.png)
இந்தியாவிற்கும் நியூசிலாந்திற்கும் இடையிலான வர்த்தக உறவில் ஒரு புதிய சகாப்தம் தொடங்கியுள்ளது. இரு நாடுகளுக்கும் இடையே பல ஆண்டுகளாக நிலுவையில் இருந்த 'சுதந்திர வர்த்தக ஒப்பந்தம்' (FTA) திங்கட்கிழமை அன்று அதிகாரப்பூர்வமாகக் கையெழுத்தானது. டெல்லியில் உள்ள பாரத் மண்டபத்தில் நடைபெற்ற நிகழ்ச்சியில், இந்திய வர்த்தகத் துறை அமைச்சர் பியூஷ் கோயல் மற்றும் நியூசிலாந்து வர்த்தகத் துறை அமைச்சர் டாட் மெக்லே ஆகியோர் இந்த வரலாற்றுச் சிறப்புமிக்க ஒப்பந்தத்தில் கையெழுத்திட்டனர். இந்த ஆண்டு இறுதிக்குள் நடைமுறைக்கு வரவுள்ள இந்த ஒப்பந்தம், நியூசிலாந்து நாடாளுமன்றத்தின் ஒப்புதலுக்குப் பிறகு முழுமையாகச் செயல்பாட்டிற்கு வரும்.
இந்த ஒப்பந்தம் குறித்துப் பேசிய நியூசிலாந்து பிரதமர் கிறிஸ்டோபர் லக்சன், இது ஒரு தலைமுறையில் ஒருமுறை மட்டுமே நிகழும் மிக முக்கியமான ஒப்பந்தம் என்று வர்ணித்துள்ளார். உலகின் மூன்றாவது பெரிய பொருளாதாரமாக இந்தியா வளர்ந்து வரும் நிலையில், 140 கோடி மக்களைக் கொண்ட இந்தியச் சந்தை நியூசிலாந்து ஏற்றுமதியாளர்களுக்கு ஒரு மிகப்பெரிய வாய்ப்பாக அமையும் என்று அவர் நம்பிக்கை தெரிவித்துள்ளார். கடந்த 2025-ம் ஆண்டு மார்ச் மாதம் மீண்டும் தொடங்கப்பட்ட பேச்சுவார்த்தைகள், வெறும் ஒன்பதே மாதங்களில் டிசம்பர் மாதத்திற்குள் முடிக்கப்பட்டது குறிப்பிடத்தக்கது. இது இந்தியாவின் மிக வேகமான வர்த்தக ஒப்பந்தங்களில் ஒன்றாகப் பார்க்கப்படுகிறது.
இந்த ஒப்பந்தத்தின் மூலம் இந்திய ஏற்றுமதியாளர்களுக்கு ஒரு ஜாக்பாட் அடித்துள்ளது என்றே சொல்லலாம். இதன்படி, நியூசிலாந்திற்கு ஏற்றுமதி செய்யப்படும் ஜவுளி, ஆடை, தோல் பொருட்கள், மருந்துகள், இயந்திரங்கள் மற்றும் ஆட்டோ பாகங்கள் உள்ளிட்ட சுமார் 8,284 பொருட்களுக்கு இனி 100 சதவீதம் வரி விலக்கு அளிக்கப்படும். இதற்கு முன்பு இந்தப் பொருட்களுக்குச் சராசரியாக 2.2 சதவீதம் வரி விதிக்கப்பட்டது, சில குறிப்பிட்ட ஆடைகளுக்கு 10 சதவீதம் வரை வரி இருந்தது. இனி இந்த வரிச் சுமைகள் இல்லாததால், இந்தியப் பொருட்கள் நியூசிலாந்து சந்தையில் மிக மலிவான விலையில் கிடைக்கும், இதனால் விற்பனை பன்மடங்கு உயரும்.
