.png)
அமெரிக்க நாட்டில் தற்காலிகமாகப் பணிபுரிய வெளிநாட்டினருக்கு வழங்கப்படும் முக்கிய ஆவணம் தான் எச்-1பி (H-1B) விசா. இந்த விசா வழங்கும் முறையிலேயே மிகப்பெரிய அளவில் தொழில்முறை மோசடி நடப்பதாக அமெரிக்காவின் முன்னாள் நாடாளுமன்ற உறுப்பினரும், புகழ்பெற்ற பொருளியல் வல்லுநருமான முனைவர் டேவ் பிராட் என்பவர் ஒரு அதிர்ச்சிப் புகாரை வெளியிட்டுள்ளார். இந்தப் புகாரில், நம்முடைய விசா நடைமுறைகளுக்கு மையமாக இருக்கும் சென்னை நகரில் உள்ள அமெரிக்கத் துணைத் தூதரக அலுவலகம்தான் இந்த முறைகேடுகளுக்கு மையமாக இருக்கிறது என்று அவர் மிகத் தெளிவாகக் கூறியுள்ளார். குறிப்பாக, கடந்த ஆண்டில் சென்னையிலுள்ள தூதரக எல்லைக்குட்பட்ட பகுதிகளில் இருந்து மட்டும் சுமார் இரண்டு இலட்சத்து இருபதாயிரம் (2,20,000) விசாக்கள் வழங்கப்பட்டுள்ளதாக அவர் பகிரங்கமாகக் குற்றம் சாட்டியுள்ளார்.
இந்த விவகாரத்தின் ஆழத்தைப் பார்த்தால், அமெரிக்க அரசு ஒரு வருடத்தில் அதிகபட்சமாக வெறும் எண்பத்து ஐயாயிரம் விசாக்கள் (85,000) மட்டுமே வழங்க முடியும் என்று ஒரு சட்டப்பூர்வ உச்ச வரம்பை நிர்ணயித்துள்ளது. ஆனால், இந்த உச்ச வரம்பைவிட இரண்டரை மடங்குக்கும் மேலாக விசாக்கள் ஒரே ஒரு பகுதியிலிருந்து கொடுக்கப்பட்டிருப்பது எவ்வாறு சாத்தியம் என்று அவர் கேள்வி எழுப்பியுள்ளார். இந்தத் திட்டம் முழுவதுமே மோசடி வலையத்திற்குள் சிக்கிவிட்டது என்றும், "நீங்கள் எச்-1பி விசா பற்றி யோசிக்கும்போது, உங்கள் குடும்பத்தைப் பற்றி எண்ணிப் பாருங்கள். ஏனெனில் இந்த மோசடியான விசாக்கள் தான் அமெரிக்க நாட்டுப் பணியாளர்களின் வேலைவாய்ப்புகளையும், எதிர்காலத்தையும் திருடிவிட்டன" என்று அவர் மிகக் கோபமாகக் கூறியுள்ளார்.
வேலைக்காக அமெரிக்காவுக்கு வருபவர்கள் உண்மையில் திறமைசாலிகளாக இல்லை என்றும், போலியான வழிகளில் தகுதிச் சான்றுகளைப் பெற்று வேலைகளைப் பறிப்பதாகவும் அவர் சாடியுள்ளார். உலகிலேயே அதிக அளவில் விசாக்களைப் பெறுவது இந்தியர்கள் தான் என்றும், சீனா வெறும் பன்னிரண்டு விழுக்காடு (12%) மட்டுமே பெறுவதாகவும் அவர் குறிப்பிட்டார். இதுவே இந்த முறைகேடு நடப்பதற்கு ஓர் ஆதாரம் என்றும் அவர் வாதிடுகிறார்.
முனைவர் டேவ் பிராட்டின் இந்தக் குற்றச்சாட்டுகளுக்கு மேலும் வலு சேர்க்கும் வகையில், சுமார் இருபது ஆண்டுகளுக்கு முன்னால் சென்னையிலுள்ள அமெரிக்கத் தூதரகத்தில் அதிகாரியாகப் பணியாற்றிய மஹ்வாஷ் சித்திக்கி என்ற பெண்ணின் பேட்டியும் வெளிவந்துள்ளது. இந்திய வம்சாவளியைச் சேர்ந்த இவர், தான் 2005 முதல் 2007 வரை அங்கு பணியாற்றியபோது, வழங்கப்பட்ட விசாக்களில் எண்பது முதல் தொண்ணூறு விழுக்காடு (80% - 90%) வரையிலானவை போலியானவை என்றும், இது ஒரு பெரிய "தொழில்நுட்ப மோசடி" என்றும் கூறியுள்ளார்.
இந்த விசாக்களைப் பெற்றவர்கள் போலிப் பட்டச் சான்றிதழ்கள், போலியான வேலைக்கான ஆவணங்கள், குடும்ப ஆவணங்கள் போன்றவற்றைச் சமர்ப்பித்துள்ளார்கள் என்று அவர் அதிர்ச்சித் தகவலை வெளியிட்டார். நேர்முகத் தேர்வுக்கு விண்ணப்பித்தவர்கள் சில சமயங்களில் நேரில் வராமலேயே, அவர்களுக்குப் பதிலாக வேறு ஆட்கள் வந்து பேட்டி கொடுத்ததாகவும், இந்திய நிறுவனங்களில் வேலை கொடுப்பவர்கள் இதற்காகப் பணம் பெற்றதாகவும் அவர் குற்றம் சாட்டினார்.
குறிப்பாக, ஆந்திராவின் ஐதராபாத் நகரில் உள்ள அமீர்பேட்டை என்ற பகுதி, போலியான சான்றிதழ்கள் மற்றும் விசா நேர்காணலுக்குப் பயிற்சி கொடுக்கும் மையமாகச் செயல்பட்டது என்றும், அங்கு பணம் கொடுத்து போலி ஆவணங்களைப் பெற்றதாகவும் அவர் தெரிவித்தார். இந்தக் குற்றச்சாட்டுகளைக் கண்டுபிடித்து தாங்கள் விசாரித்தபோது, உண்மை நிலவரத்தை அமெரிக்க அரசின் உயர் அதிகாரிகளுக்குத் தெரியப்படுத்தினோம். ஆனால், இதற்கு எந்த நடவடிக்கையும் எடுக்கப்படாமல், பல்வேறு அரசியல் அழுத்தங்களின் காரணமாக இந்த மோசடி விசாரணையை நிறுத்தும்படி தங்களுக்கு உத்தரவிடப்பட்டது என்றும், தங்கள் குழு "சட்டத்திற்குப் புறம்பான ஒரு குழு" என்று பெயரிடப்பட்டு விசாரணை செய்யத் தடை விதிக்கப்பட்டது என்றும் அவர் வேதனையுடன் கூறியுள்ளார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
