காரை ஓட்டினால் கழுத்து வலி கடுமையாகத் துரத்துகிறதா? ஓர் ஆபத்தான அறிகுறி!

அதிக நேரம் கார் ஓட்டும் பலருக்குக் கழுத்து வலி, தோள்பட்டை வலி போன்றவை வருவது இப்போது சாதாரணமாகிவிட்டது. ஆனால், இதைச் சாதாரணமாக நினைக்காமல் கடந்து போனால், அது உடலுக்குள் பெரிய உடல்நலப் பிரச்சினைகளை ஏற்படுத்தலாம் என்று மருத்துவர்கள் மற்றும் உடல் அமைப்பு ஆய்வாளர்கள் (எர்கோனாமிக்ஸ் ஆராய்ச்சியாளர்கள்) கடுமையான எச்சரிக்கை விடுத்துள்ளனர். தவறான முறையில் கார் ஓட்டுவது, இருக்கையைச் சரியாக வைக்காமல் இருப்பது மற்றும் தேவையான ஓய்வு எடுக்காமல் இருப்பது போன்றவைதான் இந்தக் கழுத்து வலிக்கு முக்கியமான காரணங்கள்.

கார் ஓட்டும்போது கழுத்து வலி வர முதல் காரணம், நாம் உட்காரும் நிலை சரியில்லாமல் இருப்பதுதான். இருக்கைக்கும் ஸ்டீயரிங் வீலிற்கும் இடையே உள்ள தூரம் ரொம்பவும் குறைவாகவோ அல்லது அதிகமாகவோ இருந்தால், கழுத்தில் உள்ள தசைகள் இயல்பாக இல்லாமல், தொடர்ந்து இறுக்கமடையும். இதனால், முதுகெலும்பில் அதிக அழுத்தம் உண்டாகி, கழுத்து மற்றும் தோள்பட்டைப் பகுதிகளில் வலி அதிகமாகும். அதோடு, இருக்கையில் நாம் தலை சாய்த்து வைக்கும் பகுதி (ஹெட்ரெஸ்ட்) சரியாக அமையாமல் இருந்தால், திடீரென மேடுபள்ளங்களில் போகும்போதோ அல்லது விபத்து நேரும்போதோ கழுத்து எலும்புகள் பெரிய பாதிப்புக்குள்ளாகலாம்.

இந்தப் பிரச்சினையில் இருந்து தப்பிக்க, நாம் கார் ஓட்டும் முறையில் உடனடியாகச் சில மாற்றங்களைக் கொண்டு வர வேண்டும். முதலில், இருக்கையைச் சரிசெய்து, கால்கள் ஆக்ஸ்லேட்டரை எளிதாக மிதிக்கக்கூடிய தூரத்தில் இருக்கிறதா என்று பாருங்கள். இதைவிட முக்கியம், இருக்கையைச் சற்று சாய்வாக அமைத்துக் கொள்வது. இப்படிச் செய்தால், நம் உடலின் எடையானது இடுப்பு மற்றும் முதுகுப் பகுதிகளில் சமமாகப் பிரிந்து, கழுத்தின் மீது விழும் சுமை குறையும். முதுகு மற்றும் கழுத்து நேராக இருக்கும்படி பார்த்துக்கொள்ளுங்கள். மேலும், தலைக்கு வைக்கும் பகுதி உங்கள் தலையின் நடுப்பகுதிக்குச் சரியாக நேராக இருக்க வேண்டும். இதுதான் கழுத்துக்கு முழுப் பாதுகாப்பை உறுதி செய்யும்.

இரண்டாவதாக, நாம் ஸ்டீயரிங் வீல் பிடிக்கும் தூரம் மற்றும் உயரம் சரியாக இருக்க வேண்டும். அதனை திருப்பும்போது தோள்பட்டையைத் தூக்க வேண்டிய அவசியம் வரக் கூடாது. கைகள் சற்று வளைந்த நிலையில் ஸ்டீயரிங் வீல்-ஐ பிடிப்பதுதான் சரியானது. ஸ்டீயரிங் வீல்-ஐ எட்ட முடியாமல் கைகளை நீட்டி ஓட்டினால், அது கழுத்து மற்றும் தோள்பட்டை தசைகளில் தேவையற்ற அழுத்தத்தை உண்டாக்கி, வலியை அதிகரிக்கும்.

நீங்கள் நீண்ட தூரம் பயணம் செய்ய நேரிட்டால், இரண்டு மணி நேரத்திற்கு ஒருமுறை காரை நிறுத்தி, கொஞ்ச நேரம் உடலைக் கைகால்களை நீட்டி, கழுத்துக்கான சிறு சிறு பயிற்சிகளைச் செய்வது மிகவும் நல்லது. கழுத்தை மெதுவாக மேலும் கீழும், பக்கவாட்டிலும் திருப்பிப் பயிற்சி செய்தால், தசை இறுக்கம் குறையும். கழுத்து வலி விடாமல் தொந்தரவு செய்தால், உடனே மருத்துவரைப் பார்ப்பது அவசியம். ஏனெனில், இது கழுத்தெலும்புத் தேய்மானம் (சர்வைகல் ஸ்பான்டைலிடிஸ்) போன்ற தீவிரமான நோய்களின் அறிகுறியாகக்கூட இருக்கலாம். இருக்கையைச் சரியாக அமைத்து, ஓட்டுவதற்கு இடையே சரியான ஓய்வு எடுப்பதன் மூலம் இந்தக் கழுத்து வலியில் இருந்து நீங்கள் நிச்சயம் தப்பிக்க முடியும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.