செங்கோட்டையில் முதல் முறையாக ‘வந்தே மாதரம்’... சுதந்திர தின கொண்டாட்டத்தின் சிறப்புகள் என்ன?

இந்தியா ஒவ்வொரு ஆண்டும் ஆகஸ்ட் 15ஆம் தேதியை சுதந்திர தினமாகக் கொண்டாடி வருகிறது. 1947ஆம் ஆண்டு ஆகஸ்ட் 15ஆம் தேதி, பிரிட்டிஷ் ஆட்சியிலிருந்து இந்தியா விடுதலை பெற்றது. இதை நினைவுகூரும் வகையில், நாடு முழுவதும் தேசியக் கொடி ஏற்றுதல், அணிவகுப்புகள், கலை நிகழ்ச்சிகள் மற்றும் பல்வேறு அரசு நிகழ்ச்சிகள் நடைபெறுகின்றன. இந்த நிலையில், 2026ஆம் ஆண்டுக்கான சுதந்திர தினக் கொண்டாட்டங்கள் பல்வேறு சிறப்பம்சங்களுடன் நடைபெற உள்ளன. குறிப்பாக, டெல்லி செங்கோட்டையில் நடைபெறும் சுதந்திர தின விழாவில் வரலாற்றில் முதல்முறையாக ‘வந்தே மாதரம்’ பாடல் பாடப்பட உள்ளது. இந்த ஆண்டு ‘வந்தே மாதரம்’ பாடல் அறிமுகப்படுத்தப்பட்டு 150 ஆண்டுகள் நிறைவடைவதையும் முன்னிட்டு, அதற்கு சிறப்பு முக்கியத்துவம் அளிக்கப்பட்டுள்ளது.

1947ஆம் ஆண்டு ஆகஸ்ட் 15ஆம் தேதி இந்தியா சுதந்திரம் பெற்றது. பல ஆண்டுகளாக நடைபெற்ற சுதந்திரப் போராட்டம், எண்ணற்ற தியாகங்கள் மற்றும் போராட்டங்களுக்குப் பிறகு இந்தியா ஆங்கிலேய ஆட்சியிலிருந்து விடுதலை பெற்றது. சுதந்திர தினத்தன்று பிரதமர் டெல்லி செங்கோட்டையில் தேசியக் கொடியை ஏற்றி வைத்து நாட்டு மக்களுக்கு உரையாற்றுவது ஆண்டுதோறும் நடைபெறும் முக்கிய நிகழ்வாகும். நாடு முழுவதும் பள்ளிகள், கல்லூரிகள், அரசு அலுவலகங்கள் மற்றும் பல்வேறு நிறுவனங்களிலும் கொடியேற்ற நிகழ்ச்சிகள் நடத்தப்படுகின்றன.

2026ஆம் ஆண்டு இந்தியா தனது 80வது சுதந்திர தினத்தை கொண்டாடுகிறது. இந்த ஆண்டு கொண்டாட்டங்களில் இளைஞர்களின் பங்களிப்புக்கு முக்கியத்துவம் அளிக்கப்பட உள்ளது. 2047ஆம் ஆண்டுக்குள் இந்தியாவை வளர்ந்த நாடாக மாற்றும் இலக்கில் இளைஞர்களின் பங்கு என்ன என்பதை எடுத்துக்காட்டும் வகையில், ‘யுவ சக்தி’ என்ற கருத்துக்கு முக்கியத்துவம் அளிக்கப்படுகிறது.

பல்வேறு துறைகளில் சாதனை படைத்த இளம் தலைமுறையினரையும் இந்த ஆண்டு சுதந்திர தின விழாவில் கவுரவிக்கும் வகையில் சிறப்பு ஏற்பாடுகள் செய்யப்பட்டுள்ளதாக தெரிவிக்கப்பட்டுள்ளது. சர்வதேச அளவிலான அறிவியல் ஒலிம்பியாட் போட்டிகளில் பதக்கம் வென்ற மாணவர்களும் சிறப்பு விருந்தினர்களாக அழைக்கப்பட்டுள்ளனர். 2026 சுதந்திர தினத்தின் முக்கிய கவனம் ‘வந்தே மாதரம்’ பாடலாகவும் உள்ளது. சுதந்திரப் போராட்ட காலத்தில் மக்களிடையே தேசிய உணர்வை ஏற்படுத்திய முக்கிய பாடல்களில் ஒன்றாக ‘வந்தே மாதரம்’ கருதப்படுகிறது.

