ராஜபாளையம் யாருக்கு? வெல்லப் போவது யார்? "மாலை முரசு - கான்சிலிடிக்ஸ்" கருத்துக்கணிப்பு முடிவுகள்!

"மாலை முரசு - கான்சிலிடிக்ஸ்" இணைந்து தமிழகம் முழுவதும் நடத்திய மாபெரும் கருத்துக்கணிப்பு முடிவுகள் குறித்து "Tamil Nadu Political League" நிகழ்ச்சியில் ராஜபாளையம் தொகுதி பற்றியும், வரும் சட்டமன்ற தேர்தலில் அங்கு வெற்றிப் பெற அதிகம் வாய்ப்புள்ள கூட்டணி எது? என்பது குறித்த தகவல்கள் இங்கே தொகுக்கப்பட்டுள்ளன. விருதுநகர் மாவட்டத்தின் மிக முக்கியமான தொழில்துறை மையமான ராஜபாளையம், தென்காசி நாடாளுமன்றத் தொகுதியின் கீழ் வரும் ஒரு பாரம்பரியமிக்க தொகுதியாகும். உலகப்புகழ் பெற்ற ராஜபாளையம் நாய் இனம் மற்றும் சேத்தூர் பேண்டேஜ் காட்டன் மில்களுக்குப் பெயர்போன இந்தத் தொகுதி, மூன்று முதலமைச்சர்களை வழங்கிய விருதுநகர் மாவட்டத்தின் ஒரு அங்கமாகத் திகழ்கிறது.

ராஜபாளையம் தொகுதியின் முக்கிய வாக்காளர் அடையாளங்களை ஆய்வு செய்ததில், இங்கு வாக்காளர்களின் வயதுப் பகிர்வு குறிப்பிடத்தக்க தாக்கத்தை ஏற்படுகிறது. 18 முதல் 25 வயதுடைய இளைஞர்கள் 13.12 சதவீதமும், 26 முதல் 40 வயதுடையவர்கள் 29.7 சதவீதமும் உள்ளனர். தொகுதியில் 41 முதல் 60 வயதுடையவர்கள் 40 சதவீதமாகவும், 60 வயதிற்கு மேற்பட்டவர்கள் 17 சதவீதமாகவும் உள்ளனர். சமுதாய ரீதியாகப் பார்த்தால், தேவேந்திர குல வேளாளர்கள் 22 சதவீதம், முக்குலத்தோர் 15 சதவீதம், நாடார்கள் 14 சதவீதம் மற்றும் சாலியர் சமுதாயத்தினர் 5 சதவீதம் எனப் பரவலாக உள்ளனர். நாயுடு சமூகத்தினரும் இங்கு கணிசமான எண்ணிக்கையில் உள்ளனர். கடந்த முறை நாடார் சமூகத்தைச் சேர்ந்த தங்கப்பாண்டியன் வெற்றி பெற்ற நிலையில், அதிமுகவின் கே.டி. ராஜேந்திர பாலாஜி அவருக்குக் கடும் சவாலாகத் திகழ்ந்தார் என்பது குறிப்பிடத்தக்கது.

இங்கு நிலவும் முக்கிய உள்ளூர் பிரச்சினைகளாகப் பாதாளச் சாக்கடைத் திட்டம் முறையாகச் செயல்படாததும், கழிவுநீர் தெருக்களில் ஓடுவதும் பொதுமக்களுக்குப் பெரும் தலைவலியாக உள்ளது. மேற்குத் தொடர்ச்சி மலை அடிவாரத்தில் அமைந்துள்ளதால் வனவிலங்குகள் ஊடுருவிப் பயிர்களைச் சேதப்படுத்துவது விவசாயிகளுக்குப் பெரும் குறையாக உள்ளது. பஞ்சு மில்களில் வேலை செய்யும் விசைத்தறித் தொழிலாளர்களின் ஊதியப் பிரச்சினை மற்றும் எலுமிச்சை விவசாயிகளின் பொருளாதார மேம்பாட்டிற்கான திட்டங்கள் போதிய அளவில் இல்லை. ராஜபாளையம் நகராட்சியை மாநகராட்சியாகத் தரம் உயர்த்த வேண்டும் என்பதும், இப்பகுதி இளைஞர்களுக்காக ஐ.டி பார்க் அமைக்கப்பட வேண்டும் என்பதும் நீண்ட காலக் கோரிக்கைகளாக உள்ளன. மேலும், ரயில்வே வசதிகள் மற்றும் புறவழிச்சாலை மேம்பாலப் பணிகளை விரைந்து முடிக்க வேண்டும் என்பதும் மக்களின் எதிர்பார்ப்பாக உள்ளது.

