பதப்படுத்தப்பட்ட உணவுகள் செக்ஸ் ஹார்மோன்களை பாதிக்குமா? புதிய ஆய்வு சொல்லும் திடுக் தகவல்!

பதப்படுத்தப்பட்ட உணவுகள் ஆரோக்கியத்திற்கு நல்லதல்ல என்பதை நாம் அனைவரும் நீண்டகாலமாக கேட்டு வருகிறோம். ஆனால், சமீபத்திய ஓர் ஆய்வு, இந்த உணவுகள் உடல்நலத்திற்கு மட்டுமல்ல, ஆண்களின் இனப்பெருக்கத்திற்கும் தீங்கு விளைவிக்கும் என்று எச்சரிக்கிறது.

ஆய்வு என்ன சொல்கிறது?

'செல் மெட்டபாலிசம்' (Cell Metabolism) என்ற இதழில் வெளியான ஒரு ஆய்வில், பதப்படுத்தப்பட்ட உணவுகளை அதிகம் சாப்பிடும் ஆண்களுக்கு, ஆரோக்கியமான உணவுகளைச் சாப்பிடும் ஆண்களை விட அதிக உடல் எடை மற்றும் கொழுப்பு அதிகரிப்பது கண்டறியப்பட்டுள்ளது. இந்த உணவுகள், உடலின் வளர்சிதை மாற்ற விகிதத்தைப் (metabolic rate) பாதிக்கின்றன.

இந்த ஆய்விற்காக, 20 முதல் 35 வயதுடைய 43 ஆரோக்கியமான ஆண்கள் இரண்டு குழுக்களாகப் பிரிக்கப்பட்டனர்.

முதல் குழு: மூன்று வாரங்களுக்கு அதிகப் பதப்படுத்தப்பட்ட உணவுகளையும், அடுத்த மூன்று வாரங்களுக்கு ஆரோக்கியமான உணவுகளையும் சாப்பிட்டனர்.

இரண்டாம் குழு: அவர்களுக்குத் தேவையானதை விட, ஒரு நாளைக்கு 500 கலோரிகள் அதிகமாகச் சாப்பிடக் கொடுக்கப்பட்டது.

இந்த ஆய்வில், பதப்படுத்தப்பட்ட உணவுகள் ஆண்களின் விந்தணு எண்ணிக்கையை பாதிப்பது கண்டறியப்பட்டது.

அதிக கலோரிகள் மற்றும் பதப்படுத்தப்பட்ட உணவுகளைச் சாப்பிட்ட ஆண்களுக்கு, விந்தணுக்களின் எண்ணிக்கை குறைந்து காணப்பட்டது. இது அவர்களின் கருவுற வைக்கும் திறனைப் பாதிக்கலாம்.

இந்த உணவுகளைச் சாப்பிட்டவர்களுக்கு, விந்தணு உற்பத்திக்கு மிகவும் அவசியமான 'ஃபோலிகல்-தூண்டும் ஹார்மோன்' (FSH) குறைவாக இருந்ததும் கண்டறியப்பட்டது. பதப்படுத்தப்பட்ட உணவுகள், பாலியல் ஹார்மோன்களில் மாற்றங்களை ஏற்படுத்தி, உடல் எடை அதிகரிக்க காரணமாகின்றன.

பதப்படுத்தப்பட்ட உணவுகள் என்றால் என்ன?

பதப்படுத்தப்பட்ட உணவுகள் என்பது, அவற்றின் அசல் வடிவத்திலிருந்து மாற்றப்பட்ட எந்த உணவையும் குறிக்கும். பிரிட்டிஷ் மெடிக்கல் ஜர்னலில் 2016-ல் வெளியிடப்பட்ட ஒரு ஆய்வின்படி, பதப்படுத்தப்பட்ட உணவுகள், சுவையை மேம்படுத்துவதற்காக அதிகப்படியான சர்க்கரை, உப்பு, எண்ணெய் மற்றும் கொழுப்புகள் சேர்க்கப்பட்ட கலவைகளாகும்.

சுருக்கமாகச் சொன்னால், சுத்திகரிக்கப்பட்ட பொருட்கள், கொழுப்புகள், சர்க்கரைகள், உப்பு மற்றும் சேர்க்கைகள் கொண்டு தயாரிக்கப்பட்ட எதுவும் பதப்படுத்தப்பட்ட உணவுகள்தான். பதப்படுத்தப்பட்ட உணவுகளில் இவை அடங்கும்,

இனிப்பு சேர்த்த காலை உணவு தானியங்கள்

சோடா பானங்கள்

சுவையூட்டப்பட்ட உருளைக்கிழங்கு சிப்ஸ்

வெள்ளை ரொட்டி (white bread)

ஃபிரைடு சிக்கன்

சுவையூட்டப்பட்ட சாக்லேட் பார்கள்

உறைந்த, கலந்த காபி

எனர்ஜி பானங்கள்

சுவையூட்டப்பட்ட க்ரானோலா பார்கள்

செயற்கை சுவையூட்டப்பட்ட சீஸ் க்ராக்கர்கள்

அமெரிக்க உணவு மற்றும் மருந்து நிர்வாகம் (FDA), இந்த உணவுகள் இதய நோய், டைப் 2 நீரிழிவு மற்றும் உடல் பருமன் போன்ற பல நாள்பட்ட நோய்களுக்கு வழிவகுக்கும் என்று எச்சரிக்கிறது. எனவே, உங்கள் ஆரோக்கியத்தைப் பாதுகாக்க, பதப்படுத்தப்பட்ட உணவுகளைத் தவிர்ப்பது நல்லது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.