ஈஸியாக திருவையாறு தொகுதியை வெல்கிறதா திமுக கூட்டணி? - விஜய் ஏற்படுத்தப் போகும் சேதாரம் யாருக்கு? "மாலை முரசு - கான்சிலிடிக்ஸ்" கருத்துக் கணிப்பு முடிவுகள்!

"மாலை முரசு - கான்சிலிடிக்ஸ்" இணைந்து தமிழகம் முழுவதும் நடத்திய மாபெரும் கருத்துக் கணிப்பு முடிவுகள் குறித்து "Tamil Nadu Political League" நிகழ்ச்சியில் திருவையாறு தொகுதி பற்றியும், வரும் சட்டமன்ற தேர்தலில் அங்கு வெற்றிப் பெற அதிகம் வாய்ப்புள்ள கூட்டணி எது? என்பது குறித்த தகவல்கள் இங்கே தொகுக்கப்பட்டுள்ளன. இசை மும்மூர்த்திகள் வாழ்ந்த புண்ணிய பூமியாகவும், காவிரி ஆற்றின் செழுமை கொண்ட டெல்டா மண்டலத்தின் முக்கிய தொகுதியாகவும் திருவையாறு விளங்குகிறது. தற்போது தி.மு.க.வின் துரை சந்திரசேகரன் இத்தொகுதியின் சட்டமன்ற உறுப்பினராகப் பணியாற்றி வருகிறார். ஆன்மீகம் மற்றும் விவசாயம் சரிசமமாகப் பின்னிப்பிணைந்த இத்தொகுதியில் அரசியல் களம் தற்போது சூடுபிடிக்கத் தொடங்கியுள்ளது.

இத்தொகுதியின் முக்கிய வாக்காளர் அடையாளங்களைப் பொறுத்தவரை, 41 முதல் 60 வயது வரையிலான நடுத்தர வயதுடையவர்கள் 37 சதவீதத்துடன் தீர்மானிக்கும் சக்தியாக உள்ளனர். இளம் வாக்காளர்கள் (18-25 வயது) 12 சதவீதமும், 26 முதல் 40 வயதுடையவர்கள் 31 சதவீதமும் உள்ளனர். 60 வயதிற்கு மேற்பட்டவர்கள் சுமார் 18 சதவீதம் பேர் உள்ளனர். சாதி ரீதியான அடிப்படையில் முக்குலத்தோர் சமூகம் 40 சதவீதத்துடன் பெரும்பான்மையாக உள்ளனர். தேவேந்திர குல வேளாளர்கள் 20 சதவீதமும், ஆதிதிராவிடர்கள் 8 சதவீதமும் உள்ளனர். முஸ்லிம் வாக்காளர்கள் 8 சதவீதமும், முத்தரையர் சமுதாயத்தினர் 6 சதவீதமும் இத்தொகுதியில் வசிக்கின்றனர். இத்தகைய சமூகக் கட்டமைப்பின் பின்னணியில் தி.மு.க. மற்றும் அ.தி.மு.க. இடையே நேரடிப் போட்டி நிலவும் என்று எதிர்பார்க்கப்படுகிறது.

திருவையாறு தொகுதியின் முழு கருத்து கணிப்பு பற்றி தெரிந்து கொள்ள: இங்கே கிளிக் செய்யவும்

திருவையாறு தொகுதியின் முக்கிய உள்ளூர் பிரச்சினைகளாகக் கழிவுநீர் மேலாண்மைத் திட்டம் முழுமை பெறாமல் இருப்பதும், முக்கியத் தெருக்களில் திறந்தவெளிச் சாக்கடைகள் இருப்பதும் மக்களிடையே அதிருப்தியை ஏற்படுத்தியுள்ளன. நஞ்சிக்கோட்டை மற்றும் பிள்ளையார்பட்டி போன்ற கிராமப் பகுதிகளுக்குப் போதுமான பொதுப் போக்குவரத்து வசதிகள் இல்லை என்பது மக்களின் பிரதான புகாராகும். திருவையாற்றின் இசைப் பாரம்பரியத்தைப் போற்றும் வகையில் உள்கட்டமைப்பு வசதிகளை மேம்படுத்த வேண்டும் என்பதும், ஆன்மீகச் சுற்றுலாவை ஊக்கப்படுத்த நவீன வசதிகள் செய்யப்பட வேண்டும் என்பதும் நீண்ட நாள் கோரிக்கைகளாகும். மேலும், உட்புறக் கிராமங்களுக்குக் கூடுதல் பேருந்து வசதிகள் மற்றும் பாதாளச் சாக்கடைத் திட்டம் போன்ற அடிப்படைத் தேவைகள் நிறைவேற்றப்பட வேண்டும் என்பது இத்தொகுதி மக்களின் பெரும் எதிர்பார்ப்பாக உள்ளது.

