.png)
ரஷ்யா-உக்ரைன் போர் நீடித்து வரும் நிலையில், கருங்கடல் பகுதியில் மோதல்களை குறைத்து, எரிசக்தி மற்றும் சரக்கு போக்குவரத்தை பாதுகாப்பானதாக மாற்றும் முயற்சிகளில் இந்தியாவின் பங்கு முக்கியத்துவம் பெற்றுள்ளது. உக்ரைன் வெளியுறவு அமைச்சர் ஆண்ட்ரி சிபிஹா, தங்களிடம் தற்போது பரிசீலனையில் உள்ள நான்கு வெவ்வேறு போர் நிறுத்தத் திட்டங்களில் இந்தியா முன்வைத்துள்ள யோசனை மிகவும் விரிவானது என்று தெரிவித்துள்ளார்.
மேலும், அமைதிப் பேச்சுவார்த்தையில் இந்தியா முதல் முறையாக செயலில் பங்கேற்கத் தயாராக இருப்பதற்கான அறிகுறி கிடைத்துள்ளதாகவும் அவர் கூறியுள்ளார்.
2022-ம் ஆண்டு தொடங்கிய ரஷ்யா-உக்ரைன் போர் நான்காவது ஆண்டைத் தாண்டியும் தொடர்கிறது. இரு நாடுகளுக்கும் இடையிலான நேரடி மோதல்களை முழுமையாக நிறுத்துவதற்கான முயற்சிகள் பல்வேறு கட்டங்களில் மேற்கொள்ளப்பட்டாலும், இதுவரை நீடித்த தீர்வு ஏற்படவில்லை. இந்நிலையில், முழுமையான போர் நிறுத்தத்தை உடனடியாக உருவாக்குவதற்கு பதிலாக, முதலில் குறிப்பிட்ட பகுதிகளில் தாக்குதல்களை நிறுத்துவது தொடர்பான யோசனைகள் கவனம் பெற்றுள்ளன.
அதில் முக்கியமானதாக இருப்பது கருங்கடல் பகுதி. உக்ரைன் மற்றும் ரஷ்யாவுக்கு இடையிலான மோதல் காரணமாக அப்பகுதியில் வர்த்தக கப்பல்கள் மற்றும் துறைமுகங்களின் பாதுகாப்பு தொடர்ந்து கவலையாக உள்ளது. குறிப்பாக தானியங்கள் உள்ளிட்ட விவசாயப் பொருட்கள் கடல் வழியாக கொண்டு செல்லப்படுவது பாதிக்கப்பட்டால், அதன் தாக்கம் சம்பந்தப்பட்ட நாடுகளைத் தாண்டி உலக உணவு விநியோகத்திலும் ஏற்படக்கூடும். கருங்கடல் வழித்தடத்தை பாதுகாப்பாக வைத்திருப்பது சர்வதேச உணவு மற்றும் விநியோகச் சங்கிலிக்கும் முக்கியமானதாக பார்க்கப்படுகிறது.
உக்ரைன் வெளியுறவு அமைச்சரின் விளக்கப்படி, தற்போது நான்கு முக்கிய முன்மொழிவுகள் பரிசீலனையில் உள்ளன. இந்தியா, அமெரிக்கா, துருக்கி மற்றும் எகிப்து ஆகிய நாடுகளுடன் தொடர்புடைய யோசனைகள் இதில் இடம்பெற்றுள்ளன. துருக்கி மற்றும் எகிப்தின் திட்டங்கள் கருங்கடலில் கடல் போக்குவரத்தை பாதுகாப்பாக வைத்திருப்பதையும், குறிப்பாக விவசாயப் பொருட்களின் ஏற்றுமதிக்கு வழிவகுப்பதையும் மையமாகக் கொண்டதாக கூறப்படுகிறது.
அமெரிக்காவின் முன்மொழிவு எரிசக்தி உள்கட்டமைப்புகள் மீதான தாக்குதல்களை நிறுத்துவது தொடர்பாக கவனம் செலுத்துகிறது இந்த சூழலில் இந்தியாவின் முன்மொழிவு பல அம்சங்களை ஒருங்கிணைத்ததாக உக்ரைன் தரப்பு கூறியுள்ளது. எரிசக்தி கட்டமைப்புகள் மீதான தாக்குதல்கள் நிறுத்தப்படுவதுடன், துறைமுகங்கள் மற்றும் கருங்கடல் பகுதியில் உள்ள வர்த்தக வழித்தடங்களுக்கும் பாதுகாப்பு வழங்கப்பட வேண்டும் என்பது முக்கியமான அம்சமாக பார்க்கப்படுகிறது. இதனுடன் விவசாயம் தொடர்பான வர்த்தகமும் பாதிக்கப்படாமல் இருப்பதற்கான நடவடிக்கைகள் குறித்து பேச்சுவார்த்தை நடத்தும் வாய்ப்பும் உள்ளது.
