.png)
தினமும் வேலைக்குச் சென்று சம்பாதிப்பதற்குப் பதிலாக, இரண்டு மாதங்கள் தூங்கியதற்காக ரூ.9.6 லட்சம் பரிசு கிடைத்தால் எப்படி இருக்கும்? கேட்பதற்கே ஆச்சரியமாக இருக்கிறதல்லவா? ஆனால், மும்பையைச் சேர்ந்த பெண் ஒருவர் இதைச் சாத்தியமாக்கியுள்ளார். தூக்கத்தை மையமாகக் கொண்டு நடத்தப்பட்ட வித்தியாசமான போட்டியில் வெற்றி பெற்று, அவர் இந்தப் பரிசுத் தொகையைப் பெற்றுள்ளார். இந்தச் சம்பவம் தற்போது இணையத்தில் பலரது கவனத்தையும் ஈர்த்துள்ளது. மும்பையைச் சேர்ந்த ஜினியா சட்டர்ஜி என்பவர்தான் இந்தப் போட்டியில் வெற்றி பெற்றவர். மெத்தைகள் மற்றும் தூக்கம் தொடர்பான பொருட்களைத் தயாரிக்கும் வேக்ஃபிட் நிறுவனம் நடத்திய ஐந்தாவது 'ஸ்லீப் இன்டர்ன்ஷிப்' போட்டியில் அவர் முதலிடம் பிடித்துள்ளார். இதன் மூலம் ரூ.9.6 லட்சம் ரொக்கப் பரிசும், வெளிநாட்டுச் சுற்றுலா செல்லும் வாய்ப்பும் அவருக்குக் கிடைத்துள்ளது.
இந்தப் போட்டி மொத்தம் 60 நாட்கள் நடைபெற்றது. இதில் பங்கேற்பவர்கள் தினமும் சரியான நேரத்தில் தூங்குவது, போதுமான நேரம் ஓய்வெடுப்பது, நல்ல தூக்கப் பழக்கத்தைப் பின்பற்றுவது போன்ற விதிமுறைகளைக் கடைப்பிடிக்க வேண்டும். அவர்களின் தூக்கத்தின் நேரம் மற்றும் தரம் தொடர்ந்து கண்காணிக்கப்பட்டு மதிப்பெண்கள் வழங்கப்பட்டன. இந்தப் போட்டியில் பங்கேற்க நாடு முழுவதிலுமிருந்து இரண்டு லட்சத்துக்கும் அதிகமானோர் விண்ணப்பித்திருந்தனர். பல்வேறு கட்டத் தேர்வுகளுக்குப் பிறகு 10 பேர் மட்டுமே இறுதியாகத் தேர்வு செய்யப்பட்டனர். அவர்கள் இரண்டு மாதங்களாகத் தூக்கப் பழக்கத்தைப் பராமரித்ததுடன், வாரந்தோறும் நடத்தப்பட்ட வித்தியாசமான சவால்களிலும் பங்கேற்றனர்.
போட்டியில் வெறும் தூக்கம் மட்டுமே முக்கியமல்ல. போட்டியாளர்களின் படைப்பாற்றல், நினைவாற்றல் மற்றும் சிந்திக்கும் திறனையும் சோதிக்கும் வகையில் பல சுவாரசியமான போட்டிகள் நடத்தப்பட்டன. திரைப்படக் காட்சிகளைத் தூக்கம் தொடர்பான நகைச்சுவையுடன் மீண்டும் நடித்துக் காட்டுவது, தூக்கம் தொடர்பான வார்த்தைகளை உரையாடலில் இயல்பாகப் பயன்படுத்துவது போன்ற சவால்களும் இடம்பெற்றன. ஒவ்வொரு வாரமும் சிறப்பாகச் செயல்படும் போட்டியாளர்களுக்கு 'வாரத்தின் சிறந்த தூக்கப் போட்டியாளர்' என்ற அங்கீகாரம் வழங்கப்பட்டது. இதன் மூலம் போட்டி முழுவதும் ஆர்வத்துடன் பங்கேற்பவர்களைத் தேர்வு செய்ய முடிந்தது.
இறுதிச் சுற்றில் போட்டியாளர்களுக்கு நினைவாற்றல் சோதனை, படுக்கையறையை வடிவமைக்கும் சவால் உள்ளிட்ட பல்வேறு பணிகள் வழங்கப்பட்டன. தங்களுக்குத் தேவையான தலையணை, போர்வை, அறையின் வெளிச்சம் மற்றும் ஒலி அமைப்பு போன்றவற்றைத் தேர்வு செய்து சிறந்த தூக்கச் சூழலை உருவாக்க வேண்டும். அதன்பிறகு அவர்களின் தூக்கத் தரமும் மதிப்பிடப்பட்டது. இறுதியில் அனைத்து மதிப்பெண்களும் கணக்கிடப்பட்டு, ஜினியா சட்டர்ஜி வெற்றியாளராக அறிவிக்கப்பட்டார். இரண்டு மாதங்கள் நடைபெற்ற இந்தப் போட்டியில் அவர் காட்டிய செயல்திறனுக்காக ரூ.9.6 லட்சம் பரிசு வழங்கப்பட்டது.
Wakefit நிறுவனம் கடந்த 2019ஆம் ஆண்டு இந்தப் போட்டியைத் தொடங்கியது. தூக்கம் என்பது நேரத்தை வீணாக்கும் செயல் அல்ல; உடல் மற்றும் மனநலத்திற்கு அவசியமான ஒன்று என்பதை மக்களிடம் உணர்த்துவதே இதன் நோக்கம். பொதுவாகப் பலரும் தூக்கத்தைக் குறைத்து வேலை செய்வதையே சாதனையாகக் கருதும் சூழலில், தூங்குவதற்காகவே லட்சக்கணக்கில் பரிசு வழங்கும் இந்தப் போட்டி வித்தியாசமான முயற்சியாகப் பார்க்கப்படுகிறது. அடுத்த சீசனிலும் பங்கேற்கப் பலர் ஆர்வம் காட்டுவார்கள் என எதிர்பார்க்கப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்