ஆம்பூரில் பிரியாணி போல மணக்குமா திமுக வெற்றி? அல்லது அதிமுகவின் 'செக்' எடுபடுமா? இதோ முழு விவரம்!

"மாலை முரசு - கான்சிலிடிக்ஸ்" இணைந்து தமிழகம் முழுவதும் நடத்திய மாபெரும் கருத்துக்கணிப்பு முடிவுகள் குறித்து "Tamil Nadu Political League" நிகழ்ச்சியில் தொகுதி பற்றியும், வரும் சட்டமன்ற தேர்தலில் அங்கு வெற்றிப் பெற அதிகம் வாய்ப்புள்ள கூட்டணி எது? என்பது குறித்த தகவல்கள் இங்கே தொகுக்கப்பட்டுள்ளன. தோல் தொழிற்சாலைகள் மற்றும் பிரியாணிக்கு உலகப் புகழ்பெற்ற ஆம்பூர் தொகுதி, தொழிலாளர்களின் கோட்டையாகத் திகழ்கிறது. தொழிலாளர் நலன் மற்றும் சுற்றுச்சூழல் பாதுகாப்பு ஆகியவை இந்தத் தொகுதியின் பிரதான அரசியல் சிக்கல்களாக உள்ளன.

ஆம்பூர் தொகுதியின் முக்கிய வாக்காளர் அடையாளங்களாக 41 முதல் 60 வயதுடையவர்கள் 36.5 சதவீதமும், 26 முதல் 40 வயதுடையவர்கள் 33.5 சதவீதமும் உள்ளனர். சமூக ரீதியாக நாயுடு சமுதாயத்தினர் 26 சதவீதமும், வன்னியர்கள் 19 சதவீதமும், முஸ்லிம்கள் 12 சதவீதமும் உள்ளனர். 60 சதவீத கிராமப்புறம் மற்றும் 40 சதவீத நகர்ப்புறத்தைக் கொண்ட இந்தத் தொகுதியில், சமுதாய மற்றும் மத ரீதியான வாக்குகள் மிக முக்கியமான பங்கு வகிக்கின்றன.

முக்கிய உள்ளூர் பிரச்சினைகளாகத் தோல் தொழிற்சாலைகளால் ஏற்படும் ரசாயன மாசுபாடும், அதனால் நிலத்தடி நீர் பாதிக்கப்படுவதும் உள்ளது. மின்சாரத் தட்டுப்பாடு மற்றும் சிறு தொழில்களுக்குத் தேவையான வங்கி கடன் வசதிகள் கிடைக்காதது மக்களின் வாழ்வாதாரத்தைப் பாதித்துள்ளது. ஆம்பூர் பிரியாணி மற்றும் தோல் ஏற்றுமதி தொழில் வளர்ச்சி அடைந்தாலும், அதற்கேற்ற சாலை வசதிகள் மற்றும் சுகாதார உள்கட்டமைப்புகள் இல்லை என்பது மக்களின் நீண்டகாலக் குறையாகும்.

தேர்தல் முடிவுகளின் புள்ளிவிவரங்களைப் பார்க்கும்போது, 2021-ல் திமுக 51.2 சதவீத வாக்குகளைப் பெற்றது, அது 2024-ல் 56.2 சதவீதமாக அதிகரித்துள்ளது. அதிமுக 2021-ல் 39.8 சதவீத வாக்குகளைப் பெற்ற நிலையில், 2024-ல் 36 சதவீதமாகச் சரிந்துள்ளது. பூத் அளவில், 2021-ல் திமுக 105 பூத்களில் வலுவாக இருந்தது, 2024-ல் அது 127 ஆக உயர்ந்துள்ளது. அதிமுக 2021-ல் 81 பூத்களில் வலுவாக இருந்த நிலையில், 2024-ல் 74 பூத்களாகக் குறைந்துள்ளது. சுமார் 22 பூத்கள் ஊசலாடும் நிலையில் உள்ளன.

2026 தேர்தல் கணிப்பின்படி, ஆம்பூரில் திமுக 110 வாக்குச்சாவடிகளில் வலுவாகவும், அதிமுக 85 வாக்குச்சாவடிகளிலும் வலுவாக உள்ளன. சுமார் 60 வாக்குச்சாவடிகள் இன்னும் முடிவெடுக்காத ஸ்விங் பூத்களாக உள்ளன. கான்சிலிடிக்ஸ் குழுவின் முடிவுகளின்படி, 2026-ல் அதிமுக 32 சதவீத வாக்குகளைப் பெறும் எனத் தெரிகிறது. திமுக 38 சதவீத வாக்குகளைப் பெறும் நிலையில் உள்ளது. தமிழக வெற்றிக் கழகம் மற்றும் நாம் தமிழர் கட்சி இணைந்து 25 சதவீத வாக்குகளைப் பெறும். சுமார் 6 சதவீத வெற்றி வித்தியாசத்தில் தற்போது திமுக முன்னிலையில் உள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.