நடிகை ரினி ஜார்ஜின் பாலியல் குற்றச்சாட்டு.. பாலியல் மெசேஜ் அனுப்பிய எம்.எல்.ஏ? - கேரள அரசியலில் வெடித்த சர்ச்சை!

கேரளாவில் மலையாள நடிகை ரினி ஜார்ஜ் முன்வைத்த பாலியல் குற்றச்சாட்டுகள் அம்மாநில அரசியலில் பெரும் புயலைக் கிளப்பியுள்ளன. காங்கிரஸ் கட்சியைச் சேர்ந்த ஓர் எம்எல்ஏ, தனக்கு அநாகரிகமான குறுஞ்செய்திகளை (objectionable texts) அனுப்பியதாக அவர் பகிரங்கமாக குற்றம் சாட்டியுள்ளார். இந்த விவகாரம் குறித்து பாஜக, காங்கிரஸ் எம்எல்ஏ மீது கடுமையான குற்றச்சாட்டுகளை முன்வைத்து போராட்டங்களில் ஈடுபட்டுள்ளது.

ரினி ஜார்ஜ் முன்வைத்த பகீர் குற்றச்சாட்டுகள்

சமூக வலைதளங்களில் ஒரு நேர்காணலில் பேசிய ரினி ஜார்ஜ், மூன்று ஆண்டுகளுக்கு முன்பு ஒரு இளைஞர் அரசியல் தலைவருடன் தனக்குத் தொடர்பு ஏற்பட்டதாகத் தெரிவித்தார். ஆரம்பத்தில் மரியாதையுடன் பழகிய அந்தத் தலைவர், பின்னர் பாலியல் ரீதியான தொல்லைகளைக் கொடுத்ததாக அவர் குற்றம் சாட்டினார்.

"ஃபைவ் ஸ்டார் ஹோட்டலில் அறை புக் செய்து, அங்கே வரச் சொல்லி எனக்கு அநாகரிகமான செய்திகளை அனுப்பினார். நான் இதை மறுத்தபோது, அவர் என்னை மிரட்டத் தொடங்கினார். 'நீ யார்ட்ட வேணா போய் சொல்லிக்கோ, யாரும் கண்டுக்க மாட்டாங்க' என்று அலட்சியமாகப் பேசினார்" என ரினி ஜார்ஜ் ஆவேசமாக கூறினார்.

இந்தச் சம்பவம் தனக்கு கடும் மன உளைச்சலை ஏற்படுத்தியதாகவும், இருப்பினும் இந்த விவகாரத்தைப் பொதுவெளியில் பேசக் காரணம், தன்னைப் போலவே பல பெண்கள் இதுபோலப் பாதிக்கப்பட்டிருந்தும், பயத்தின் காரணமாக யாரும் புகார் அளிக்கத் துணிவதில்லை என்பதால் தான் என்றும் அவர் குறிப்பிட்டார்.

பாஜகவின் நேரடித் தாக்குதல்

ரினி ஜார்ஜின் இந்த நேர்காணல் சமூக ஊடகங்களில் பரவியதும், பாஜக இதை அரசியல் ஆயுதமாக மாற்றிக்கொண்டது. ரினி ஜார்ஜ் யாரைக் குறிப்பிட்டுக் குற்றம் சாட்டினார் என ரகசியமாக அறிய முயன்ற பாஜக, அவர் காங்கிரஸ் கட்சியைச் சேர்ந்த பாலக்காடு எம்எல்ஏ Rahul Mamkootathil என்பவரை தான் குறிப்பிட்டார் என்று குற்றம் சாட்டியது.

இதைத் தொடர்ந்து, பாஜகவினர் ராகுல் அலுவலகம் முன்பு போராட்டத்தில் ஈடுபட்டனர். ஆர்ப்பாட்டக்காரர்களைக் கலைக்க காவல்துறை முயற்சி செய்தபோது, இரு தரப்பினருக்கும் இடையே தள்ளுமுள்ளு ஏற்பட்டது. இந்த விவகாரத்தை ஒரு பெரிய அரசியல் போராட்டமாக மாற்ற பாஜக தீவிரம் காட்டி வருகிறது.

காங்கிரஸ் கட்சியின் நிலைப்பாடு என்ன?

பாஜக நேரடியாக எம்எல்ஏ மீது குற்றம்சாட்டிய பிறகும், காங்கிரஸ் கட்சி இதுகுறித்து அதிகாரப்பூர்வமான எந்த அறிக்கையும் வெளியிடவில்லை. ஆனால், இந்த விவகாரத்தின் உண்மை நிலையை அறிய காங்கிரஸ் கட்சி, எம்எல்ஏ ராகுல் மாம்கூட்டத்திடம் விளக்கம் கோரியுள்ளதாக தகவல்கள் வெளியாகியுள்ளன.

ரினி ஜார்ஜ் ஏன் புகார் அளிக்கவில்லை?

ரினி ஜார்ஜ் இந்தப் பிரச்னையைச் சட்டப்படி எதிர்கொள்ளாமல், பொதுவெளியில் பேசியது ஏன் என்ற கேள்விக்கு அவரே பதிலளித்தார். "நான் புகார் அளித்தால், அது எனக்குத்தான் ஆபத்தை விளைவிக்கும். குற்றவாளிகள் எளிதாகத் தப்பி விடுவார்கள். என் நண்பர்கள் மூலமாக இதுபோல பல பெண்கள் துன்புறுத்தப்படுவதாக நான் அறிந்தேன். அதனால்தான், மற்ற பெண்களின் குரலாக நான் பேசத் துணிந்தேன்," என அவர் தெரிவித்தார்.

இந்த சம்பவம் கேரள அரசியலில் பெரும் விவாதத்தை உருவாக்கியுள்ளது. எதிர்காலத்தில் ரினி ஜார்ஜ் அல்லது காங்கிரஸ் கட்சி இந்த விவகாரம் குறித்து என்ன நடவடிக்கை எடுக்கப்போகிறது என்பதைப் பொறுத்து, இந்த சர்ச்சையின் அடுத்த கட்டம் இருக்கும் என்று எதிர்பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.