.png)
இந்திய அரசியலையே உலுக்கும் விதமாக மகாராஷ்டிர மாநில துணை முதல்வர் அஜித் பவார் இன்று காலை புனே மாவட்டத்தில் நிகழ்ந்த கோர விமான விபத்தில் சிக்கி உயிருடன் உடல் கருகி உயிரிழந்தார். அவருடன் பயணித்த நான்கு பேரும் இந்த விபத்தில் பரிதாபமாக உயிரிழந்துள்ளனர். உள்ளாட்சித் தேர்தல் தொடர்பான நான்கு முக்கியமான பொதுக்கூட்டங்களில் பங்கேற்பதற்காக மும்பையிலிருந்து தனி விமானம் மூலம் அவர் புறப்பட்ட நிலையில், இந்த எதிர்பாராத அசம்பாவிதம் நிகழ்ந்துள்ளது. ஒரு செல்வாக்குமிக்க அரசியல் தலைவரின் இந்தப் பயணம் இப்படி ஒரு மரணப் பயணமாக அமையும் என்று யாரும் எதிர்பார்க்கவில்லை.
விமானப் போக்குவரத்து இயக்குநரகம் அளித்துள்ள முதற்கட்டத் தகவலின்படி, காலை 8:45 மணியளவில் பாராமதி விமான நிலையத்தில் தரையிறங்க முயன்றபோது அந்தச் சிறிய ரக விமானம் கடுமையான தொழில்நுட்பக் கோளாறுக்கு உள்ளாகியுள்ளது. நிலைதடுமாறிய விமானத்தை விமானி மீண்டும் ஒருமுறை தரையிறக்க முயன்றபோது, அது கட்டுப்பாட்டை இழந்து ஓடுதளத்திலேயே விழுந்து நொறுங்கி தீப்பிடித்தது. இந்த விபத்தில் அஜித் பவாருடன் சேர்த்து, அவரது தனிப் பாதுகாப்பு அதிகாரி, ஒரு உதவியாளர் மற்றும் இரண்டு விமானிகள் என மொத்தம் ஐந்து பேர் சம்பவ இடத்திலேயே உயிரிழந்துள்ளனர். விபத்து நடந்த இடத்தில் விமானம் முற்றிலும் சிதைந்து, கரும்புகையுடன் தீப்பற்றி எரிந்த காட்சிகள் பார்ப்போரை உறைய வைத்தன.
இந்த விபத்தில் சிக்கிய விமானம் வி.எஸ்.ஆர் வென்ச்சர்ஸ் பிரைவேட் லிமிடெட் நிறுவனத்திற்குச் சொந்தமான 'லியர்ஜெட் 45எக்ஸ்ஆர்' (Learjet 45XR) ரகத்தைச் சேர்ந்தது. பாம்பார்டியர் ஏரோஸ்பேஸ் நிறுவனத்தால் தயாரிக்கப்பட்ட இந்த நடுத்தர ரக சொகுசு விமானம், அதிவேகமாகப் பயணிக்கக்கூடியது மற்றும் வானில் சுமார் 51,000 அடி உயரம் வரை பறக்கும் திறன் கொண்டது. வி.கே. சிங் என்பவருக்குச் சொந்தமான இந்த நிறுவனம், தனியார் ஜெட் மற்றும் ஹெலிகாப்டர் வாடகை சேவைகளில் இந்தியாவில் முன்னணியில் உள்ள ஒன்றாகக் கருதப்படுகிறது. இவ்வளவு நவீன வசதிகள் கொண்ட ஒரு விமானம் தரையிறங்கும் போது விபத்துக்குள்ளானது பாதுகாப்பு ஏற்பாடுகள் குறித்த பல கேள்விகளை எழுப்பியுள்ளது.
அஜித் பவாரின் மறைவு மகாராஷ்டிர அரசியலில் ஈடு செய்ய முடியாத ஒரு பெரிய வெற்றிடத்தை உருவாக்கியுள்ளது. பல தசாப்தங்களாக அம்மாநிலத்தின் அதிகார மையமாகத் திகழ்ந்த அவர், இப்படி ஒரு அகால மரணத்தைச் சந்திப்பார் என்று அவரது ஆதரவாளர்கள் கனவிலும் நினைத்திருக்க மாட்டார்கள். விபத்து நடந்த இடத்தைச் சுற்றிலும் சிதறிக் கிடக்கும் விமான பாகங்களும், தீயில் கருகிய கோலமும் அந்த விபத்தின் கோரத்தை உணர்த்துகின்றன. தற்போது விபத்து நடந்த பகுதி அதிகாரிகளின் கட்டுப்பாட்டிற்குள் கொண்டு வரப்பட்டுள்ளதுடன், தொழில்நுட்பக் கோளாறுகளுக்கான துல்லியமான காரணங்களைக் கண்டறிய தீவிர விசாரணை தொடங்கப்பட்டுள்ளது. ஒரு மாநிலத்தின் மிக முக்கியத் தலைவரை இழந்து ஒட்டுமொத்த மகாராஷ்டிராவும் இன்று கண்ணீரில் மூழ்கியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
