.png)
இன்று நம்முடைய வங்கிச் கணக்கு முதல் தனிப்பட்ட புகைப்படங்கள் வரை அனைத்தும் ஸ்மார்ட்போனில்தான் இருக்கின்றன. டிஜிட்டல் பரிவர்த்தனைகள் அதிகரித்துள்ள நிலையில், சைபர் குற்றவாளிகளும் புதுப்புது வழிகளில் நம்முடைய பணத்தைத் திருடத் திட்டமிடுகிறார்கள். ஒரு சிறிய லிங்க்கை கிளிக் செய்வதன் மூலமோ அல்லது தெரியாத நபரிடம் ஓடிபி (OTP) எண்ணைச் சொல்வதன் மூலமோ உங்கள் வாழ்நாள் சேமிப்பு மொத்தமும் காணாமல் போக வாய்ப்புண்டு. சைபர் கிரைம் என்பது இப்போது ஒரு மிகப்பெரிய சவாலாக உருவெடுத்துள்ளது. இதிலிருந்து தப்பிக்க நாம் தொழில்நுட்ப ரீதியாக விழிப்புணர்வுடன் இருக்க வேண்டும். உங்கள் போனில் சில முக்கியமான மாற்றங்களைச் செய்வதன் மூலம் திருடர்களிடமிருந்து நீங்கள் தப்பிக்க முடியும்.
முதலாவதாக, உங்கள் மொபைலில் உள்ள அனைத்து வங்கிச் செயலிகள் மற்றும் சமூக வலைதளக் கணக்குகளுக்கு 'டூ-ஃபேக்டர் ஆதெண்டிகேஷன்' (Two-Factor Authentication) வசதியைச் செயல்பாட்டிற்குத் கொண்டு வர வேண்டும். இது உங்கள் பாஸ்வேர்டு மற்றவர்களுக்குத் தெரிந்தாலும், உங்கள் போனுக்கு வரும் ஓடிபி இல்லாமல் அவர்களால் கணக்கைத் திறக்க முடியாது என்ற பாதுகாப்பைத் தரும். இரண்டாவதாக, பொது இடங்களில் கிடைக்கும் இலவச வைஃபை (Public Wi-Fi) வசதியைப் பயன்படுத்தி ஒருபோதும் வங்கிப் பரிவர்த்தனைகளைச் செய்யாதீர்கள். திருடர்கள் அந்த வைஃபை நெட்வொர்க் மூலமாக உங்கள் போனில் உள்ள தகவல்களைத் திருட வாய்ப்புண்டு. மூன்றாவதாக, உங்கள் போனுக்கு வரும் தேவையற்ற எஸ்எம்எஸ் (SMS) அல்லது வாட்ஸ்அப் செய்திகளில் உள்ள லிங்க்களை ஒருபோதும் கிளிக் செய்யாதீர்கள். "உங்களுக்குப் பரிசு விழுந்திருக்கிறது" அல்லது "உங்கள் மின்சார இணைப்பு துண்டிக்கப்படும்" என்று வரும் செய்திகள் பெரும்பாலும் மோசடியாகவே இருக்கும்.
நான்காவதாக, உங்கள் போனில் உள்ள ஆப்களைப் பதிவிறக்கம் செய்யும்போது எப்போதும் கூகுள் பிளே ஸ்டோர் அல்லது ஆப்பிள் ஆப் ஸ்டோர் போன்ற அதிகாரப்பூர்வ தளங்களை மட்டுமே பயன்படுத்துங்கள். இணையதளங்களில் இருந்து நேரடியாக ஏபிகே (APK) கோப்புகளைப் பதிவிறக்கம் செய்வது ஆபத்தானது. ஐந்தாவதாக, உங்கள் போனின் மென்பொருளை (Software Update) எப்போதும் புதிய பதிப்பிற்கு மாற்றுங்கள். போன் நிறுவனங்கள் பாதுகாப்பு ஓட்டைகளைச் சரிசெய்யவே இந்த அப்டேட்டுகளை வழங்குகின்றன. சைபர் கிரைம் போலீஸார் எவ்வளவுதான் நடவடிக்கை எடுத்தாலும், நமது தனிப்பட்ட கவனம் தான் நமக்குப் பாதுகாப்பைத் தரும். ஒரு நிமிடம் காட்டும் பேராசை அல்லது அவசரம் உங்கள் பணத்தை இழக்கச் செய்துவிடும். தொழில்நுட்பத்தைப் பயன்படுத்தும்போது எப்போதும் சந்தேகக் கண் கொண்டு பார்ப்பது உங்களை ஆபத்திலிருந்து காக்கும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
