.png)
செயற்கை நுண்ணறிவு (AI) சாட்பாட்கள் (Chatbots) நம் அன்றாட வாழ்வில் ஷாப்பிங் செய்வது முதல் தேடுதல்கள் வரை அனைத்திலும் உதவி செய்து வருகின்றன. ஆனால், இந்த சாட்பாட்கள் பயனர்களுக்கு உதவுவதை விட, நிறுவனங்களுக்கு லாபம் ஈட்டித் தரும் கருவிகளாக மாறி வருவது தற்போது பெரிய விவாதமாகியுள்ளது. பிரின்ஸ்டன் மற்றும் வாஷிங்டன் பல்கலைக்கழக ஆய்வாளர்கள் நடத்திய ஆய்வில், செயற்கை நுண்ணறிவு நிறுவனங்கள் தங்கள் லாபத்திற்காகப் பயனர்களின் நலன்களை எப்படிப் புறக்கணிக்கின்றன என்பது அதிர்ச்சிகரமாக வெளிவந்துள்ளது. நிறுவனங்கள் பணம் கொடுக்கும் நிறுவனங்களின் பொருட்களைப் பரிந்துரைக்கச் சாட்பாட்களைத் தூண்டுகின்றன. ஒரு பயனர் குறைந்த விலையில் ஒரு பொருளைத் தேடும்போது, அதிக லாபம் தரும் விலையுயர்ந்த பொருளைச் சாட்பாட்கள் பரிந்துரைக்கின்றன.
முந்தைய காலத்து விளம்பரங்களைப் போலல்லாமல், செயற்கை நுண்ணறிவு சாட்பாட்கள் தாங்களாகவே சிந்தித்து முடிவெடுக்கும் திறன் கொண்டவை என்பதால், இந்த மோதல் மிகவும் தீவிரமானது. பயனர்கள் ஒரு தகவலைத் தேடும்போது, அது சாதாரணப் பரிந்துரையா அல்லது கட்டணம் பெற்றுச் செய்யப்படும் விளம்பரமா என்று பிரித்தறிய முடியாத அளவுக்குச் சாட்பாட்கள் மிக நுணுக்கமான விளம்பரங்களைச் செய்கின்றன. குறிப்பாக, நிதி நெருக்கடியில் இருப்பவர்களிடம் அதிக வட்டி வசூலிக்கும் நிறுவனங்களின் சேவைகளைப் பரிந்துரைக்கும் வகையில் சாட்பாட்கள் செயல்படுவது ஆய்வில் உறுதி செய்யப்பட்டுள்ளது. இது போன்ற அபாயகரமான சேவைகளைப் பரிந்துரைக்கும்போது, பயனர்கள் கடன்பொறியில் சிக்க வாய்ப்புள்ளது.
பயனர்களின் வருமானம் மற்றும் சமூக அந்தஸ்தைப் பொறுத்து சாட்பாட்கள் வெவ்வேறு விதமான முடிவுகளை எடுக்கின்றன. அதிக வருமானம் உள்ளவர்களிடம் விலை உயர்ந்த பொருட்களைப் பரிந்துரைப்பதும், குறைந்த வருமானம் உள்ளவர்களிடம் சில நேரங்களில் மோசமான சலுகைகளைத் தருவதும் கண்டறியப்பட்டுள்ளது. சாட்பாட்கள் பயனர்களைப் பற்றிய தனிப்பட்ட தகவல்களைத் தெரிந்து கொண்டு, அதற்கேற்ப தங்கள் பரிந்துரைகளை மாற்றிக்கொள்வது பயனர்களைத் தெரியாமலேயே கையாளும் (Manipulation) முயற்சியாகப் பார்க்கப்படுகிறது. இது போன்ற பாகுபாடான முடிவுகளை எடுக்க சாட்பாட்களுக்கு உரிமை இருக்கிறதா என்ற கேள்வி தற்போது எழுந்துள்ளது.
செயற்கை நுண்ணறிவுத் தொழில்நுட்ப நிறுவனங்கள் லாபம் ஈட்டுவதில் காட்டும் வேகத்தைப் போல, பயனர்களைப் பாதுகாப்பதிலும் விதிகளை உருவாக்க வேண்டும் என்று ஆய்வாளர்கள் வலியுறுத்துகின்றனர். ஏமாற்றாத விளம்பரங்கள், குறைபாடுகளை மறைக்காத தயாரிப்புத் தகவல்கள் மற்றும் கட்டாயம் விளம்பரங்களைத் தெளிவாகக் குறிப்பிடுதல் போன்ற விதிகள் அவசியம். சாட்பாட்கள் தாங்களாகவே விளம்பரங்களை உருவாக்குவதால், இதைக் கண்காணிப்பது அரசுக்கு மிகப்பெரிய சவாலாக இருக்கும். நிறுவனங்களின் பேராசைக்குப் பயனர்கள் பலியாகாமல் இருக்க, தொழில்நுட்ப மற்றும் சட்ட ரீதியான புதிய கட்டுப்பாடுகள் மிக விரைவில் தேவைப்படுகின்றன.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
