தோலில் தெரியும் பாதிப்பு மட்டுமல்ல... சொரியாசிஸ் நோய் உடலையும் மனதையும் எப்படிப் பாதிக்கிறது?

தோலில் சிவப்பு நிறத்தில் தடித்த திட்டுகள், வெள்ளை நிறத்தில் உதிரும் செதில்கள், தாங்க முடியாத அரிப்பு... இவை சாதாரண தோல் பிரச்சினைகள் என்று பலரும் நினைக்கலாம். ஆனால், இத்தகைய அறிகுறிகள் சொரியாசிஸ் (Psoriasis) எனப்படும் நீண்டகால தோல் நோயின் அடையாளங்களாக இருக்கலாம். இந்த நோய் தோலை மட்டும் பாதிப்பதில்லை. ஒருவரின் மனநிலை, தூக்கம், தன்னம்பிக்கை, சமூக வாழ்க்கை எனப் பல விஷயங்களிலும் தாக்கத்தை ஏற்படுத்தக்கூடும் என்று மருத்துவர்கள் எச்சரிக்கின்றனர்.

சொரியாசிஸ் என்பது உடலின் நோய் எதிர்ப்பு மண்டலத்தில் ஏற்படும் மாற்றங்களால் உருவாகும் ஒரு பாதிப்பு. பொதுவாக நமது தோல் செல்கள் உருவாகி, வளர்ந்து, பழைய செல்கள் உதிர்வதற்கு சில வாரங்கள் ஆகும். ஆனால், சொரியாசிஸ் பாதிப்பு உள்ளவர்களுக்கு நோய் எதிர்ப்பு மண்டலம் அளவுக்கு அதிகமாகச் செயல்படுவதால், புதிய தோல் செல்கள் மிக வேகமாக உருவாகின்றன. பழைய செல்கள் உதிர்வதற்குள் புதிய செல்கள் தோலின் மேற்பரப்பில் குவிந்துவிடுகின்றன. இதனால் தோலில் தடித்த திட்டுகள் உருவாகின்றன. இவை சிவப்பு அல்லது கருமையான நிறத்தில் காணப்படலாம். அவற்றின் மேல் வெள்ளி நிறத்தில் செதில்கள் படிந்திருப்பது போன்ற தோற்றமும் ஏற்படலாம்.

பொதுவாகத் தலைப்பகுதி, முழங்கை, முழங்கால், முதுகின் கீழ்ப்பகுதி ஆகிய இடங்களில் இந்தப் பாதிப்பு அதிகமாகக் காணப்படும். சிலருக்கு உடலின் மற்ற பகுதிகளிலும் ஏற்படலாம். குடும்பத்தில் பெற்றோர் அல்லது உடன்பிறந்தவர்களுக்கு சொரியாசிஸ் இருந்தால், மற்றவர்களுக்கும் இந்த நோய் ஏற்படுவதற்கான வாய்ப்பு அதிகரிக்கலாம். மரபணு காரணங்களுடன் நோய் எதிர்ப்பு மண்டலத்தின் செயல்பாடுகளும் இதில் முக்கியப் பங்கு வகிக்கின்றன. மேலும், சில நோய்த்தொற்றுகள், மன அழுத்தம், குறிப்பிட்ட மருந்துகள், புகைப்பிடித்தல் மற்றும் தோலில் ஏற்படும் காயங்கள் ஆகியவை ஏற்கெனவே உள்ள பாதிப்பைத் தீவிரப்படுத்தலாம்.

சொரியாசிஸ் குறித்து சமூகத்தில் நிலவும் முக்கியமான தவறான புரிதல், இது ஒருவரிடமிருந்து மற்றொருவருக்குப் பரவும் நோய் என்பதுதான். உண்மையில், சொரியாசிஸ் தொற்றுநோய் அல்ல. பாதிக்கப்பட்ட நபரைத் தொடுவதாலோ, அவருடன் அமர்ந்து பேசுவதாலோ, ஒரே இடத்தைப் பயன்படுத்துவதாலோ இந்த நோய் மற்றவர்களுக்குப் பரவாது. அதேபோல், சரியாகக் குளிக்காதது அல்லது உடலைச் சுத்தமாக வைத்துக்கொள்ளாதது போன்ற காரணங்களால் மட்டுமே இந்த நோய் ஏற்படுவதில்லை. எனவே, பாதிக்கப்பட்டவர்களை ஒதுக்கி வைப்பதும் அவர்களிடம் தவறாக நடந்துகொள்வதும் தேவையற்றது.

இந்த நோய் தோலில் ஏற்படுத்தும் மாற்றங்கள் காரணமாகப் பாதிக்கப்பட்டவர்கள் மனதளவிலும் சிரமங்களைச் சந்திக்கின்றனர். வெளியே செல்லும்போது மற்றவர்கள் தங்களைப் பார்த்து என்ன நினைப்பார்கள் என்ற தயக்கம், உடலில் தெரியும் திட்டுகளை மறைக்க வேண்டும் என்ற எண்ணம், அரிப்பால் இரவில் தூக்கம் பாதிக்கப்படுவது போன்ற பிரச்சினைகள் ஏற்படலாம். இதனால் சிலர் நண்பர்கள் மற்றும் உறவினர்களைச் சந்திப்பதையும் தவிர்க்கத் தொடங்குகின்றனர். வேலை செய்யும் இடத்திலும் தன்னம்பிக்கை குறையலாம். தொடர்ந்து மன உளைச்சல் ஏற்படும்போது பதற்றம் மற்றும் மனச்சோர்வு போன்ற பாதிப்புகளும் உருவாகலாம் என மருத்துவர்கள் தெரிவிக்கின்றனர்.

