மெகா சாதனை! ஆய்வகத்தில் உருவாக்கப்பட்ட உலகின் முதல் மனித தோல்!

தோல் தொடர்பான நோய்களால் பாதிக்கப்பட்டவர்களுக்கு ஒரு நல்ல செய்தி. ஆஸ்திரேலிய விஞ்ஞானிகள், ஆய்வகத்தில் இரத்த நாளங்கள் மற்றும் திசுக்களுடன் செயல்படும் ஒரு முழுமையான மனிதத் தோலை வெற்றிகரமாக உருவாக்கியுள்ளனர். இது, பல ஆண்டுகளாக நீடித்த ஆராய்ச்சிக்குப் பிறகு கிடைத்த மிகப்பெரிய அறிவியல் சாதனையாகும்.

இந்தச் சாதனை ஏன் முக்கியமானது?

உயிரோட்டமான தோல்: குயின்ஸ்லாந்து பல்கலைக்கழகத்தைச் சேர்ந்த விஞ்ஞானிகள் குழு, ஸ்டெம் செல்களைப் (stem cells) பயன்படுத்தி, இரத்த நாளங்கள், ரத்தக் குழாய்கள், முடி நுண்ணறைகள், நரம்புகள், திசு அடுக்குகளைக் கொண்ட ஒரு உயிரோட்டமான மனிதத் தோலை உருவாக்கியுள்ளனர். இது, இதுவரை உருவாக்கப்பட்ட செயற்கை தோல் மாதிரிகளை விட மிகவும் துல்லியமானது.

பல்வேறு நோய்களுக்குத் தீர்வு: இந்த புதிய செயற்கை தோல், சருமம் தொடர்பான நாள்பட்ட மற்றும் மரபணுக் கோளாறுகளான அரிக்கும் தோல் அழற்சி (atopic dermatitis), சோரியாசிஸ் (psoriasis), ஸ்கிளீரோடெர்மா (scleroderma) போன்ற நோய்களுக்குச் சிகிச்சை கண்டறிய உதவும்.

எப்படி இந்தத் தோலை உருவாக்கினார்கள்?

முதலில், மனிதர்களின் தோல் செல்களை மீண்டும் ஸ்டெம் செல்களாக மாற்றுவதன் மூலம் இந்த செயல்முறை தொடங்கியது.

இந்த ஸ்டெம் செல்களை, திசுக்களாக வளர அனுமதித்து, ஆர்கானாய்டுகள் (organoids) எனப்படும் சிறிய அளவிலான தோலை உருவாக்கினர்.

இறுதியாக, இந்த மினி தோல்களில் சிறிய இரத்த நாளங்களைச் சேர்த்தனர். இதன் மூலம், ஆய்வகத்திலேயே ஒரு முழுமையான உயிரோட்டமான தோல் மாதிரி உருவாக்கப்பட்டது.

இந்த ஆராய்ச்சி, ஆறு ஆண்டுகள் நீண்ட கடுமையான உழைப்புக்குப் பிறகு வெற்றி பெற்றுள்ளது. இது, தீக்காயங்களால் பாதிக்கப்பட்டவர்களுக்கு, தோல் ஒட்டுதல் (skin grafts) சிகிச்சைக்கும், பல்வேறு தோல் நோய்களுக்கான புதிய மருந்துகளைப் பரிசோதனை செய்யவும் ஒரு புதிய வழியைத் திறந்துள்ளது. இந்த ஆராய்ச்சி குறித்த விவரங்கள் Wiley Advanced Healthcare Materials என்ற அறிவியல் இதழில் வெளியிடப்பட்டுள்ளன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.