யார் இந்த திரிவேணி குழுமம்? ஒரே திருமணத்தில் அரசியல் தலைவர்கள் முதல் சூர்யா, சிவகார்த்திகேயன் வரை.. சேலம் நிறுவனத்தின் பின்னணி

சேலத்தில் நடைபெற்ற ஒரு திருமண வரவேற்பு விழா, ஒரே நாளில் “திரிவேணி” என்ற பெயரை தமிழகமெங்கும் பேச வைத்திருக்கிறது. அரசியல் தலைவர்கள், திரையுலக பிரபலங்கள் என பலர் அந்த விழாவில் கலந்து கொண்டதாக செய்திகள் வெளியானதும், சமூக வலைதளங்களில் ஒரு கேள்வி வேகமாக எழுந்தது — “யார் இந்த திரிவேணி குடும்பம்?”

பொதுமக்கள் மத்தியில் அதிகம் அறிமுகமில்லாத பெயராக இருந்தாலும், சுரங்கத் தொழில் மற்றும் கனரக பொறியியல் துறையில் Thriveni பல ஆண்டுகளாக செயல்பட்டு வரும் பெரிய தொழில் குழுமமாகும். இதன் தலைமையகம் சேலம் Fairlands பகுதியில் அமைந்துள்ளது. இந்தியாவைத் தாண்டி இந்தோனேசியா, ஆப்பிரிக்கா உள்ளிட்ட பகுதிகளிலும் நிறுவனம் பல்வேறு திட்டங்களில் செயல்பட்டு வருவதாக அதன் அதிகாரப்பூர்வ தகவல்கள் தெரிவிக்கின்றன.

ஒரு Excavator-ல் தொடங்கிய பயணம்

Thriveni-யின் வளர்ச்சிக் கதையில் முக்கியமான பெயர் B. பிரபாகரன். நிறுவனத்தின் அதிகாரப்பூர்வ தகவலின்படி, அவரது தொழில் பயணம் 1990-களில் மிகவும் சிறிய அளவில் தொடங்கியது. 1993-ஆம் ஆண்டு ஒரு Excavator மற்றும் ஒரு ஒப்பந்தப் பணியுடன் தொடங்கிய முயற்சி, அடுத்த சில ஆண்டுகளில் சுரங்கத் தொழிலாக விரிந்தது. இன்று அவர் Thriveni நிறுவனத்தின் Managing Director ஆக உள்ளார்.

ஒரு Excavator-ல் தொடங்கிய நிறுவனம், பின்னர் மிகப்பெரிய சுரங்கத் திட்டங்களை கையாளும் அளவுக்கு வளர்ந்தது என்பதே Thriveni-யின் பயணத்தில் அதிகம் கவனிக்கப்படும் அம்சமாகும். “Earthmovers” என்ற பெயரை பார்த்தவுடன் Excavator, Tipper போன்ற கனரக வாகனங்களை இயக்கும் நிறுவனம் என்ற எண்ணம் வரலாம். ஆனால் Thriveni-யின் பணிகள் அதைவிட மிகவும் விரிவானவை.

ஒரு சுரங்கப் பகுதியை ஆய்வு செய்வது, திட்டப் பணிகளை செயல்படுத்துவது, Engineering மற்றும் Procurement, Drilling, Blasting, Loading, Hauling, Mineral Processing, Logistics, பெரிய இயந்திரங்களை புதுப்பித்து மீண்டும் பயன்பாட்டுக்கு கொண்டுவருவது என சுரங்கத் தொழிலின் பல்வேறு கட்டங்களிலும் நிறுவனம் செயல்பட்டு வருகிறது.

Iron Ore, Coal, Gold, Baryte, Manganese உள்ளிட்ட பல கனிமங்களுடன் தொடர்புடைய பணிகளையும் மேற்கொள்வதாக நிறுவனம் தெரிவித்துள்ளது. Thriveni-யின் அதிகாரப்பூர்வ இணையதள தகவலின்படி, இதுவரை 70-க்கும் மேற்பட்ட திட்டங்களை நிறுவனம் மேற்கொண்டுள்ளது. அதன் பல்வேறு செயல்பாடுகளின் மொத்த உற்பத்தித் திறன் ஆண்டுக்கு 250 Million Tonnes-க்கு மேல் இருப்பதாகவும் நிறுவனம் குறிப்பிடுகிறது.

