2027 தேர்தலைக் குறிவைத்து பாஜகவின் மெகா திட்டம்! உத்தரப் பிரதேசத்தில் கட்சிக்குள் அதிருப்தியால் களமிறங்கிய அமித் ஷா!

இந்திய அரசியலில் அதிக சட்டமன்றத் தொகுதிகளைக் கொண்ட மாநிலம் என்பதால் உத்தரப் பிரதேசத்தின் தேர்தல் முடிவுகள் தேசிய அரசியலிலும் முக்கிய தாக்கத்தை ஏற்படுத்தும். அங்கு அடுத்த ஆண்டு நடைபெறவுள்ள சட்டமன்றத் தேர்தலை முன்னிட்டு பாரதிய ஜனதா கட்சி இப்போதே தனது அரசியல் பணிகளைத் தீவிரப்படுத்தியுள்ளது. ஆட்சியைத் தக்கவைத்துக் கொள்வது மட்டுமின்றி, தொடர்ந்து மூன்றாவது முறையாக வெற்றி பெற வேண்டும் என்ற இலக்குடன் கட்சித் தலைமை செயல்படத் தொடங்கியுள்ளது. இந்தச் சூழலில், கட்சிக்குள் நிலவும் கருத்து வேறுபாடுகளைக் களைந்து நிர்வாகிகளை ஒருங்கிணைக்கும் பொறுப்பை மத்திய உள்துறை அமைச்சர் அமித் ஷா நேரடியாகக் கையில் எடுத்துள்ளார்.

லக்னோவில் அக்டோபர் 30ஆம் தேதி நடைபெற்ற பாஜகவின் மாநில செயற்குழுக் கூட்டம் இதற்கான முக்கியமான நிகழ்வாக அமைந்தது. முதலமைச்சர் யோகி ஆதித்யநாத், மாநில பாஜக தலைவர் பங்கஜ் சௌத்ரி மற்றும் கட்சியின் மூத்த நிர்வாகிகள் உள்ளிட்ட 2,800க்கும் மேற்பட்டோர் இந்தக் கூட்டத்தில் பங்கேற்றனர். தேர்தலுக்கு இன்னும் பல மாதங்கள் இருக்கும் நிலையிலேயே இவ்வளவு பெரிய அளவில் நிர்வாகிகளை ஒன்றுதிரட்டியிருப்பது, கட்சி தனது தேர்தல் தயாரிப்புகளை முன்கூட்டியே தொடங்கியிருப்பதைக் காட்டுகிறது.

இந்தக் கூட்டத்தில் அமித் ஷா பேசிய கருத்துகள் கட்சிக்குள் நிலவும் அதிருப்தியை வெளிப்படுத்துவதாக அரசியல் வட்டாரங்களில் பார்க்கப்படுகின்றன. நீண்டகாலமாகக் கட்சிக்காக உழைத்த சிலருக்கு எதிர்பார்த்த பதவிகள் கிடைக்காமல் இருக்கலாம். அமைச்சராக வேண்டும் என்று நினைத்தவர்களுக்கு வேறு பொறுப்புகள் வழங்கப்பட்டிருக்கலாம். அதனால் மனக்கசப்பு ஏற்படுவது இயல்புதான். ஆனால், தனிப்பட்ட எதிர்பார்ப்புகளைவிடக் கட்சியின் வெற்றியே முக்கியம் என்ற கருத்தை அவர் முன்வைத்தார். நிர்வாகிகள் தங்களுக்குள் இருக்கும் கோபம், ஏமாற்றம், புகார்களை ஒதுக்கிவிட்டு ஒரே இலக்குடன் தேர்தல் பணியில் ஈடுபட வேண்டும் என்று கேட்டுக்கொண்டார்.

கட்சித் தொண்டர்களின் பங்களிப்பு குறித்தும் அமித் ஷா முக்கியமாகப் பேசினார். பெரிய தலைவர்கள் மட்டும் தேர்தலில் வெற்றியைப் பெற்றுத் தர முடியாது என்றும், மக்களுடன் நேரடியாகத் தொடர்பில் இருக்கும் அடிமட்டத் தொண்டர்களின் உழைப்பே வெற்றியைத் தீர்மானிக்கும் என்றும் அவர் வலியுறுத்தினார். இதன் மூலம் தேர்தல் நேரத்தில் மட்டும் தொண்டர்களை அணுகாமல், அவர்களின் குறைகளையும் தேவைகளையும் முன்கூட்டியே அறிந்து செயல்பட வேண்டும் என்ற செய்தியை கட்சி நிர்வாகிகளுக்கு வழங்கியுள்ளார்.

உத்தரப் பிரதேச பாஜகவில் அதிருப்தி நிலவுவது குறித்து ஏற்கெனவே செய்திகள் வெளியாகியிருந்தன. கட்சியில் நீண்டகாலமாகப் பணியாற்றியவர்களுக்கு உரிய அங்கீகாரம் கிடைப்பதில்லை என்றும், புதியதாகக் கட்சியில் இணைந்த சிலருக்கு முக்கியத்துவம் வழங்கப்படுவதாகவும் சில நிர்வாகிகள் அதிருப்தி தெரிவித்திருந்தனர். கட்சியின் அமைப்புப் பொறுப்புகள், அரசுப் பதவிகள் மற்றும் அரசியல் நியமனங்கள் தொடர்பாகவும் கருத்து வேறுபாடுகள் எழுந்ததாகக் கூறப்பட்டது. இந்தப் பிரச்சினைகள் தேர்தலுக்கு முன்பாகப் பெரிதாகிவிடக் கூடாது என்பதே தலைமையின் தற்போதைய கவலையாகத் தெரிகிறது.

