“பிரச்சாரத்தில் எதிர்ப்பு.. வாக்கு எண்ணிக்கையில் ட்விஸ்ட்!” - கட்சி மாறியும் வெற்றியைப் பதிவு செய்த சத்தியபாமா!

திருப்பூர் மாவட்டம் தாராபுரம் சட்டப்பேரவைத் தொகுதி இடைத்தேர்தலில், தமிழக வெற்றிக் கழக வேட்பாளர் சத்தியபாமா வெற்றி பெற்றுள்ளார். 23-வது சுற்று வாக்கு எண்ணிக்கை நிலவரப்படி, அவர் 65,086 வாக்குகளைப் பெற்று வெற்றியைத் தன்வசப்படுத்தியுள்ளார். தாராபுரம் தொகுதி இடைத்தேர்தல் வாக்கு எண்ணிக்கையின் தொடக்கத்தில் தவெக முன்னிலை பெற்ற நிலையில், இடையில் அதிமுக முன்னிலை பெற்றது. இதனால் தேர்தல் களத்தில் தொடர்ந்து பரபரப்பு நிலவியது. பின்னர் முன்னிலை மாறி மாறி வந்ததால், இறுதி முடிவு யாருக்குச் சாதகமாக அமையும் என்ற எதிர்பார்ப்பு அதிகரித்தது.

கடந்த சட்டமன்றத் தேர்தலில் அதிமுக சார்பில் போட்டியிட்டு வெற்றி பெற்ற சத்தியபாமா, தனது சட்டமன்ற உறுப்பினர் பதவியை ராஜினாமா செய்துவிட்டு தமிழக வெற்றிக் கழகத்தில் இணைந்தார். இதையடுத்து நடைபெற்ற இடைத்தேர்தலில் தவெக சார்பில் மீண்டும் தாராபுரம் தொகுதியில் களமிறங்கினார். சத்தியபாமாவை ஆதரித்து தவெக தலைவர் விஜய் நேரடியாகத் தேர்தல் பிரச்சாரத்தில் ஈடுபட்டார். அப்போது மாட்டுவண்டி ஓட்டியும், முருங்கைக்காய் பறித்தும் அவர் வாக்கு சேகரித்தார். இருப்பினும், பிரச்சாரத்தின்போது சத்தியபாமாவுக்கு தொகுதி மக்களிடையே எதிர்ப்பு இருந்ததாகத் தகவல்கள் வெளியாகின. இதனால் அவரது வெற்றி வாய்ப்பு குறித்து அரசியல் வட்டாரங்களில் பல்வேறு விவாதங்கள் எழுந்தன.

வாக்கு எண்ணிக்கை தொடங்கிய முதல் இரண்டு சுற்றுகள் வரை சத்தியபாமா முன்னிலை வகித்தார். பின்னர் அதிமுக வேட்பாளர் பானுமதி முன்னிலை பெற்றதால், அதிமுக தொண்டர்கள் சென்னை ராயப்பேட்டையில் உள்ள கட்சித் தலைமை அலுவலகத்தில் திரண்டு இனிப்புகள் வழங்கிக் கொண்டாடினர். ஆனால், அடுத்தடுத்த சுற்றுகளில் மீண்டும் முன்னிலை பெற்ற சத்தியபாமா, 23-வது சுற்று வாக்கு எண்ணிக்கை நிலவரப்படி 65,086 வாக்குகளைப் பெற்று வெற்றி பெற்றுள்ளார்.

இதன் மூலம் தாராபுரம் தொகுதியில் தமிழக வெற்றிக் கழகம் தனது வெற்றியைப் பதிவு செய்துள்ளது. தொடக்கத்தில் முன்னிலை மாற்றங்கள், வெற்றி வாய்ப்பு குறித்த விவாதங்கள் எனப் பரபரப்பாக இருந்த தாராபுரம் இடைத்தேர்தல் களம், தற்போது சத்தியபாமாவின் வெற்றியுடன் முடிவுக்கு வந்துள்ளது. அதிமுகவில் இருந்து தவெகவுக்கு மாறி மீண்டும் அதே தொகுதியில் போட்டியிட்ட சத்தியபாமாவின் வெற்றி, இந்த இடைத்தேர்தலின் முக்கிய அரசியல் திருப்பமாகப் பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்