Thriveni-யின் தலைமையகம் இன்றும் சேலத்தில்தான் உள்ளது. ஆனால் அதன் தொழில் செயல்பாடுகள் சேலத்துக்குள் மட்டுப்படவில்லை. Odisha Mining Corporation, Tata தொடர்பான Joda East திட்டம், NTPC-யின் Pakri Barwadih Coal Project உள்ளிட்ட பல்வேறு பெரிய திட்டங்களில் நிறுவனம் பணியாற்றியுள்ளதாக அதன் அதிகாரப்பூர்வ வரலாறு தெரிவிக்கிறது. 2009-ஆம் ஆண்டு இந்தோனேசியாவிலும் சுரங்கப் பணிகளை தொடங்கியதாக நிறுவனம் கூறுகிறது.

மகாராஷ்டிராவின் Gadchiroli பகுதியில் உள்ள Surjagarh Iron Ore Mine திட்டத்திலும் Thriveni, Mine Developer and Operator ஆக செயல்பட்டு வருகிறது. அதேபோல் NTPC-யின் Pakri Barwadih Coal Block-ல் Thriveni Sainik Mining நிறுவனம் பணியாற்றி வருகிறது.

கனரக இயந்திரங்களுக்கும் தனி Rebuild Centre

Thriveni-யின் இன்னொரு முக்கியமான செயல்பாடு, சுரங்கப் பணிகளில் பயன்படுத்தப்படும் மிகப்பெரிய இயந்திரங்களை புதுப்பித்து மீண்டும் பயன்பாட்டுக்கு கொண்டுவருவது. Jamshedpur பகுதியில் நிறுவனம் நடத்தும் Thriveni Rebuild Centre-ல் இதுவரை 1,000-க்கும் மேற்பட்ட Heavy Earthmoving Machines புதுப்பிக்கப்பட்டுள்ளதாக நிறுவனம் தெரிவித்துள்ளது.

300 Tonne Trucks முதல் மிகப்பெரிய Shovels வரை பல வகையான சுரங்க இயந்திரங்கள் இங்கு மறுசீரமைக்கப்பட்டுள்ளன. சில பெரிய Excavators-ஐ Diesel பயன்பாட்டிலிருந்து Electric Drive முறைக்கு மாற்றும் முயற்சிகளையும் நிறுவனம் மேற்கொண்டுள்ளது. Pakri Barwadih திட்டத்தில் பெரிய Excavator ஒன்றை Electric Drive முறைக்கு மாற்றியதாகவும் Thriveni தகவல் வெளியிட்டுள்ளது.

சேலத்தில் தொடங்கி, இந்தியாவின் பல மாநிலங்களிலும் வெளிநாடுகளிலும் செயல்படும் அளவுக்கு வளர்ந்திருப்பது Thriveni-யின் முக்கிய தனிச்சிறப்பாகும். சேலம் Fairlands பகுதியில் தலைமையகத்தைக் கொண்ட இந்த நிறுவனம், இன்று சுரங்கத் தொழில், கனிம செயலாக்கம், போக்குவரத்து மற்றும் கனரக இயந்திர பராமரிப்பு உள்ளிட்ட பல துறைகளில் செயல்பட்டு வருகிறது.

பல ஆண்டுகளாக சுரங்கத் துறையில் பெரிய அளவில் செயல்பட்டு வந்தாலும், Thriveni என்ற பெயர் சாதாரண பொதுமக்கள் மத்தியில் இவ்வளவு பெரிய அளவில் பேசப்பட்டதில்லை. அதை மாற்றியது சமீபத்தில் நடைபெற்ற குடும்ப திருமண வரவேற்பு விழா.

ஓமலூர் அருகே நடைபெற்ற இந்த நிகழ்ச்சியில் பல்வேறு அரசியல் கட்சிகளைச் சேர்ந்த தலைவர்களும், நடிகர்கள் சூர்யா, கார்த்தி, சிவகார்த்திகேயன் உள்ளிட்ட திரையுலக பிரபலங்களும் பங்கேற்றனர். இதனால் சேலம் விமான நிலையம் முதல் திருமண விழா நடைபெற்ற பகுதி வரை பரபரப்பான சூழல் நிலவியது.

உண்மையில் பார்த்தால், இது நேற்று உருவான நிறுவனம் அல்ல. ஒரு Excavator-ல் தொடங்கிய தொழில் முயற்சி, பல ஆண்டுகள் கழித்து பல மாநிலங்களிலும் பல நாடுகளிலும் சுரங்கத் தொழில், Mineral Processing, Logistics, Heavy Equipment Engineering என பல துறைகளில் விரிந்து நிற்கும் அளவுக்கு வளர்ந்திருக்கிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்