இந்தப் பாடல் முதன்முதலில் பங்கிம் சந்திர சட்டோபாத்யாயரின் ‘ஆனந்தமத்’ நாவலில் இடம்பெற்றது. 1875ஆம் ஆண்டு இது எழுதப்பட்டதாகக் குறிப்பிடப்படுகிறது. இதன் 150 ஆண்டுகள் நிறைவையொட்டி, 2026ஆம் ஆண்டு முழுவதும் நாடு முழுவதும் பல்வேறு நிகழ்ச்சிகள் நடத்தப்பட்டு வருகின்றன. இந்த நிலையில், ஆகஸ்ட் 15ஆம் தேதி பிரதமர் நரேந்திர மோடி செங்கோட்டைக்கு வரும்போது ‘வந்தே மாதரம்’ பாடல் பாடப்பட உள்ளது. அதன் பின்னர் தேசியக் கொடி ஏற்றப்பட்டு, பிரதமர் நாட்டு மக்களுக்கு உரையாற்றுவார் என தெரிவிக்கப்பட்டுள்ளது.

மேலும், இந்திய விமானப்படையின் எம்ஐ-17 ஹெலிகாப்டர் மூலம் ‘வந்தே மாதரம்’ 150 ஆண்டுகள் நிறைவைக் குறிக்கும் பதாகை ஏந்திச் செல்லப்படுவதுடன், செங்கோட்டையில் திரண்டிருக்கும் மக்கள் மீது மலர் இதழ்கள் தூவப்படும் எனவும் தெரிவிக்கப்பட்டுள்ளது. இந்த ஆண்டு சுதந்திர தினக் கொண்டாட்டங்களில் நாட்டின் பல்வேறு பகுதிகளிலிருந்தும், பல்வேறு துறைகளில் சாதனை படைத்தவர்களும் பங்கேற்க உள்ளனர். சுமார் 5,000 சிறப்பு விருந்தினர்கள் அழைக்கப்பட்டுள்ளதாக அதிகாரிகள் தெரிவித்துள்ளனர். இளைஞர்கள், மாணவர்கள், அறிவியல் மற்றும் தொழில்நுட்பத் துறையில் சாதனை படைத்தவர்கள் உள்ளிட்ட பல்வேறு பிரிவினரின் பங்களிப்பை வெளிப்படுத்தும் வகையில் இந்த ஆண்டு நிகழ்ச்சிகள் திட்டமிடப்பட்டுள்ளன.

மக்களவை எதிர்க்கட்சித் தலைவர் ராகுல் காந்தியும் சுதந்திர தின விழாவில் பங்கேற்க அழைக்கப்பட்டுள்ளதாக பாதுகாப்பு அமைச்சகம் தெரிவித்துள்ளது. விழாவில் அழைக்கப்பட்ட முக்கிய பிரமுகர்களுக்கான இருக்கைகள் அரசின் ‘Table of Precedence’ எனப்படும் முன்னுரிமை வரிசையின் அடிப்படையில் ஒதுக்கப்படும் என அதிகாரிகள் தெரிவித்துள்ளனர். இந்த ஆண்டு சுதந்திர தின விழாவுக்கான அழைப்பிதழ்களிலும் சிறப்பு கருத்து இடம்பெற்றுள்ளது. ‘சேவா தீர்த்தம்’ என்ற கருத்து மூலம் ஒவ்வொரு குடிமகனும் நாட்டின் நலனுக்காக அர்ப்பணிப்புடன் செயல்பட வேண்டும் என்ற செய்தி வலியுறுத்தப்படுகிறது.

மேலும், விஐபி கலாச்சாரத்தை குறைக்கும் வகையிலும், நாட்டின் இயற்கை வளங்களின் முக்கியத்துவத்தை எடுத்துக்காட்டும் வகையிலும் விழா ஏற்பாடுகளில் சில மாற்றங்கள் செய்யப்பட்டுள்ளதாக அதிகாரிகள் தெரிவித்துள்ளனர். இவ்வாறு, 2026ஆம் ஆண்டுக்கான சுதந்திர தினக் கொண்டாட்டங்கள் ஒருபுறம் இந்தியாவின் சுதந்திரப் போராட்ட வரலாற்றை நினைவுகூரும் வகையிலும், மறுபுறம் இளைஞர்களின் பங்களிப்பு, நாட்டின் எதிர்கால வளர்ச்சி மற்றும் ‘வந்தே மாதரம்’ பாடலின் 150 ஆண்டு பாரம்பரியம் ஆகியவற்றை முன்னிறுத்தும் வகையிலும் நடைபெற உள்ளன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.