.png)
ஒரு இளம் பெண் உயிரிழந்து 14 ஆண்டுகள் கடந்துவிட்டன. வழக்கில் ஒருவர் கைது செய்யப்பட்டார். விசாரணை நடந்தது. பின்னர் அவர் குற்றமற்றவர் என நீதிமன்றம் விடுவித்தது. அதன்பிறகு வழக்கு முடிவுக்கு வந்துவிட்டதாக கருதப்பட்ட நிலையில், இப்போது உச்சநீதிமன்றம் மீண்டும் விசாரணையை தொடங்க உத்தரவிட்டுள்ளது. இதனால், அந்த பெண்ணுக்கு உண்மையில் என்ன நடந்தது, குற்றத்தில் தொடர்புடையவர்கள் யார் என்ற கேள்விகள் மீண்டும் முன்னிலைக்கு வந்துள்ளன.
2012ஆம் ஆண்டு 17 வயதான சௌஜன்யா என்ற கல்லூரி மாணவி காணாமல் போனார். கல்லூரியில் இருந்து வீட்டுக்குத் திரும்பிக் கொண்டிருந்தபோது அவர் மாயமானதாக குடும்பத்தினர் தெரிவித்தனர். மறுநாள் அவரது உடல் வீட்டுக்கு அருகிலுள்ள வனப்பகுதியில் கண்டெடுக்கப்பட்டது. பிரேதப் பரிசோதனையில் அவர் பாலியல் வன்கொடுமைக்கு உள்ளாக்கப்பட்டு கொலை செய்யப்பட்டிருந்தது தெரியவந்ததாக வழக்கு பதிவுகளில் குறிப்பிடப்பட்டுள்ளது.
இந்த சம்பவம் கர்நாடக மாநிலத்தின் தெற்கு கன்னடா மாவட்டத்தில் உள்ள தர்மஸ்தலா அருகே நடந்தது. ஆரம்பத்தில் உள்ளூர் போலீசார் வழக்கை விசாரித்தனர். பின்னர் பொதுமக்கள் மற்றும் குடும்பத்தினரிடையே எழுந்த சந்தேகங்களுக்குப் பிறகு, கர்நாடக குற்றப்புலனாய்வுத் துறையும், அதன்பிறகு மத்திய புலனாய்வுத் துறையும் விசாரணையை மேற்கொண்டன. மூன்று அமைப்புகள் விசாரித்தும் வழக்கில் இறுதியான உண்மை முழுமையாக வெளிவரவில்லை.
ஆரம்ப விசாரணையின் போது சந்தோஷ் ராவ் என்ற நபர் கைது செய்யப்பட்டார். பின்னர் வழக்கு மத்திய புலனாய்வுத் துறைக்கு சென்றபோதும் அவரே முக்கிய குற்றச்சாட்டுக்குள்ளான நபராக இருந்தார். ஆனால் 2023ஆம் ஆண்டு நடைபெற்ற விசாரணையின் முடிவில், அவருக்கு எதிராக குற்றத்தை நிரூபிக்கும் போதுமான ஆதாரங்கள் இல்லை என்று கூறி அவர் விடுவிக்கப்பட்டார்.
இதனால், வழக்கில் குற்றவாளி என சட்டரீதியாக உறுதி செய்யப்பட்டவர் யாரும் இல்லாத நிலை ஏற்பட்டது. இதற்குப் பிறகு சௌஜன்யாவின் குடும்பத்தினர் வழக்கை மீண்டும் விசாரிக்க வேண்டும் என்று தொடர்ந்து கோரிக்கை வைத்தனர். 2024ஆம் ஆண்டு கர்நாடக உயர்நீதிமன்றத்திலும் அவர்கள் மனு தாக்கல் செய்தனர்.
ஆனால் புதிய விசாரணை நடத்துவதால் பயனில்லை என்ற காரணத்துடன் அந்த கோரிக்கை நிராகரிக்கப்பட்டது. இதையடுத்து சௌஜன்யாவின் தாயார் உச்சநீதிமன்றத்தை அணுகினார். அவரது கணவர் ஏற்கனவே உயிரிழந்த நிலையில், மகளுக்கு நீதி கிடைக்க வேண்டும் என்ற கோரிக்கையுடன் அவர் சட்டப் போராட்டத்தைத் தொடர்ந்தார்.
இந்த வழக்கில் முக்கிய திருப்பமாக அமைந்தது பழைய தடயங்கள் தொடர்பான தகவல்தான். சௌஜன்யாவின் ஆடையில் சில முடி இழைகள் கண்டெடுக்கப்பட்டதாக விசாரணை பதிவுகளில் குறிப்பிடப்பட்டுள்ளது. அவற்றில் சந்தோஷ் ராவின் முடிகளுடன், வேறு நபர்களுடைய முடிகளும் இருந்ததாக நீதிமன்றத்தில் நிபுணர் ஒருவர் தெரிவித்திருந்தார்.
