கடலை மிட்டாய் என 'ஆகச்சிறந்த' ஸ்நாக்ஸாக உள்ளது?

தமிழ்நாட்டு தெருக்களில், குறிப்பாக கோவில்பட்டி, திண்டுக்கல், சாத்தூர் போன்ற ஊர்களில், கடலை மிட்டாய் என்றாலே மனதில் ஒரு இனிமையான நினைவு தோன்றும். 90களில் பள்ளி முடிந்து, ஒரு ரூபாய்க்கு ஒரு சிறு துண்டு கடலை மிட்டாய் வாங்கி, மொறு மொறுவென கடித்து சாப்பிட்ட நினைவு இன்றும் பலருக்கு பசுமையாக இருக்கும். ஆனால், இந்த கடலை மிட்டாய் வெறும் சுவையான ஸ்நாக்ஸ் மட்டுமல்ல; இது ஆரோக்கியத்தின் பொக்கிஷமாகவும் திகழ்கிறது.

கடலை மிட்டாயின் தோற்றமும் வரலாறும்

கடலை மிட்டாய், தமிழ்நாட்டின் தூத்துக்குடி மாவட்டத்தில் உள்ள கோவில்பட்டியில் உருவான ஒரு பாரம்பரிய இனிப்பு. நிலக்கடலை (வேர்க்கடலை) மற்றும் வெல்லத்தை முக்கிய பொருட்களாகக் கொண்டு தயாரிக்கப்படும் இந்த ஸ்நாக்ஸ், ‘சிக்கி’ (Chikki) என்ற பெயரில் வட இந்தியாவிலும், ‘குர் பதாம்’ என்ற பெயரில் வங்காளத்திலும், ‘லயி’ என்ற பெயரில் பாகிஸ்தானின் சிந்து மாகாணத்திலும் பிரபலமாக உள்ளது. தமிழ்நாட்டில், குறிப்பாக கோவில்பட்டியில், கடலை மிட்டாய் ஒரு கலாச்சார அடையாளமாகவே மாறியுள்ளது.

கோவில்பட்டியின் கரிசல் மண்ணில் விளையும் நிலக்கடலையில் இயற்கையாகவே ஒரு இனிப்பு சுவை இருப்பதாக கூறப்படுகிறது. இந்த நிலக்கடலையை வறுத்து, உருகிய வெல்லத்துடன் கலந்து, மெல்லிய தட்டுகளாக வெட்டி தயாரிக்கப்படுகிறது கடலை மிட்டாய். 100 ஆண்டுகளுக்கு மேலாக, கோவில்பட்டி மற்றும் திண்டுக்கல் தங்கமணி போன்ற இடங்களில் உயர்தரமான கடலை மிட்டாய்கள் தயாரிக்கப்பட்டு வருகின்றன.

ஊட்டச்சத்து மதிப்பு: ஒரு ஆரோக்கிய பொக்கிஷம்

கடலை மிட்டாய் வெறும் இனிப்பு மட்டுமல்ல; இது ஒரு ஊட்டச்சத்து நிறைந்த ஸ்நாக்ஸ். 100 கிராம் கடலை மிட்டாயில் சுமார் 520 கலோரிகள், 15 கிராம் புரதம், 20 கிராம் கொழுப்பு, மற்றும் 45-50 கிராம் மாவுச்சத்து உள்ளது. இதில் உள்ள முக்கிய பொருட்களான நிலக்கடலை மற்றும் வெல்லம், பல்வேறு ஆரோக்கிய நன்மைகளை வழங்குகின்றன.

நிலக்கடலையின் நன்மைகள்

புரதச்சத்து: நிலக்கடலையில் உள்ள புரதம் தசைகளின் வளர்ச்சிக்கும், உடல் பலத்திற்கும் உதவுகிறது. இது குழந்தைகள் முதல் பெரியவர்கள் வரை அனைவருக்கும் ஏற்றது.

நல்ல கொழுப்பு: நிலக்கடலையில் உள்ள மோனோசாச்சுரேட்டட் கொழுப்பு, இதய ஆரோக்கியத்திற்கு பயனளிக்கிறது. இது கெட்ட கொழுப்பைக் (LDL) குறைக்க உதவுகிறது.

வைட்டமின் பி3 (நியாசின்): மூளை வளர்ச்சி, நினைவாற்றல், மற்றும் ரத்த ஓட்டத்தை மேம்படுத்துவதில் நியாசின் முக்கிய பங்கு வகிக்கிறது.

ஆன்டி-ஆக்ஸிடன்ட்கள்: நிலக்கடலையில் உள்ள ஆன்டி-ஆக்ஸிடன்ட்கள் நோய் எதிர்ப்பு சக்தியை அதிகரிக்கின்றன மற்றும் இளமையை பராமரிக்க உதவுகின்றன.

வெல்லத்தின் நன்மைகள்

இரும்புச்சத்து: வெல்லத்தில் உள்ள இரும்பு, ரத்த சோகையை தடுக்க உதவுகிறது. இது குறிப்பாக பெண்களுக்கு மிகவும் பயனுள்ளது.

செரிமானம்: வெல்லம் செரிமானத்தை மேம்படுத்தி, வயிற்றுப் பிரச்சனைகளை தீர்க்க உதவுகிறது.

வெல்லம் உடலில் பித்தத்தை சமநிலைப்படுத்தி, நிலக்கடலையின் வெப்பத்தை குறைக்கிறது, இதனால் தொடர்ந்து உண்ணும்போது எந்த பக்க விளைவுகளும் ஏற்படுவதில்லை.

கடலை மிட்டாய் ஒரு ஆகச்சிறந்த ஸ்நாக்ஸ் ஆக இருப்பது ஏன்?

ஊட்டச்சத்து மிகுதி: புரதம், நல்ல கொழுப்பு, இரும்பு, கால்சியம், மற்றும் பாஸ்பரஸ் போன்ற கனிமங்கள் நிறைந்திருப்பதால், இது குழந்தைகளுக்கு மட்டுமல்ல, பயணிகள், வேலை பளு உள்ளவர்கள், மற்றும் உணவு வேளைகளை தவறவிடுபவர்களுக்கு ஏற்றது.

கடலை மிட்டாயின் மொறு மொறு தன்மையும், வெல்லத்தின் இனிப்பும் இதை அனைவருக்கும் பிடித்தமானதாக ஆக்குகிறது. இது குழந்தைகளுக்கு ஆரோக்கியமான இனிப்பு பண்டமாகவும், பெரியவர்களுக்கு பசியை தணிக்கும் ஸ்நாக்ஸாகவும் உள்ளது.

நீண்ட பயணங்களுக்கு ஏற்றது: எளிதில் கெட்டுப்போகாத இந்த ஸ்நாக்ஸ், பயணங்களுக்கு மிகவும் உகந்தது. இதை எடுத்துச் செல்வது எளிது, மேலும் இது உடனடி ஆற்றலை வழங்குகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்