கடந்த 2021 சட்டமன்றத் தேர்தல் முடிவுகளின்படி, தி.மு.க. வேட்பாளர் துரை சந்திரசேகரன் 49.1 சதவீத வாக்குகளைப் பெற்று வெற்றி பெற்றார். அந்தத் தேர்தலில் அ.தி.மு.க. கூட்டணியில் போட்டியிட்ட பா.ஜ.க.வின் வெங்கடேசன் 23.6 சதவீத வாக்குகளைப் பெற்றார். ஆ.ம.மு.க.வின் கார்த்திகேயன் 17.8 சதவீத வாக்குகளைப் பிரித்தது அப்போது பெரும் கவனத்தைப் பெற்றது. 2024 நாடாளுமன்றத் தேர்தலின் போது தி.மு.க. கூட்டணி (முரசொலி) சுமார் 53.9 சதவீத வாக்குகளைப் பெற்றுத் தனது பலத்தை நிரூபித்தது. கடந்த தேர்தலில் தி.மு.க. 75 வாக்குச் சாவடிகளில் (Booths) பலமாகவும், அ.தி.மு.க. 45 சாவடிகளில் பலமாகவும் இருந்தன. சுமார் 113 சாவடிகள் ஊசலாடும் நிலையில் (Swing) இருந்ததாக எதிர்பார்க்கப்படுகிறது.

"கான்சிலிடிக்ஸ்" குழுவின் 2026 தேர்தல் கணிப்பின்படி, திருவையாறு தொகுதியில் தி.மு.க. கூட்டணி மீண்டும் ஒரு கம்பர்ட்டபிளான வெற்றியைப் பெற அதிக வாய்ப்புள்ளது. இந்த ஆய்வின்படி தி.மு.க. 38 சதவீத வாக்குகளைப் பெற்று முதலிடம் பிடிக்கும் என்றும், அ.தி.மு.க. 34 சதவீத வாக்குகளுடன் இரண்டாம் இடத்தைப் பிடிக்கும் என்றும் எதிர்பார்க்கப்படுகிறது. இரு கட்சிகளுக்கும் இடையிலான வெற்றி வித்தியாசம் சுமார் 4 முதல் 5 சதவீதம் வரை இருக்கும் என்று கணிக்கப்பட்டுள்ளது. தமிழக வெற்றி கழகம் மற்றும் நாம் தமிழர் கட்சி இணைந்து சுமார் 20 சதவீத வாக்குகளைப் பிரிக்க வாய்ப்புள்ளது. இதில் நாம் தமிழர் கட்சி மட்டும் 7 சதவீத வாக்குகளைப் பெறும் என்று எதிர்பார்க்கப்படுகிறது.

தற்போதைய நிலவரப்படி, தி.மு.க. 145 - 160 வாக்குச் சாவடிகளில் முன்னிலையில் உள்ளது. அ.தி.மு.க. 100 - 120 சாவடிகளில் மட்டுமே வலுவாக இருக்கிறது. சுமார் 25 வாக்குச் சாவடிகள் Swing நிலையில் இருப்பதால், தி.மு.க.வின் வெற்றி வாய்ப்பு மிக பிரகாசமாக உள்ளதாக தெரிகிறது. தற்போதைய எம்.எல்.ஏ. துரை சந்திரசேகரன் தொகுதிப் பிரச்சினைகளுக்காகச் சட்டமன்றத்தில் 16 முறை பேசியிருப்பது அவருக்குச் சாதகமான அம்சமாகப் பார்க்கப்படுகிறது. இருப்பினும், தமிழக வெற்றி கழகத்தின் வருகை மற்றும் சமுதாய வாக்குகள் பிரியும் விதம் இத்தொகுதியின் இறுதி முடிவுகளில் எத்தகைய தாக்கத்தை ஏற்படுத்தும் என்பது ஆர்வத்துடன் எதிர்பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.