மாநில பாஜக தலைவர் பங்கஜ் சௌத்ரி, கட்சியின் அமைப்பு வலிமையை மதிப்பிடுவதற்கான சில கேள்விகளை நிர்வாகிகள் தங்களுக்குள் எழுப்பிக் கொள்ள வேண்டும் என்று அறிவுறுத்தினார். ஒவ்வொரு வாக்குச்சாவடியிலும் கட்சிக் குழுக்கள் செயல்படுகின்றனவா, நிர்வாகிகள் தங்களது பொறுப்புகளை நிறைவேற்றுகின்றனரா, மாவட்ட மற்றும் மண்டல அளவிலான தலைவர்கள் மக்களுடன் தொடர்பில் இருக்கிறார்களா என்பதைக் கண்காணிக்க வேண்டும் என்றார். எம்.பி., எம்.எல்.ஏ. உள்ளிட்ட மக்கள் பிரதிநிதிகள் கட்சித் தொண்டர்களுடன் தொடர்ந்து கலந்துரையாடவும் அவர் கேட்டுக்கொண்டார்.

முதலமைச்சர் யோகி ஆதித்யநாத்தும் கட்சியின் ஒற்றுமைக்கு முக்கியத்துவம் அளித்துப் பேசினார். தனிப்பட்ட பதவிகள் மற்றும் புகழைவிடக் கட்சியின் கொள்கைகளுக்கும் அமைப்பின் வளர்ச்சிக்கும் முன்னுரிமை அளிக்க வேண்டும் என்ற கருத்தை அவர் வலியுறுத்தினார். இதன் மூலம் ஆட்சியில் இருப்பவர்களுக்கும் கட்சி அமைப்பில் பணியாற்றுபவர்களுக்கும் இடையே நல்ல ஒருங்கிணைப்பு இருக்க வேண்டும் என்ற எதிர்பார்ப்பு வெளிப்பட்டது.

தேர்தல் வியூகத்தைப் பொறுத்தவரையில், பாஜக வாக்குச்சாவடி அளவிலான கட்டமைப்பை வலுப்படுத்துவதில் அதிக கவனம் செலுத்துகிறது. இளைஞர்கள், பெண்கள், முதல்முறை வாக்காளர்கள் மற்றும் தொழில்முனைவோர்களிடையே கட்சியின் ஆதரவை அதிகரிக்கவும் திட்டமிடப்பட்டுள்ளது. மத்திய, மாநில அரசுகளின் திட்டங்கள் மக்களைச் சென்றடைந்துள்ளனவா என்பதைக் கண்காணித்து, அவற்றின் பயன்களை மக்களிடம் எடுத்துச் சொல்லவும் நிர்வாகிகளுக்கு முக்கியத்துவம் வழங்கப்பட்டுள்ளது.

மறுபுறம், எதிர்க்கட்சிகளின் அரசியல் செல்வாக்கையும் பாஜக கவனத்தில் கொண்டுள்ளது. சமாஜ்வாதி கட்சியும் காங்கிரஸும் தேர்தலில் ஏற்படுத்தக்கூடிய சவால்களை எதிர்கொள்ளத் தயாராக இருக்க வேண்டும் என்று கட்சித் தலைமை கருதுகிறது. அமித் ஷா தனது உரையில் எதிர்க்கட்சிகளின் தலைவர்களையும் விமர்சித்தார். அயோத்தி தொடர்பான அரசியல் விவகாரங்களையும் முன்வைத்து பாஜகவின் தேர்தல் கருத்தாக்கத்தை வலுப்படுத்த முயன்றார்.

உத்தரப் பிரதேசத்தில் பாஜக மீண்டும் ஆட்சியைப் பிடிப்பதற்கு அரசின் சாதனைகளை மக்களிடம் கொண்டு சேர்ப்பது மட்டும் போதாது. கட்சிக்குள் இருக்கும் அதிருப்தியைச் சரிசெய்து, நிர்வாகிகளின் நம்பிக்கையைப் பெறுவதும் அவசியமாகியுள்ளது. குறிப்பாக, தேர்தல் நேரத்தில் ஒவ்வொரு வாக்குச்சாவடியிலும் கட்சியின் அமைப்பு வலுவாகச் செயல்பட வேண்டும் என்பதே தலைமையின் முக்கிய இலக்காக உள்ளது.

2027 சட்டமன்றத் தேர்தல் பாஜகவுக்கு ஒரு முக்கியமான அரசியல் சோதனையாக அமையவுள்ளது. தற்போதைய ஆட்சியின் செயல்பாடுகள், வேலைவாய்ப்பு, சட்டம்-ஒழுங்கு, வளர்ச்சித் திட்டங்கள் மற்றும் சமூக அரசியல் உள்ளிட்ட பல அம்சங்கள் தேர்தலில் தாக்கத்தை ஏற்படுத்தும். அமித் ஷாவின் தற்போதைய ஆலோசனைகள் கட்சிக்குள் ஒற்றுமையை உருவாக்கி தேர்தல் வெற்றிக்கு வழிவகுக்குமா என்பதைப் பொறுத்திருந்துதான் பார்க்க வேண்டும். இப்போதைக்கு பாஜக தனது தேர்தல் இயந்திரத்தை முன்கூட்டியே தயார் செய்யத் தொடங்கிவிட்டது என்பது மட்டும் தெளிவாகத் தெரிகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்