சொரியாசிஸ் பாதிப்பு உள்ள சிலருக்கு மூட்டுகளிலும் வீக்கம் மற்றும் வலி ஏற்படலாம். இதனை சொரியாட்டிக் ஆர்த்ரைட்டிஸ் (Psoriatic Arthritis) என்று அழைக்கின்றனர். குறிப்பாக, காலையில் எழுந்ததும் மூட்டுகளில் விறைப்புத்தன்மை இருப்பது, விரல்கள் வீங்குவது, தொடர்ந்து மூட்டு வலி ஏற்படுவது போன்ற அறிகுறிகள் தென்பட்டால் அலட்சியம் செய்யக் கூடாது. உடல் பருமன், நீரிழிவு நோய் மற்றும் இதய ரத்த நாளங்கள் தொடர்பான பிரச்சினைகள் ஏற்படும் அபாயமும் சில நோயாளிகளிடம் அதிகமாக இருக்கலாம். எனவே, தோலில் தெரியும் அறிகுறிகளை மட்டும் கவனித்தால் போதாது; உடலின் ஒட்டுமொத்த ஆரோக்கியத்தையும் கண்காணிக்க வேண்டும்.

சொரியாசிஸ் நோயை முழுமையாகக் குணப்படுத்துவதற்கான நிரந்தரத் தீர்வு தற்போது இல்லை. இருப்பினும், சரியான சிகிச்சையின் மூலம் அறிகுறிகளைக் கட்டுப்படுத்தி, பாதிப்பு மீண்டும் தீவிரமடைவதைத் தடுக்க முடியும். நோயின் தீவிரம், பாதிக்கப்பட்டுள்ள உடல் பகுதிகள் மற்றும் நோயாளியின் ஒட்டுமொத்த உடல்நிலை ஆகியவற்றைப் பொறுத்து சிகிச்சை மாறுபடும். லேசான பாதிப்புகளுக்கு மருத்துவர் பரிந்துரைக்கும் தடவும் மருந்துகள் உதவலாம். சிலருக்கு ஒளி சிகிச்சை அல்லது மாத்திரைகள் தேவைப்படலாம்.

மிதமானது முதல் தீவிரமான பாதிப்பு உள்ளவர்களுக்கு உயிரியல் மருந்துகள் (Biologics) எனப்படும் நவீன சிகிச்சை முறைகளும் பயன்படுத்தப்படுகின்றன. இவை நோய் எதிர்ப்பு மண்டலத்தில் வீக்கத்தை ஏற்படுத்தும் குறிப்பிட்ட புரதங்கள் அல்லது செயல்பாடுகளைக் குறிவைத்து செயல்படுகின்றன. குறிப்பாக, IL-23 தடுப்பான்கள் எனப்படும் மருந்துகள் சில நோயாளிகளுக்கு உதவக்கூடும். இந்த வகை சிகிச்சையில் சில மருந்துகளைப் பல வாரங்கள் அல்லது மாத இடைவெளியில் ஊசி மூலம் செலுத்த வேண்டியிருக்கலாம். ஆனால், இவை அனைவருக்கும் பொருந்தும் என்று சொல்ல முடியாது. நோயின் தன்மையைப் பரிசோதித்த பிறகே தோல் மருத்துவர் சரியான சிகிச்சையைத் தேர்வு செய்ய வேண்டும். சிகிச்சையைத் தொடங்குவதற்கு முன்பு சில தொற்றுநோய்களுக்கான பரிசோதனைகளும் தேவைப்படலாம்.

தோலில் பாதிப்பு குறைந்து நன்றாகத் தெரிந்தாலும், மருத்துவரின் ஆலோசனையின்றி சிகிச்சையை நிறுத்தக் கூடாது. அப்படிச் செய்தால் அறிகுறிகள் மீண்டும் அதிகரிக்க வாய்ப்புள்ளது. குறிப்பிட்ட கால இடைவெளியில் மருத்துவரைச் சந்தித்து உடல்நிலையைப் பரிசோதிப்பதும் அவசியம். மேலும், தோல் பாதிப்புடன் மனநலப் பிரச்சினைகளும் இருந்தால் அதுகுறித்தும் மருத்துவரிடம் வெளிப்படையாகப் பேச வேண்டும்.

சொரியாசிஸ் என்பது வெறும் தோல் நோய் மட்டுமல்ல, ஒருவரின் அன்றாட வாழ்க்கையையே பாதிக்கக்கூடிய நீண்டகால உடல்நலப் பிரச்சினை. ஆனால், இதற்காகத் தன்னம்பிக்கையை இழக்கவோ, சமூகத்திலிருந்து விலகியிருக்கவோ தேவையில்லை. சரியான நேரத்தில் தோல் மருத்துவரை அணுகி, தொடர்ந்து சிகிச்சை எடுத்துக்கொள்வதன் மூலம் நோயைக் கட்டுப்படுத்தி இயல்பான வாழ்க்கையை வாழ முடியும். முக்கியமாக, இந்த நோய் தொற்றாது என்ற புரிதல் சமூகத்தில் உருவாக வேண்டும். பாதிக்கப்பட்டவர்களைப் புரிந்துகொண்டு ஆதரிப்பதும் அவர்களின் வாழ்க்கைத் தரத்தை மேம்படுத்த உதவும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.