல்மெட்டுகளில் கிருமிகளின் எண்ணிக்கையும் அதிகமாக இருந்ததாக ஆய்வு சுட்டிக்காட்டியது.

அதேநேரத்தில், ஹெல்மெட்டில் நுண்ணுயிரிகள் இருப்பதாலேயே அதை அணியும் அனைவருக்கும் தொற்று ஏற்படும் என்று அர்த்தமில்லை. ஒருவரின் உடல்நிலை, சருமத்தின் தன்மை, ஹெல்மெட்டின் சுத்தம் உள்ளிட்ட பல்வேறு காரணிகளைப் பொறுத்தே பாதிப்பு ஏற்படுவதற்கான வாய்ப்பு அமையும். குறிப்பாக, ஏற்கெனவே தலையில் பொடுகு, சருமப் பிரச்சினைகள் அல்லது தொற்று பாதிப்பு உள்ளவர்கள் சுத்தமற்ற ஹெல்மெட்டுகளைப் பயன்படுத்தும்போது கூடுதல் கவனம் செலுத்த வேண்டும். அழுக்காகவும் ஈரமாகவும் இருக்கும் ஹெல்மெட்டுகள் ஏற்கெனவே உள்ள சருமப் பிரச்சினைகளை அதிகரிக்கக்கூடும்.

பொதுமக்கள் பைக் டாக்ஸியில் பயணிப்பதைத் தவிர்க்க வேண்டும் என்பதல்ல இதன் நோக்கம். பாதுகாப்புக்காக ஹெல்மெட் அணிவதை ஒருபோதும் அலட்சியம் செய்யக்கூடாது. அதேசமயம், அதன் சுகாதாரத்தையும் கவனிக்க வேண்டும் என்பதே மருத்துவ நிபுணர்களின் அறிவுறுத்தலாக உள்ளது. அடிக்கடி பைக் டாக்ஸியில் பயணம் செய்பவர்கள் முடிந்தவரை தங்களுக்கென தனியாக ஒரு ஹெல்மெட்டை வைத்துக்கொள்வது நல்லது. அது சாத்தியமில்லாதபட்சத்தில், ஓட்டுநர் வழங்கும் ஹெல்மெட்டை அணிவதற்கு முன்பு அதன் உட்புறத்தைப் பார்த்துச் சரிபார்க்க வேண்டும்.

ஹெல்மெட் அழுக்காகவோ, ஈரமாகவோ அல்லது துர்நாற்றம் வீசும் வகையிலோ இருந்தால், வேறு சுத்தமான ஹெல்மெட்டைக் கேட்கலாம். ஹெல்மெட்டின் உட்புறத்தில் சேதம் ஏற்பட்டுள்ளதா என்பதையும் கவனிக்க வேண்டும். தலைக்கும் ஹெல்மெட்டுக்கும் இடையில் தனிப்பட்ட சுத்தமான துணி அல்லது உள் அடுக்கைப் பயன்படுத்தலாம். ஆனால், அது ஹெல்மெட் சரியாகப் பொருந்துவதையோ பாதுகாப்புத் தன்மையையோ பாதிக்கக் கூடாது. தனிப்பட்ட ஹெல்மெட்டுகளை மற்றவர்களுடன் பகிர்ந்து பயன்படுத்தினாலும், அதன் உட்புறப் பகுதிகளை முறையாகக் கழுவி முழுமையாக உலர்த்திய பிறகே மீண்டும் பயன்படுத்த வேண்டும்.

பைக் டாக்ஸி ஓட்டுநர்களுக்கும் இதில் முக்கியமான பொறுப்பு உள்ளது. அவர்கள் வழங்கும் ஹெல்மெட்டுகளைத் தொடர்ந்து சுத்தம் செய்வதற்கான முறையான அட்டவணையைப் பின்பற்ற வேண்டும். ஹெல்மெட் தயாரிப்பு நிறுவனம் பரிந்துரைக்கும் வழிமுறைகளின்படி கிருமிநாசினி மூலம் சுத்தம் செய்ய வேண்டும். அதேபோல், ஒவ்வொரு பயன்பாட்டிற்குப் பிறகும் ஹெல்மெட் முழுமையாக உலர்ந்திருப்பதை உறுதி செய்வது அவசியம். ஈரப்பதம் நீடித்தால் நுண்ணுயிரிகள் வளர்வதற்கான வாய்ப்பு அதிகரிக்கலாம்.

ஹெல்மெட்டின் சுத்தத்தைப் போலவே அதன் பாதுகாப்புத் தன்மையும் மிக முக்கியம். தலைக்கு சரியாகப் பொருந்தாத அல்லது பட்டை சரியாகப் பூட்டப்படாத ஹெல்மெட் விபத்தின்போது முழுமையான பாதுகாப்பை வழங்காது. உலக சுகாதார அமைப்பின் தகவலின்படி, முறையாக ஹெல்மெட் அணிவது உயிரிழப்பு அபாயத்தை ஆறு மடங்குக்கும் மேல் குறைக்க உதவுவதுடன், மூளைக் காயம் ஏற்படும் அபாயத்தையும் 74 சதவீதம் வரை குறைக்கக்கூடும். பைக் டாக்ஸியில் பயணம் செய்யும்போது ஹெல்மெட் அணிவது மட்டுமல்லாமல், அது சுத்தமாகவும் நல்ல நிலையில் இருப்பதையும் உறுதி செய்வது அவசியம். பயணிகளும் சேவை வழங்குநர்களும் இணைந்து இந்த விஷயத்தில் கவனம் செலுத்தினால், சாலைப் பாதுகாப்புடன் தனிநபர் சுகாதாரத்தையும் பாதுகாக்க முடியும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.