சிங்கப்பூரில் குறையும் வேலைவாய்ப்பு வளர்ச்சி! மனிதவள அமைச்சகம் விடுத்துள்ள முக்கிய எச்சரிக்கை!

சிங்கப்பூரில் 2026 ஆம் ஆண்டின் முதல் காலாண்டில் வேலைவாய்ப்பு வளர்ச்சி கடந்த காலாண்டை விடக் குறைந்துள்ளதாக மனிதவள அமைச்சகம் (MOM) வியாழக்கிழமை தெரிவித்துள்ளது. இருப்பினும், தொடர்ந்து 18 வது காலாண்டாக வேலைவாய்ப்பு வளர்ச்சி கண்டுள்ளதால் தொழிலாளர் சந்தை இன்னும் வலுவாகவே இருப்பதாக அமைச்சகம் தனது அறிக்கையில் குறிப்பிட்டுள்ளது. மத்திய கிழக்கு நாடுகளுக்கு இடையேயான போர் பதற்றம் காரணமாக, வரும் நாட்களில் வேலைவாய்ப்பு வளர்ச்சி மேலும் குறையக்கூடும் என்று சிங்கப்பூர் நிதி ஆணையம் ஏற்கனவே எச்சரித்துள்ளது.

நடப்பு ஆண்டின் முதல் காலாண்டில் மொத்த வேலைவாய்ப்பு 5,000 ஆக அதிகரித்துள்ளது. இது கடந்த ஆண்டின் இதே காலகட்டத்தை விட அதிகம் என்றாலும், 2025 இன் கடைசி காலாண்டில் இருந்த 17,700 என்ற எண்ணிக்கையை விட மிகக் குறைவாகும். சீனப் புத்தாண்டு விடுமுறை போன்ற கால மாற்றங்களாலேயே இந்த சரிவு ஏற்பட்டுள்ளதாகவும், கட்டுமானப் பணிகள் இந்த நேரத்தில் பொதுவாகக் குறைவாகவே இருக்கும் என்றும் அமைச்சகம் விளக்கம் அளித்துள்ளது.

உள்ளூர் மக்கள் மற்றும் வெளிநாட்டினர் என இரு தரப்பிலும் வேலைவாய்ப்பு வளர்ச்சி காணப்படுகிறது. உள்ளூர் மக்களுக்கான வேலைகள் போக்குவரத்து, சேமிப்பு மற்றும் நிர்வாகம் சார்ந்த துறைகளில் அதிகரித்துள்ளன. அதேபோல், வெளிநாட்டினருக்கான வேலைவாய்ப்பு கட்டுமானத் துறையில் தொடர்ந்து நீடித்தாலும், அதன் வேகம் கடந்த காலாண்டை விடக் குறைந்துள்ளது. வேலையின்மை விகிதத்தைப் பொறுத்தவரை, மார்ச் 2026 இல் சிறு மாற்றம் இருந்தாலும், அது பெரிய அளவில் பாதிக்கவில்லை என்று அமைச்சகம் கூறியுள்ளது.

வரும் ஜூன் மாதம் முழுமையான அறிக்கை வெளியிடப்படும் நிலையில், அடுத்த காலாண்டில் தொழிலாளர் சந்தை விரிவடையும் என்று எதிர்பார்க்கப்படுகிறது. ஆனால், உலகளாவிய பொருளாதார நிச்சயமற்ற சூழலால் நிறுவனங்கள் புதிய ஆட்களை வேலைக்கு எடுப்பதில் மிகுந்த எச்சரிக்கையுடன் செயல்பட வாய்ப்புள்ளது. எனவே, நிறுவனங்கள் தங்களது பணியாளர்களுக்குப் புதிய பயிற்சிகளை வழங்க வேண்டும் என்றும், தொழிலாளர்கள் புதிய வாய்ப்புகளைப் பிடிக்கத் தங்களைத் தயார்படுத்திக் கொள்ள வேண்டும் என்றும் அமைச்சகம் அறிவுறுத்தியுள்ளது.

வேலையிழந்தவர்களுக்கு உதவும் வகையில் 'SkillsFuture Jobseeker Support' திட்டம் மூலம் ஆறு மாதங்களுக்கு அதிகபட்சமாக 6,000 வெள்ளி வரை நிதி உதவி வழங்கப்படும். அதேபோல், வேலை தேடுவதில் சிரமம் உள்ள பட்டதாரிகள் 'GRIT' போன்ற திட்டங்களைப் பயன்படுத்தி அனுபவம் பெற்றுக்கொள்ளலாம். தொழிலாளர்கள் தங்கள் திறன்களை வளர்த்துக் கொள்ள அரசு பல்வேறு பயிற்சித் திட்டங்களையும், வழிகாட்டுதல் சேவைகளையும் தொடர்ந்து வழங்கி வருகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.