உக்ரைன் தரப்பு, எரிசக்தி மற்றும் கருங்கடல் தொடர்பான போர் நிறுத்தம் ஒன்றாக அமைய வேண்டும் என்று வலியுறுத்தியுள்ளது. அதாவது, மின்சார உற்பத்தி நிலையங்கள், எரிசக்தி வசதிகள், துறைமுகங்கள் போன்ற முக்கிய கட்டமைப்புகள் மீது தாக்குதல்கள் தொடரும் நிலையில் கடல் வழித்தடத்தில் மட்டும் அமைதி ஏற்படுத்துவது போதுமானதாக இருக்காது என்பதே அந்நாட்டின் நிலைப்பாடு.
அதே நேரத்தில், முன்வரிசைப் பகுதிகளில் எந்த நிபந்தனையும் இல்லாத போர் நிறுத்தம் உள்ளிட்ட பல்வேறு வடிவங்களையும் பரிசீலிக்கத் தயாராக இருப்பதாக உக்ரைன் தெரிவித்துள்ளது. ரஷ்யா மற்றும் உக்ரைன் ஆகிய இரு தரப்புடனும் இந்தியா தொடர்ந்து தொடர்பில் இருப்பதாக வெளியுறவுத்துறை அமைச்சர் எஸ். ஜெய்சங்கர் முன்பே தெரிவித்துள்ளார்.
போரை குறைப்பதற்கோ அல்லது முடிவுக்குக் கொண்டுவருவதற்கோ உதவக்கூடிய யோசனைகள் மற்றும் வழிகளை கண்டறிவதே இந்தியாவின் நோக்கம் என்றும் அவர் குறிப்பிட்டுள்ளார். போர் நீடிப்பதால் ஏற்படும் மனித உயிரிழப்புகள் மட்டுமின்றி, உணவு, எரிபொருள், உரம் மற்றும் விநியோகச் சங்கிலிகளில் ஏற்படும் பாதிப்புகளும் உலக நாடுகளை பாதிப்பதாக இந்தியா தொடர்ந்து வலியுறுத்தி வருகிறது.
இந்தியாவின் பங்கு குறித்து உக்ரைன் தரப்பில் தற்போது வெளியாகியுள்ள கருத்துகள், அமைதிப் பேச்சுவார்த்தையில் டெல்லியின் அணுகுமுறைக்கு புதிய கவனத்தை ஏற்படுத்தியுள்ளது. இருப்பினும், ஒரு திட்டம் முன்வைக்கப்படுவது மட்டும் போர் நிறுத்தத்தை உறுதி செய்யாது. ரஷ்யா மற்றும் உக்ரைன் ஆகிய இரு தரப்பினரின் ஒப்புதல், நடைமுறைப்படுத்தும் முறைகள் மற்றும் பாதுகாப்பு ஏற்பாடுகள் ஆகியவை அடுத்த கட்டத்தில் முக்கியமானதாக இருக்கும்.
கருங்கடல் வழியாக செல்லும் கப்பல்களின் பாதுகாப்பு, எரிசக்தி கட்டமைப்புகள் மீதான தாக்குதல்களை கட்டுப்படுத்துதல், விவசாயப் பொருட்களின் வர்த்தகத்தை தொடரச் செய்தல் போன்ற குறிப்பிட்ட துறைகளில் முதலில் உடன்பாடு ஏற்படுத்த முடியுமா என்பதே இப்போது கவனிக்கப்படும் அம்சமாக உள்ளது. இந்தியாவின் முன்மொழிவை உக்ரைன் “மிகவும் விரிவானது” எனக் குறிப்பிட்டுள்ள நிலையில், அடுத்த கட்ட பேச்சுவார்த்தைகள் இந்த யோசனையை நடைமுறைப்படுத்தும் அளவுக்கு கொண்டு செல்கிறதா என்பதே முக்கிய கேள்வியாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