கடந்த 2021 சட்டமன்றத் தேர்தல் முடிவுகளின்படி, திமுகவின் தங்கப்பாண்டியன் 41.9 சதவீத வாக்குகளைப் பெற்று வெற்றி பெற்றார். அதிமுகவின் கே.டி. ராஜேந்திர பாலாஜி 39.7 சதவீத வாக்குகளைப் பெற்று மிகக் குறைந்த இடைவெளியில் வெற்றியை நழுவவிட்டார். நாம் தமிழர் கட்சி 8.8 சதவீத வாக்குகளையும், அமமுக 4.3 சதவீத வாக்குகளையும் பெற்றன. அந்தத் தேர்தலில் திமுக 155 பூத்களில் வலுவாகவும், 185 பூத்களில் பலவீனமாகவும் இருந்தது. அதிமுக 140 பூத்களில் வலுவாகவும், 200 பூத்களில் பலவீனமாகவும் இருந்த நிலையில், வெறும் 51 பூத்கள் மட்டுமே ஸ்விங் பூத்களாக இருந்தன. தொடர்ந்து 2024 நாடாளுமன்றத் தேர்தலில் திமுக கூட்டணி 39.3 சதவீத வாக்குகளைப் பெற்ற நிலையில், அதிமுக மற்றும் பாஜக கூட்டணி இணைந்து 41.5 சதவீத வாக்குகளைப் பெற்று முன்னிலை பெற்றது. நாம் தமிழர் கட்சி 16.2 சதவீத வாக்குகளைப் பெற்றுத் தனது ஓட்டு வங்கியைப் பெரிய அளவில் உயர்த்தியது குறிப்பிடத்தக்கது.

தற்போது 'கான்சிலிடிக்ஸ்' குழுவினர் நடத்திய 2026 தேர்தல் கணிப்பின்படி, ராஜபாளையம் தொகுதியில் அதிமுக கூட்டணி மீண்டும் முன்னிலை பெற வாய்ப்புள்ளதாகத் தெரிகிறது. வரும் தேர்தலில் அதிமுக கூட்டணி 39 சதவீத வாக்குகளைப் பெற்று முதலிடத்தைப் பிடிக்கக்கூடும் என்று கணிக்கப்பட்டுள்ளது. ஆளும் திமுக கூட்டணி 37 சதவீத வாக்குகளைப் பெற்று இரண்டாம் இடத்திற்குத் தள்ளப்பட வாய்ப்புள்ளது. தமிழக வெற்றிக் கழகம் 10 சதவீத வாக்குகளையும், நாம் தமிழர் கட்சி 5 சதவீத வாக்குகளையும் என இரு கட்சிகளும் இணைந்து 15 சதவீத வாக்குகளைப் பிரிக்கக்கூடும். பூத் வாரியான தரவுகளின்படி, தற்போது அதிமுக 145 பூத்களில் வலுவான நிலையில் உள்ளதாகவும், திமுக 125 பூத்களில் வலுவாக உள்ளதாகவும் புள்ளிவிவரங்கள் கூறுகின்றன. சுமார் 40 பூத்கள் இன்னும் எந்தப் பக்கம் என்பதைத் தீர்மானிக்க முடியாத ஸ்விங் நிலையில் உள்ளன.

இந்தத் தொகுதியில் அதிமுக மற்றும் திமுக இடையேயான வெற்றி வித்தியாசம் வெறும் 2 சதவீதமாக மட்டுமே இருக்கும் என்று கணிக்கப்பட்டுள்ளது. குறிப்பாக சமுதாயச் சமன்பாடுகள் மற்றும் அதிமுக கூட்டணியில் ஜான் பாண்டியன் போன்றவர்களின் வருகை தேவேந்திர குல வேளாளர் வாக்குகளை ஒருங்கிணைக்க உதவும் என்று எதிர்பார்க்கப்படுகிறது. தற்போதைய சூழலில் உதயசூரியன் மற்றும் தாமரைச் சின்னத்திற்கு இடையே கடும் போட்டி நிலவும் என்றாலும், பூத் வாரியான பலம் மற்றும் கூட்டணி பலத்தின் அடிப்படையில் அதிமுக கூட்டணி ராஜபாளையத்தில் மகுடம் சூட அதிக வாய்ப்புகள் உள்ளதாக இந்தக் கருத்துக்கணிப்பு முடிவுகள் தெரிவிக்கின்றன.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.