"ஆளுநருக்காக நாங்கள் காத்திருக்கணுமா?" - போக்குவரத்து நெரிசலில் சிக்கிய கர்ப்பிணிப் பெண்; ஆளுநர் கான்வாய்க்கு எதிராகக் கொதித்த கணவர்!

பெங்களூருவின் புகழ்பெற்ற போக்குவரத்து நெரிசலில் சிக்கித் தவிப்பதே பெரும்பாடு, இதனுடன் விஐபி கான்வாய்களுக்காகச் சாலைகளை மூடுவது சாமானிய மக்களின் பொறுமையைச் சோதிக்கிறது. பெங்களூருவின் ஓல்ட் ஏர்போர்ட் சாலையில் கர்நாடக ஆளுநர் தாவர்சந்த் கெலாட் அவர்களது கான்வாய் செல்வதற்காகச் சாலை நீண்ட நேரம் மறிக்கப்பட்டிருந்தது. அந்த நேரத்தில் தனது கர்ப்பிணி மனைவியுடன் காரில் சென்றுகொண்டிருந்த நபர் ஒருவர், இந்தத் தாமதத்தைக் கண்டு கடும் அதிருப்தி அடைந்தார். இதனால் விஐபி கலாச்சாரத்திற்கு எதிர்ப்புத் தெரிவிக்கும் வகையில், அவர் காரிலிருந்து இறங்கி சாலையின் நடுவே அமர்ந்து போராட்டம் நடத்தத் தொடங்கினார்.

தன்னுடைய மனைவி கர்ப்பமாக இருப்பதாகவும், தமக்கும் மிக முக்கியமான வேலைகள் இருப்பதாகவும் அந்த நபர் ஆவேசமாகக் கேள்வி எழுப்பினார். அந்த இடத்தில் இருந்த போக்குவரத்து ஆய்வாளருக்கும் அவருக்கும் இடையே நடந்த வாக்குவாதம் சமூக வலைதளங்களில் வைரலாகி வருகிறது. "என் மனைவி கர்ப்பமாக இருக்கிறார், எங்களுக்கும் வேலை இருக்கிறது இல்லையா?" என்று அவர் கேட்க, போக்குவரத்து காவலர் அவரை எழுந்து செல்லும்படி எச்சரிக்கிறார். ஆனால், "ஆளுநர் விஐபி என்பதற்காக நாங்கள் யாரும் இல்லையா?" என்று அவர் விடாப்பிடியாகக் கேட்டது அங்கிருந்தவர்களைக் கவலையில் ஆழ்த்தியது.

இந்த வீடியோ வைரலாகப் பரவி வரும் நிலையில், அவர் எவ்வாறு அங்கிருந்து கிளம்பினார் என்பது குறித்த தெளிவான தகவல் இல்லை. இருப்பினும், இந்தச் சம்பவம் இந்தியாவில் நீண்ட காலமாக விஐபி கலாச்சாரம் குறித்து நிலவும் அதிருப்தியை மீண்டும் வெளிச்சத்திற்குக் கொண்டு வந்துள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.