சந்தேக நபர்கள் அடையாளம் காணப்பட்டால், அவர்களுடைய மரபணு மாதிரிகளுடன் அந்த முடி இழைகளை ஒப்பிட முடியும் என்றும் அவர் கூறியிருந்தார். இதுதான் தற்போது உச்சநீதிமன்றத்தின் கவனத்தை ஈர்த்த முக்கிய அம்சங்களில் ஒன்றாக உள்ளது. 14 ஆண்டுகள் கடந்துவிட்டதால் பழைய ஆதாரங்கள் அனைத்தும் பயனற்றதாகிவிடும் என்று கூற முடியாது என நீதிமன்றம் தெரிவித்துள்ளது. கிடைக்கும் தடயங்கள், மருத்துவப் பதிவுகள், பழைய விசாரணை ஆவணங்கள் மற்றும் புதிதாக கிடைக்கக்கூடிய தகவல்கள் அனைத்தையும் அறிவியல் முறையில் ஆய்வு செய்ய வேண்டும் என்று நீதிமன்றம் கருதியுள்ளது.
மேலும், முன்பு விசாரணை நடத்திய அதிகாரிகளே புதிய விசாரணைக் குழுவில் இடம்பெறக் கூடாது என்றும் உச்சநீதிமன்றம் உத்தரவிட்டுள்ளது. அதற்குப் பதிலாக புதிய சிறப்பு விசாரணைக் குழுவை அமைத்து, நவீன விசாரணை தொழில்நுட்பங்களை பயன்படுத்தி வழக்கை மீண்டும் முழுமையாக ஆராய வேண்டும் என்று கூறப்பட்டுள்ளது. புதிய குழு மூன்று மாதங்களுக்குள் விசாரணையின் முன்னேற்றம் குறித்து அறிக்கை அளிக்க வேண்டும் என்றும் நீதிமன்றம் உத்தரவிட்டுள்ளது.
அதே நேரத்தில், ஏற்கனவே வழக்கில் இருந்து விடுவிக்கப்பட்ட சந்தோஷ் ராவை மீண்டும் குற்றவாளியாக்கும் நோக்கில் புதிய விசாரணை நடத்தக்கூடாது என்பதையும் உச்சநீதிமன்றம் தெளிவுபடுத்தியுள்ளது. புதிய விசாரணையின் நோக்கம் பழைய குற்றச்சாட்டை மீண்டும் உறுதி செய்வது அல்ல; உண்மையில் நடந்தது என்ன என்பதை ஆதாரங்களின் அடிப்படையில் கண்டறிவதே என நீதிமன்றத்தின் உத்தரவு காட்டுகிறது.
இந்த தீர்ப்பில் இன்னொரு முக்கியமான சட்டக் கருத்தையும் உச்சநீதிமன்றம் முன்வைத்துள்ளது. ஒருவருக்கு நியாயமான விசாரணை கிடைப்பது மட்டுமல்லாமல், ஒரு குற்றத்தில் பாதிக்கப்பட்டவருக்கும் நியாயமான விசாரணை கிடைக்க வேண்டும் என்பது அரசியலமைப்பின் 21வது பிரிவுடன் தொடர்புடைய உரிமை என நீதிமன்றம் குறிப்பிட்டுள்ளது.
விசாரணை முறையாக நடைபெறவில்லை என்றால், அதனால் உண்மையான குற்றவாளி கண்டறியப்படாமல் போகும் அபாயம் உள்ளது. 14 ஆண்டுகளுக்கு முன்பு முடிவில்லாமல் நின்ற ஒரு வழக்கு தற்போது மீண்டும் தொடங்கியுள்ளது. புதிய விசாரணையில் எந்த ஆதாரங்கள் கிடைக்கின்றன, பழைய தடயங்களில் இருந்து ஏதேனும் புதிய தகவல் கிடைக்கிறதா, சம்பவத்தில் வேறு நபர்களுக்கு தொடர்பு உள்ளதா என்பதற்கான பதில்கள் இனிமேல்தான் தெரியவரும்.
நீதிமன்றம் ஏற்கனவே ஒருவரை குற்றமற்றவர் என விடுவித்துள்ள நிலையில், புதிய விசாரணையின் முடிவு ஆதாரங்களின் அடிப்படையிலேயே அமைய வேண்டும் என்பதே இப்போது முக்கியமான அம்சமாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்
