AI பயன்பாட்டால் ஊபருக்குப் பண விரயம்! ஊழியர்களுக்குக் கடிவாளம் போட்ட நிறுவனம் - முழு விவரம் இதோ!

செயற்கை நுண்ணறிவு எனப்படும் AI தொழில்நுட்பத்தின் அதீத பயன்பாடு ஊபர் நிறுவனத்திற்குப் பெரிய நிதிச் சிக்கலை ஏற்படுத்தியுள்ளது. நிறுவனத்தின் ஊழியர்கள் AI கருவிகளைத் தடையின்றிப் பயன்படுத்தியதால், அதன் செலவுகள் கட்டுக்கடங்காமல் உயர்ந்தன. இதைக் கட்டுப்படுத்த, ஒவ்வொரு ஊழியரும் ஒரு மாதத்திற்கு AI கோடிங் அசிஸ்டெண்ட் கருவிகளுக்காக அதிகபட்சம் 1,500 டாலர்கள் (இந்திய மதிப்பில் சுமார் 1.43 லட்சம் ரூபாய்) மட்டுமே செலவு செய்ய வேண்டும் என ஊபர் கடுமையான கட்டுப்பாட்டை விதித்துள்ளது. நிறுவனத்தின் தலைமைத் தொழில்நுட்ப அதிகாரி, ஒரு வருடத்திற்கான AI பட்ஜெட்டை வெறும் நான்கு மாதங்களிலேயே ஊழியர்கள் செலவு செய்துவிட்டதாகத் தெரிவித்ததை அடுத்து, இந்த அவசர நடவடிக்கை மேற்கொள்ளப்பட்டுள்ளது.

தொழில்நுட்ப நிறுவனங்கள் AI தொழில்நுட்பத்தை வேகமாகத் தத்தெடுத்து வரும் நிலையில், இந்தச் செலவுகள் நிறுவனத்திற்குச் சரியான பலனைத் தருகிறதா என்ற கேள்வி தற்போது எழுந்துள்ளது. தொடக்கத்தில், ஊழியர்களை அதிகப்படியான AI கருவிகளைப் பயன்படுத்த ஊபர் நிறுவனம் ஊக்குவித்தது. ஊழியர்கள் இடையே போட்டியை உருவாக்கி, AI பயன்பாட்டை அதிகரிக்க அகப் பட்டியல்களையும் (Leaderboards) வெளியிட்டது. ஆனால், இந்த அதிரடி அணுகுமுறை நிறுவனத்தின் நிதி நிலையைப் பாதித்தது. மென்பொருள் பொறியாளர்கள், சாப்ட்வேர் கோடிங் மற்றும் பிழைகளைச் சரிசெய்ய 'குளோட் கோட்' (Claude Code) மற்றும் 'கர்சர்' (Cursor) போன்ற அதிநவீன தளங்களை அதிகம் பயன்படுத்தியதே இந்த அதிகப்படியான செலவிற்குக் காரணம்.

இந்தச் செலவுகளைக் கண்காணிக்க ஊபர் தற்போது ஒரு டிஜிட்டல் டேஷ்போர்டை அறிமுகப்படுத்தியுள்ளது. இதன் மூலம் ஒவ்வொரு ஊழியரும் மாதந்தோறும் எவ்வளவு செலவு செய்கிறார்கள் என்பது துல்லியமாகத் தெரியும். ஒரு ஊழியர் 1,500 டாலர் வரம்பைத் தாண்ட விரும்பினால், அதற்குச் சிறப்பு அனுமதி பெற வேண்டியது கட்டாயமாக்கப்பட்டுள்ளது. AI பயன்பாட்டினால் அன்றாட வாடிக்கையாளர்களுக்கு எந்தவிதமான பெரிய மாற்றமும் அல்லது பயனும் கிடைக்கவில்லை என்பதை நிறுவனத்தின் தலைமைச் செயல்பாட்டு அதிகாரி ஆண்ட்ரூ மெக்டொனால்ட் ஒப்புக்கொண்டுள்ளார். பல நிறுவனங்கள் ஊழியர்களை AI-யில் தேர்ச்சி பெறக் கட்டாயப்படுத்திய நிலையில், மனித உழைப்பால் கிடைக்கும் பலனை விட, AI-ஐ இயக்குவதற்கான செலவு அதிகமாக இருப்பதை இப்போது பல நிறுவனங்கள் உணரத் தொடங்கியுள்ளன.

AI ஏஜென்ட் கருவிகள் ஏன் இவ்வளவு செலவை உருவாக்குகின்றன என்பதற்கு முக்கியக் காரணம் அவற்றின் செயல்பாடுதான். இந்தக் கருவிகள் வெறும் கேள்விகளுக்குப் பதில் அளிப்பதோடு நிறுத்திக்கொள்வதில்லை; மாறாக, சிக்கலான பணிகளைத் தானாகவே முன்னெடுத்துச் செய்கின்றன. ஒரு கோப்பைப் படிப்பது, பரிசோதனை செய்வது அல்லது பிழையைத் திருத்துவது போன்ற ஒவ்வொரு சிறிய பணிக்கும், 'குளோட் 3.5' போன்ற பிரீமியம் ஏஐ மாடல்களை மீண்டும் மீண்டும் அழைக்க வேண்டியுள்ளது. இவ்வாறு ஒவ்வொரு முறையும் தகவல்களைப் பரிமாறும்போது, டோக்கன் அடிப்படையில் கட்டணம் வசூலிக்கப்படுவதால், ஒரு சாதாரணக் கோரிக்கை கூட மிக அதிகச் செலவை ஏற்படுத்துகிறது.

ஊபர் நிறுவனத்தின் இந்த திடீர் பின்வாங்கல், நிறுவனங்களில் தாராளமாக AI-க்குச் செலவு செய்த காலம் முடிவுக்கு வந்துவிட்டதைக் காட்டுகிறது. தொழில்நுட்பத் துறையில் AI மீதான முதலீடு இன்னும் ஒரு விலையுயர்ந்த பரிசோதனையாகவே நீடிக்கிறது. ஊழியர்களின் உற்பத்தித் திறனை விட, இந்த மேம்பட்ட அமைப்புகளை இயக்குவதற்கான செயல்பாட்டுச் செலவு அதிகமாக இருப்பது, எதிர்காலத்தில் நிறுவனங்கள் AI பயன்பாட்டைத் திட்டமிட்டுச் செயல்படுத்த வேண்டிய கட்டாயத்திற்குத் தள்ளியுள்ளது. ஊபர் எடுத்த இந்த முடிவு, மற்ற பெரிய நிறுவனங்களுக்கும் ஒரு எச்சரிக்கையாகப் பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.