.png)
தமிழகத்தில் வடகிழக்குப் பருவமழை தீவிரமடைந்துள்ள நிலையில், இன்று (அக்டோபர் 22) 17 மாவட்டங்களுக்கு மிக கனமழைக்கான ஆரஞ்சு எச்சரிக்கையும், 9 மாவட்டங்களுக்கு கனமழைக்கான மஞ்சள் எச்சரிக்கையும் விடுக்கப்பட்டுள்ளது. இதற்கிடையே, தென்கிழக்கு வங்கக்கடலில் நாளை புதிய காற்றழுத்தத் தாழ்வுப்பகுதி உருவாக வாய்ப்புள்ளதாகவும், அது வலுவடைந்து புயலாக மாறக்கூடும் என்றும் வானிலை நிலவரங்கள் தெரிவிக்கின்றன.
17 மாவட்டங்களுக்கு ஆரஞ்சு அலர்ட்!
இன்று தமிழகத்தின் தென் மற்றும் மேற்கு மாவட்டங்களில் கனமழை முதல் மிக கனமழை வரை பெய்யக்கூடும் எனக் கணிக்கப்பட்டுள்ளது. இதன்படி, தூத்துக்குடி, திருநெல்வேலி, கன்னியாகுமரி, தென்காசி, மதுரை, தேனி, திண்டுக்கல், விருதுநகர், ராமநாதபுரம், தஞ்சாவூர், திருவாரூர், நாகப்பட்டினம், மயிலாடுதுறை, நீலகிரி, கோயம்புத்தூர், சிவகங்கை, புதுக்கோட்டை ஆகிய 17 மாவட்டங்களுக்கு ஆரஞ்சு எச்சரிக்கை விடுக்கப்பட்டுள்ளதாகத் தெரிவிக்கப்பட்டுள்ளது.
அதேபோல், ஈரோடு, திருப்பூர், கரூர், நாமக்கல், திருச்சி, பெரம்பலூர், அரியலூர், கடலூர், விழுப்புரம் ஆகிய 9 மாவட்டங்களில் கனமழை பெய்ய வாய்ப்புள்ளதால் மஞ்சள் எச்சரிக்கை விடுக்கப்பட்டுள்ளது.
தென்கிழக்கு வங்கக்கடலில் நாளை புதிய காற்றழுத்தத் தாழ்வுப்பகுதி உருவாக வாய்ப்புள்ளதாகக் கணிக்கப்பட்டுள்ளது. இந்த வானிலை அமைப்பு வலுவடைந்து புயலாக மாறக்கூடும் என்றும் தெரிவிக்கப்பட்டுள்ளது. அவ்வாறு புயல் உருவானால், அதற்கு ‘முரசு’ எனப் பெயரிடத் திட்டமிடப்பட்டுள்ளதாகத் தகவல்கள் தெரிவிக்கின்றன. இந்தப் பெயரை இந்திய வானிலை ஆய்வு மையம் பரிந்துரைத்ததாகக் கூறப்படுகிறது.
இதற்கிடையே, தென்மேற்கு வங்கக்கடலில் நிலவும் காற்றழுத்தத் தாழ்வுப் பகுதியின் தாக்கத்தால் அடுத்த 3 முதல் 4 நாட்களுக்கு தமிழகம் மற்றும் கேரளாவில் பரவலாக மழை பெய்யக்கூடும் என வானிலை ஆய்வாளர்கள் தெரிவிக்கின்றனர்.
என்ன சொல்கிறார் தமிழ்நாடு வெதர்மேன் பிரதீப் ஜான்?
பிரதீப் ஜானின் கணிப்புபடி, அக்டோபர் 23 முதல் 25ஆம் தேதி வரை தமிழகத்தின் பல பகுதிகளில் மழை தொடரக்கூடும். தென் மற்றும் மேற்கு மாவட்டங்களில் கனமழை முதல் மிக கனமழை வரை பெய்ய வாய்ப்புள்ள நிலையில், சென்னை உள்ளிட்ட வட மாவட்டங்களிலும் பகல் நேரத்தில் திடீரென பலத்த மழை பெய்யக்கூடும்.
சென்னை மற்றும் சுற்றுவட்டாரக் கடலோரப் பகுதிகளில் இடைவெளிவிட்டு மழை பெய்யலாம் என்றும், இரவு மற்றும் அதிகாலை நேரங்களில் மழையின் தீவிரம் அதிகரிக்கலாம் என்றும் கணிக்கப்பட்டுள்ளது.
அடுத்த சில நாட்களில் தமிழகத்தில் நிலவும் மழையின் தீவிரம், வங்கக்கடலில் உருவாகும் புதிய காற்றழுத்தத் தாழ்வுப்பகுதியின் நகர்வு மற்றும் வலிமையைப் பொறுத்து மாறக்கூடும். எனவே, கனமழை எச்சரிக்கை விடுக்கப்பட்டுள்ள மாவட்டங்களில் பொதுமக்கள் வானிலைத் துறையின் அதிகாரப்பூர்வ அறிவிப்புகளைத் தொடர்ந்து கவனிக்க வேண்டும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
