.png)
இனிப்பு என்றாலே எல்லோருக்கும் பிடிக்கும். அதிலும், கருப்பட்டி பணியாரம் என்றால், அதன் சுவை மற்றும் மணம் நம்மை இழுக்கும். ஆனால், இது ஒரு பாரம்பரிய உணவு மட்டுமல்ல, சர்க்கரை நோயாளிகளும் மிதமான அளவில் சாப்பிடக்கூடிய ஒரு ஆரோக்கியமான இனிப்புப் பலகாரம் ஆகும். இந்தக் கருப்பட்டி பணியாரம் தயாரிப்பதில் இருக்கும் எளிய ரகசியங்களை இங்கே பார்க்கலாம். இந்த முறையில் பணியாரம் செய்தால், அதன் சுவை அட்டகாசமாக இருக்கும்.
கருப்பட்டி பணியாரம் செய்ய, முதலில் பச்சரிசி மாவைத் தயார் செய்ய வேண்டும். பச்சரிசியை இரண்டு மணி நேரம் ஊற வைத்து, பிறகு அதை ஒரு துணியில் உலர்த்தி, நைஸாக அரைத்துச் சலித்து எடுத்துக்கொள்ள வேண்டும். அடுத்ததாக, இந்தச் சுவைக்கு ஆணிவேரான கருப்பட்டியைப் பயன்படுத்த வேண்டும். ஒரு பாத்திரத்தில் கருப்பட்டியுடன், சிறிது தண்ணீர் சேர்த்து, அடுப்பில் வைத்துக் கரைக்க வேண்டும். இது பாகு பதம் வர வேண்டிய அவசியம் இல்லை, கருப்பட்டி நன்கு கரைந்தால் போதும். கரைந்த பிறகு, அதை வடிகட்டி, அதில் இருக்கும் தூசிகளை நீக்க வேண்டும். வடிகட்டிய இந்தக் கருப்பட்டிச் சாற்றை, நாம் அரைத்து வைத்திருக்கும் பச்சரிசி மாவில் ஊற்றி, கெட்டியான பதத்தில் கலந்துவிட வேண்டும்.
மாவு மிகவும் கெட்டியாக இருந்தால், சிறிது தண்ணீர் சேர்த்து, தோசை மாவு பதத்தை விடக் கொஞ்சம் கெட்டியாக வைத்துக் கொள்ள வேண்டும். இத்துடன், பணியாரத்தின் சுவையைக் கூட்ட, ஏலக்காய்த் தூள் மற்றும் சின்ன சின்னதாக நறுக்கிய தேங்காய்த் துண்டுகளைச் சேர்ப்பது அவசியம். தேங்காய்த் துண்டுகள் பணியாரத்தைச் சாப்பிடும்போது ஒரு மெல்லிய மொறுமொறுப்பைக் கொடுக்கும். இந்தக் கலவையை நன்றாகக் கலந்து, மூன்று நாட்கள் வரை துணியால் மூடி வெளியில் வைத்த பிறகு, பணியாரம் சுட்டால் சுவை இன்னும் அதிகமாக இருக்கும். மாவு புளிக்காமல் இருக்கக் கவனமாகப் பார்த்துக்கொள்ள வேண்டும்.
இறுதியாக, பணியாரக் கல்லில் சிறிது எண்ணெய் அல்லது நெய் ஊற்றி, மாவைச் சிறு சிறு குழிகளில் ஊற்ற வேண்டும். அடுப்பை மிதமான தீயில் வைத்து, இருபுறமும் பொன்னிறமாகும் வரை வேக வைத்து எடுத்தால், சுவையான கருப்பட்டி பணியாரம் ரெடி!
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