பொருட்கள் மட்டுமல்லாமல், இந்திய இளைஞர்களின் வேலைவாய்ப்பு மற்றும் விசா நடைமுறைகளிலும் பெரிய முன்னேற்றம் ஏற்பட்டுள்ளது. இந்த ஒப்பந்தத்தின் கீழ், ஐடி (IT), சுகாதாரம், கட்டுமானம் மற்றும் கல்வித் துறைகளைச் சேர்ந்த 5,000 இந்திய வல்லுநர்களுக்கு விசா வழங்க நியூசிலாந்து ஒப்புக்கொண்டுள்ளது. இது தவிர, ஆண்டுதோறும் 1,000 இளைஞர்களுக்கு 'வேலை மற்றும் விடுமுறை' (Work and Holiday) விசாக்கள் வழங்கப்படும். நியூசிலாந்தில் படிக்கும் இந்திய மாணவர்களுக்குப் படிப்பு முடிந்த பிறகு அங்கேயே தங்கி வேலை செய்வதற்கான வாய்ப்புகளும் இதன் மூலம் அதிகரிக்கப்பட்டுள்ளன.
முதலீட்டைப் பொறுத்தவரை, அடுத்த 15 ஆண்டுகளில் இந்தியாவில் சுமார் 20 பில்லியன் டாலர் (சுமார் 1.6 லட்சம் கோடி ரூபாய்) முதலீடு செய்ய நியூசிலாந்து உறுதி அளித்துள்ளது. இந்த முதலீடுகள் உற்பத்தி, சேவை மற்றும் தொழில்நுட்பத் துறைகளில் மேற்கொள்ளப்படும். அதே சமயம், நியூசிலாந்திலிருந்து இந்தியாவுக்கு இறக்குமதி செய்யப்படும் கம்பளி, மரம், நிலக்கரி மற்றும் ஒயின் போன்ற பொருட்களுக்கான வரிகள் குறைக்கப்பட உள்ளன. இதன் மூலம் இரு நாடுகளுக்கும் இடையிலான வர்த்தகம் அடுத்த ஐந்து ஆண்டுகளில் 5 பில்லியன் டாலராக உயரும் என்று இலக்கு நிர்ணயிக்கப்பட்டுள்ளது.
இந்த ஒப்பந்தத்தில் இந்திய விவசாயிகளின் நலன் கருதி சில முக்கியமான பாதுகாப்பு ஏற்பாடுகளும் செய்யப்பட்டுள்ளன. நியூசிலாந்து உலக அளவில் பால் உற்பத்தியில் முன்னணியில் இருப்பதால், இந்தியப் பால் பண்ணையாளர்களுக்குப் பாதிப்பு ஏற்படும் என்ற அச்சம் இருந்தது. இதனைத் தவிர்க்க, பால் பொருட்கள், வெங்காயம், சர்க்கரை, மசாலாப் பொருட்கள் மற்றும் சமையல் எண்ணெய் போன்ற உணர்வுப்பூர்வமான துறைகளை இந்த ஒப்பந்தத்திலிருந்து இந்தியா விலக்கி வைத்துள்ளது. இதன் மூலம் உள்நாட்டு விவசாயிகளின் வாழ்வாதாரம் காக்கப்படும் என்று மத்திய அரசு உறுதி அளித்துள்ளது.
ஒட்டுமொத்தமாகப் பார்க்கையில், இந்த 'ஒன்ஸ் இன் ஏ ஜெனரேஷன்' ஒப்பந்தம் இந்தியாவின் ஏற்றுமதியை ஊக்குவிப்பதோடு மட்டுமல்லாமல், உலகளாவிய உணவு மையமாக (Global Food Hub) இந்தியா உருவெடுக்கவும் உதவும். நியூசிலாந்திலிருந்து மூலப்பொருட்களை இறக்குமதி செய்து, அதை இந்தியாவில் பதப்படுத்தி மீண்டும் ஏற்றுமதி செய்ய இந்திய நிறுவனங்களுக்கு வரி விலக்கு அளிக்கப்பட்டுள்ளது. இது இந்தியாவின் உற்பத்தித் துறைக்கும், வேலைவாய்ப்பு உருவாக்கத்திற்கும் ஒரு புதிய உத்வேகத்தைத் தரும் என்பதில் சந்தேகமில்லை.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
